Ancelotti tan olgan xato: Braziliya jahon chempionatidan uchishiga nima sabab bo'ldi?
2026-yilgi jahon chempionati Braziliya uchun yana bir yarim yo‘lda uzilgan orzu bo‘lib qoldi. 2002-yildan beri ko‘tarilmagan kubok yana qo‘ldan chiqdi, bu safar 1/8 finalda Norvegiyaga qarshi 2:1 hisobidagi mag‘lubiyat bilan.
Carlo Ancelotti esa bu safar barmog‘ini aniq bir lahzaga qaratdi – ikkinchi bo‘limdagi suv ichish tanaffusiga.
“Biz jahon chempionatini suv ichish tanaffusida yutqazdik”
Braziliya terma jamoasi bosh murabbiyi bo‘lgan italiyalik mutaxassis o‘sha daqiqani eslar ekan, o‘zini ayblashdan qochmadi. U o‘yinning ritmini noto‘g‘ri o‘qiganini tan oldi.
Ancelotti "ESPN" telekanaliga bergan intervyusida avval bir yillik ishni himoya qildi. Uning aytishicha, terma jamoa ichki tashkilot, yig‘inlar, infratuzilma nuqtai nazaridan namunali darajada ishlagan, 26 nafar futbolchining tanlovi ham o‘rinli bo‘lgan. U yil davomida futbolchilarning umumiy performansini “ijobiy” deb baholadi.
Ammo keyin voqea keskin burildi.
Murabbiy jarohatlar rejasini chippakka chiqarganini eslatdi: Eder Militão, Rodrygo, Estêvão, Wesley, turnir davomida esa Raphinha safdan chiqqan. Reja o‘zgardi, variantlar qisqardi.
Shu fon ortida Ancelotti eng og‘riqli nuqtaga qaytdi: “Menimcha, biz jahon chempionatini Norvegiyaga qarshi suv ichish tanaffusida yutqazdik. Nega? Chunki o‘sha paytgacha jamoa o‘yin oqimini nazorat qilib turgandi”, – dedi u.
U Norvegiyaning uslubini ham eslatdi: to‘pni ko‘p ushlab turish, ayniqsa o‘z maydonida. Xuddi shunday yondashuvni ular Angliyaga qarshi o‘yinda ham qo‘llaganini, o‘yinni boshqarib, oxirida g‘alabaga juda yaqin kelganini tilga oldi.
Ancelotti esa o‘sha tanaffus paytida vaziyatni boshqacha ko‘rgan. U jamoa nazoratni boy bergan, deb o‘yladi. Shunda u tarkibga aralashdi.
“Balki mening xatoyim shu yerda bo‘lgandir, – dedi u. – Men jamoa o‘yin ustidan nazoratni yo‘qotdi, deb o‘yladim, aslida esa unday emasdi. O‘zgarishlar qildim, keyin esa Erling Haalandning goli bilan muammo paydo bo‘ldi. Jahon chempionatida ikkinchi bo‘limning 30-daqiqasida gol o‘tkazsangiz, o‘rnidan turish juda qiyin. Shunga qaramay, imkoniyatimiz bo‘lgan”.
Nazoratni ushlab turgan jamoa, bir suv ichish tanaffusi, bir noto‘g‘ri talqin – va narigi tomonda Haaland. Braziliyaning kampaniyasi shu tarzda qulab tushdi.
Neymar atrofidagi bahs: muvozanat buzildimi?
Mag‘lubiyatdan keyin eng ko‘p tanqidga uchragan qarorlardan biri – Neymarni so‘nggi daqiqalarda maydonga tushirish bo‘ldi. Bu o‘zgarish jamoa muvozanatini buzdi, degan fikrlar ko‘p aytildi. Ancelotti esa o‘z pozitsiyasida qat’iy.
“Yo‘q”, – deydi u. U o‘sha paytda Ryan o‘rniga Endrickni o‘ng qanotga tushirganini, Neymar esa gol yaratish yoki o‘sha daqiqalarda o‘z mahoratini ko‘rsatishga qodir deb hisoblaganini aytdi. Rejasi aniq bo‘lgan: 70-daqiqalarda o‘yinga ta’sir qilish.
Bu yondashuv Yaponiyaga qarshi o‘yin rejasiga ham bog‘langan edi. O‘sha uchrashuvda Ancelotti Neymarni emas, Gabriel Martinellini maydonga tashlagan. Sabab oddiy: Braziliya o‘yinni to‘liq nazorat qilgan, Yaponiya esa faqat qarshi hujumlarga umid bog‘lagan. Murabbiy gol izlashdan ko‘ra, Neymarni qo‘shimcha bo‘limlarga asrashni o‘ylagan.
Norvegiyaga qarshi esa u o‘zini tiyolmadi. “Neymarni biroz erta tushirdim, – deydi u, – maqsad o‘yindagi nazoratni qaytarib olish edi”.
Bu qarorlar ortida murabbiylik kasbining eng og‘ir tomoni yotadi. Ancelotti hatto Thomas Tuchelni eslab, murabbiylar ko‘pincha keskin tanqid ostida qolishini, lekin qarorlar ulkan bosim ostida, soniyalar ichida qabul qilinishini ta’kidlagan. Har safar to‘g‘ri topishning iloji yo‘q.
“Neymar tushishi shart edi”
Shunga qaramay, Ancelotti Neymar borasida o‘zini oqlamaydi, balki fikrini yana ham qat’iyroq qiladi. Uningcha, yulduz hujumchi o‘sha daqiqada baribir maydonga tushishi kerak edi.
Murabbiy Neymarni maqtadi: yaxshi mashg‘ulot, tayyorgarlik, sportchi ruhi. U Neymar jamoaga yordam berganiga ishonadi. Uning fikricha, xato – o‘yinchining o‘zida emas, balki tuzilmani o‘zgartirishda bo‘lgan bo‘lishi mumkin.
“U maydonga tushishi kerak edi, – deydi Ancelotti. – U bunga loyiq edi, tayyor edi. Faqat uni tushirganimizda, jamoa strukturasi o‘zgarmasligi kerak edi”.
Bir suv ichish tanaffusi, bir noto‘g‘ri o‘qilgan ritm, bir nechta o‘zgarish – va Braziliya yana jahon chempionatini tomoshabin sifatida yakunladi. Endi savol bitta: bu xatolar keyingi safar tajribaga aylanadimi yoki yana bir avlodning orzusi tanaffus chizig‘ida uzilib qoladimi?
