Myles Lewis-Skelly: Arsenalning yangi yulduzi
Myles Lewis-Skelly: chapdan boshlangan yo‘l, markazga qaytayotgan yulduz
Arsenal uchun Myles Lewis-Skelly hech qachon “oson yo‘l” loyihasi bo‘lmagan. Unga hech kim gilam to‘shab qo‘ymadi. O‘ziga yo‘l ochishiga to‘g‘ri keldi.
Atigi 19 yoshda, lekin 2024-25 yilgi mavsumda sodir bo‘lgan sakrash uni birdaniga Premier League’dagi eng yorqin yosh qanot himoyachilaridan biriga aylantirdi. Arsenal tarkibi jarohatlar bilan qaqshab turgan payt edi, Arteta tarkibni yamash uchun yechim qidirayotgan edi. O‘sha bo‘shliqdan Lewis-Skelly kirib keldi va darhol joyini tortib oldi.
Bu portlash uni tez orada Angliya terma jamoasiga eltib qo‘ydi. 2025 yil mart oyida Wembleyda Albaniyaga qarshi o‘yinda u nafaqat debyut qildi, balki 2:0 hisobidagi g‘alabada birinchi golni urib, Angliya tarixida debyutida gol urgan eng yosh futbolchiga aylandi. Shu bilan birga, u o‘zini katta sahnaga rasman tanitdi.
Bir necha oy o‘tib, Hale End tarbiyalanuvchisi besh yillik yangi shartnoma bilan mukofotlandi. Klub uning kelajagiga ishonishini shunday ko‘rsatdi.
Ammo bu hikoyaning eng qiziq joyi shundaki, Lewis-Skelly o‘ynayotgan pozitsiya aslida uning tabiiy roli emas edi. U Hale Endda markaziy yarim himoyachi sifatida ulg‘aygan, o‘zi ham har doim eng yaxshi o‘ynaydigan joyi aynan o‘sha ekanini aytib keladi. Chap qanot himoyasi esa unga birinchi jamoaga kirish uchun sahna bo‘lib xizmat qildi, xolos.
Shunga qaramay, nega u akademiyada shunchalik yuqori baholanganini ko‘rish qiyin emasdi. Orqadan o‘ynab ham u o‘z sifatlarini yashira olmadi: markazga ichkarilanib kirish, tor zonalarda to‘pni himoya qilish, bosim ostidan keskin tezlanish bilan chiqib ketish – bularning barchasi ligadagi eng yaxshi yoshlar darajasida.
Birinchi kampaniyasini kuchli yakunladi. Keyingi mavsum esa unga sinov bo‘ldi.
Riccardo Calafiori 2024 yilda 42 million funt evaziga kelganidan keyin nihoyat to‘liq sog‘ayib, jamoaga qaytdi. Uning chap tomondagi ko‘p qirrali o‘yini va oldinga chiqib ketishdagi dadilligi Arsenal hujumining muhim bo‘lagiga aylandi. Shu bilan bir paytda Mikel Arteta Bayer Leverkusen’dan Piero Hincapie’ni ijaraga oldi, keyinroq esa bu kelishuvni to‘liq transferga aylantirdi.
Ikkalasi ham Lewis-Skelly’dan yoshi katta, tajribaliroq. Natijada maydondagi daqiqalar birdan torayib qoldi. Arteta o‘zi ham unga nisbatan “qattiq” bo‘lganini tan oldi. Bu esa yosh futbolchi uchun navbatdagi to‘siq edi.
Biroq mavsum oxiriga borib, boshqa frontda yoriq paydo bo‘ldi. Martin Zubimendi formasi pasaya boshladi. Shunda, Premier League tugashiga atigi to‘rtta o‘yin qolganida, Fulhamga qarshi bahsda Lewis-Skelly nihoyat o‘zining tabiiy roli – markaziy yarim himoyada – imkoniyat oldi.
Va u bu imkoniyatni qo‘ldan chiqarmadi.
O‘sha o‘yin darajasi shunchalik yuqori bo‘ldiki, yakuniy sprintda u deyarli asosiy tarkibdan tushmadi. Arsenal ligani yutgan, Champions League finaliga qadar yetib borgan hal qiluvchi uchrashuvlarning deyarli barchasini u markazda boshladi. Parijda Paris St-Germainga qarshi final mag‘lubiyati alamli bo‘ldi, ammo Lewis-Skelly o‘z nomini eng ishonchli variantlar qatoriga yozib qo‘ydi.
Shu bilan birga, zamonaviy futbolning sovuq tomoni ham eshik qoqdi. Akademiya bitiruvchisi bo‘lgan har qanday o‘yinchi kabi, u ham klub balansida “sof foyda” sifatida ko‘rinadi. Moliyaviy qoidalar, transfer bozori, balans – bular Arsenal rahbariyati uchun real omillar. Ammo tribunadagi muxlislar uchun bu ibora – ayniqsa o‘zlarining bolalari haqida gap ketganda – jarohatga teng.
Lewis-Skelly bu gap-so‘zlardan bexabar emas. O‘tgan mavsum so‘nggida Selhurst Parkda Premier League kubogi bilan tushgan suratiga “pure profit” degan yozuv qo‘yishi, aynan shu bahs-munozaraga kinoya edi. O‘yinchi ham bu o‘yinning biznes tomonini, o‘zining qanday ko‘rinishini yaxshi biladi.
Arsenal o‘zini barqaror klub sifatida yuritmoqchi. Transfer bozori esa sotib olish bilan birga sotishni ham talab qiladi. Ayniqsa, o‘tgan yozda qariyb 250 million funt sarflagan jamoa uchun. Shuning uchun ham rahbariyat Lewis-Skelly bo‘yicha takliflarni eshitishga tayyor bo‘lib turgan edi.
Ammo mavsum oxiridagi o‘sha markazdagi portlash kayfiyatni o‘zgartirib yubordi. Uning o‘z pozitsiyasidagi o‘yinlari klub ichidagi bahoni qayta ko‘rib chiqishga majbur qildi. Endi u nafaqat sotilishi mumkin bo‘lgan aktiv, balki kelajakdagi tayanch sifatida ham ko‘rilmoqda.
Shu bilan bir vaqtda, London klubida yana bir katta harakat pishib yetilmoqda. Arsenal Newcastle sardori Bruno Guimaraes transferini yakunlashga yaqin. Narx – 80 million funt atrofida. Bunday darajadagi markaziy yarim himoyachi kelishi Lewis-Skelly uchun bir qarashda devor bo‘lib ko‘rinadi. Raqobat keskinlashadi, o‘yin vaqti uchun kurash yanada shafqatsizlashadi.
Ammo bu yerda bitta narsa o‘zgarmaydi: uning iste’dodi, Arsenal bilan bog‘liq tarixi va xarakterning o‘zi. Bular uni har qanday holatda ham rotatsiyadagi jiddiy nom qilib qoladi. Ayniqsa, bu mavsum startida unga eshiklar biroz kengroq ochilishi mumkin.
Sababi oddiy: jahon chempionati kech tugadi, Arsenalning asosiy yulduzlari turnirda oxirigacha yugurdi. Ular hali to‘liq qaytib ulgurmagan, jismoniy holat bo‘yicha ortda. Martin Odegaard, Angliya yarim himoyachilari Declan Rice va Eberechi Eze, shuningdek Ispaniya bilan chempion bo‘lgan Zubimendi va Mikel Merino – hali to‘liq tarzda Arteta qo‘liga qaytgani yo‘q.
Shu orada Lewis-Skelly allaqachon ishga kirishib bo‘ldi. Girona va Real Betisga qarshi mavsumoldi o‘yinlarida u maydonga chiqdi va o‘zini ko‘rsatdi. Ayniqsa Betisga qarshi uchrashuvda u markazning eng chuqur nuqtasida, tayanch rolida harakat qilib, o‘ziga yuklangan mas’uliyatni bemalol ko‘tardi.
U to‘pni pastdan yuqoriga olib chiqishda, pressing ostida ham sokin qaror qabul qilishda kuchli ko‘rinish berdi. Kerak bo‘lganda, bir-ikki raqibni ortda qoldirib, chiziqlar orasiga yorib kirib bordi. Calafiori bilan o‘zaro almashinuvi ham e’tiborga loyiq: italiyalik chap tomondan oldinga uchib ketgan paytlarda Lewis-Skelly chap qanotni yopib, himoya chizig‘ini muvozanatda ushlab turdi.
Calafiori o‘zi ham bu hamkorlik haqida gapirib o‘tdi: ular ko‘p gaplashishga hojat qolmaydigan darajada bir-birini tushunadi. Bu maydonda o‘zaro ishonch va ritm shakllanayotganidan darak.
Endi esa taqvim siqilmoqda. Manchester Cityga qarshi Community Shield atigi to‘qqiz kundan keyin. Shunday fon’da Lewis-Skelly o‘zini aynan qachon asosiy markaziy yarim himoyachi sifatida sinab ko‘rish kerak bo‘lgan futbolchi ekanini isbotlash uchun tayyor turibdi.
Savol endi shunda: Arteta bu safar unga eshikni oxirigacha ochadimi, yoki yana bir bor kutish navbati keladimi?
