Abdelkarimning ikki goli va Birminghamda jonli o‘yin
Barcelona yangi mavsumga yo‘l olarkan, St. Andrew’sdagi ilk o‘rtoqlik uchrashuvi shunchaki mashg‘ulot emas, balki La Masia kelajagining sahnaga chiqishi bo‘ldi. Birmingham City bilan 2:2 hisobidagi durang, natijadan ko‘ra ko‘proq savollar va, ayni paytda, umidlar ulashdi.
Hansi Flick ilk daqiqalardanoq o‘z falsafasini yashirmadi. Maydonda — La Masia tarbiyalanuvchilari va bir nechta asosiy jamoa zaxirachilaridan yasalgan aralash tarkib. Raqib esa tayyorgarlikda ancha oldinga o‘tib bo‘lgan, yuqori pressing va kuchli ritmga tayyor Birmingham.
Bosim ostida to‘pni orqadan oldinga olib chiqish? Barcelona buni uddaladi. Ammo jarima maydoni atrofida so‘nggi zarba, so‘nggi pas yetishmadi. Dastlabki bo‘limda aynan shu nuqta ko‘zga yaqqol tashlandi.
O‘ng qanotdagi dvigatel: Xavi Espart
Birinchi bo‘limning eng yorqin nomi — Xavi Espart. U o‘ng qanot himoyasida boshladi, lekin o‘yini bilan chiziq raqamiga sig‘madi. Har bir xavfli hujumda u bor edi: pressingni pas bilan yorib o‘tish, to‘pni olib yurib chiziqlar orasini topish, hujumchilarni qulay vaziyatga chiqarish.
Uning yonida Ebrima Tunkara ham o‘z so‘zini aytdi. Kuch, texnika, pressing ostida xotirjamlik — u bir necha bor uchinchi zonaga keskin yugurib kirib, raqibni ortga chekinishga majbur qildi. Yangi kelgan Karim Adeyemi esa to‘pni ko‘p oldi, lekin qarorlar va texnik ijro hali yozilmagan sahna ko‘rinishiga o‘xshab qoldi. Mavsumoldi uchun tabiiy hol, lekin baribir qayd etilmay qolmaydi.
Shu paytga qadar o‘yin tashabbusi asosan Barcelonada edi. Lekin futbol shafqatsiz: Birmingham birinchi zarbasidayoq hisobni ochdi. Yarim soat atrofida August Priske boshi bilan gol urib, mezbonlarni oldinga olib chiqdi — o‘yinning oqimiga qarshi zarba.
Abdelkarim sahnaga chiqdi
Gol Barcelonani sindirmadi. Aksincha, hujumlar yanada keskinlashdi. Yosh hujumchi Hamza Abdelkarim jarima maydoni ichida raqibni xatoga majbur qildi va penalti ishladi. O‘sha penalti — uning klubdagi ilk rasmiy goli uchun imkoniyat.
U sovuqqonlik bilan zarba berdi. To‘p darvozaga, hisob 1:1. 18 yoshli forvard uchun — katta sahnadagi birinchi iz.
Tanaffusdan so‘ng Flick to‘rt o‘zgarish qildi. Maydonga chiqqanlar orasida eng katta shovqinni Roony Bardghji keltirdi. Shved qanot futbolchisi to‘pni olgan zahoti raqibga yuzlanadi, dribling qiladi, hujumni keskinlashtiradi. U o‘yinni tezlashtirdi.
Bosim ham natijasiz qolmadi. Bardghji uzoq masofadan zarba berdi, darvozabon qaytardi, lekin to‘pni birinchi bo‘lib kuzatgan yana o‘sha Abdelkarim bo‘ldi. Klassik «poacher»cha harakat — to‘g‘ri joy, to‘g‘ri vaqt, aniq yakun. 2:1, uning ikkinchi goli.
To‘liq yangilangan tarkib va sinov ostidagi bolalar
Gol ortidan Flick butunlay yangi ko‘rinishga o‘tdi: yetti o‘zgarish, deyarli to‘liq yangilangan «o‘n birlik». Maydonda — to‘qqiz nafar Barça Atlètic futbolchisi, ularga faqat Roony Bardghji va Héctor Fort qo‘shildi. Tajriba boshlangani hamon sezildi.
Birmingham standart vaziyatdan hisobni tenglashtirdi. Jhon Solís o‘yinning tugashiga 20 daqiqa qolganida jarima zarbasidan keyingi chalkashlikda to‘pni darvozaga joyladi. Shundan so‘ng mezbonlar kayfiyatni o‘zgartirdi: jismonan kuchliroq, tajribaliroq jamoa yosh raqibga qarshi ruhiy ustunlikni ham qo‘lga ola boshladi.
Shu lahzada Barcelonaning bolalari sinovdan o‘tdi.
Ular cho‘kmadi. To‘pni yana o‘z nazoratiga oldi, o‘yinni tinchlantirdi, qanotda Roony Bardghjiga tayanib, xavf yaratishda davom etdi. Brian Fariñas va Jordi Pesquer qanot himoyasida dadil o‘ynadi, yuqoriga chiqishdan cho‘chimadi, pressingda faol qatnashdi. Chap qanotda Álex González o‘zini erkin his qildi, raqib himoyachilarini bir necha bor birga-bir vaziyatlarda aldab o‘tdi.
Oxirgi daqiqalarda Barcelona g‘alaba golini bir necha bor pishitdi. Lekin Birmingham darvozaboni kechani o‘z shousiz tugatishni istamadi: bir nechta muhim seyvlar — va asosiy vaqt 2:2 bilan yakunlandi.
Rasmiy bo‘lmagan penaltilar va rasmiy xulosa
Uchrashuv tugagach, kechaning ramziy g‘olibini aniqlash uchun yana bir sinov — penaltilar seriyasi. Yosh darvozabon Áron Yaakobishvili ikki zarbani qaytardi, o‘ziga xos vizit kartasini qoldirdi. Biroq nuqtadan uch marta xato qilgan Blaugrana yakunda «g‘alabani» qo‘ldan chiqardi.
Natija protokolda qoladi. Lekin Barcelonaning bu kechasi raqamlar bilan o‘lchanmaydi.
Hamza Abdelkarimning ikki goli, Xavi Espartning yetuk o‘yini, Roony Bardghjining ritmni o‘zgartira olishi, Fariñas, Pesquer, González va Yaakobishvilining jasoratli chiqishlari — bularning barchasi Flick uchun ilk real signallar.
St. Andrew’sdagi bu yozgi kecha bir savolni yana kun tartibiga qaytardi: La Masia yana bir avlodni katta sahnaga olib chiqishga tayyormi? O‘yin javobning bir qismini allaqachon aytgandek bo‘ldi. Endi navbat mavsum davomida bu va’daning qanchalik bajarilishida.
