Atleti yozgi safari: Seulda Manchester City va Manchester United bilan o‘yinlar

“Atleti” yangi mavsum oldidan yana Osiyoga yo‘l oladi. Klub 2026/27-yilgi mavsumga tayyorgarlik doirasida “Coupang Play Series” turnirida ishtirok etib, yana bir bor “Manchester City” bilan to‘qnash keladi.

9-avgust, yakshanba kuni Seul World Cup Stadium yevropalik yulduzlar sahnasiga aylanadi. Aynan shu arenada 2023-yil yozida ham shu turnir doirasida “Cityzens”ga qarshi o‘yin bo‘lib o‘tgan, o‘shanda ispaniyaliklar Memphis va Carrasco urgan gollar hisobiga 2:1 hisobida g‘alaba qozongan edi. O‘sha kecha hanuz esda: yuqori pressing, keskin qarshi hujumlar va yakunda kuchli raqib ustidan prinsipial g‘alaba.

Endi esa Seul yana shunday bahsga tayyorlanmoqda. “Manchester City” bilan uchrashuv nafaqat tijoriy tur, balki Simeone jamoasi uchun haqiqiy sinov bo‘ladi: yangi mavsum arafasida jismoniy tayyorgarlik, taktik yechimlar va tarkibdagi raqobat darhol eng yuqori saviyada tekshiriladi.

Yozgi reja faqat Seul bilan cheklanmaydi. Atleti bu yozda Manchester shahri klublarini to‘liq “paket”da oladi: 1-avgust kuni jamoa Stokholmda “Manchester United”ga qarshi maydonga tushadi. Avval Skandinaviya, so‘ngra Osiyo — ikki qit’ada, ikki grandga qarshi o‘yin. Yozgi sparringlar uchun bundan yaxshiroq dastur topish qiyin.

Bir oy ichida ikki bor Manchester gigantlariga qarshi bahs. Savol bitta: Atleti bu safar ham Seuldagi 2:1lik xotirani yangi, yanada balandroq darajadagi bayonotga aylantira oladimi?