Barcelona sardorlik bo‘shlig‘ida Raphinha sahnaga chiqmoqda
Barcelona ichki ierarxiyasida yozgi transferlar fonida kutilmagan zilzila yuz berdi. Ter Stegenning kutilmagan tarzda Ajaxga ijaraga ketishi, darhol Ronald Araujo’ni birinchi sardorlikka ko‘targan edi. Endi esa urugvaylik himoyachining Liverpool bilan bog‘liq sensatsion ketishi ehtimoli bu rejani ham chilparchin qilmoqda. Klubda sardorlik bog‘ichi yana bo‘sh qoldi.
Hansi Flick uchun bu shunchaki ramziy masala emas. Bu — kiyinish xonasining yuragi, maydondagi ovoz, yosh va notekis tarkibli jamoani ushlab turadigan asosiy tayanch nuqtasi. O‘tgan mavsum oxirigacha bu tayanch aniq edi: Ter Stegen, Araujo, Frenkie de Jong, Raphinha va Pedri. Endi esa bu zanjirning yarmi uzilgan.
De Jong – “tabiiy” sardor, ammo murakkab holatda
Mantiqan qaraganda, birinchi navbatda ko‘z Frenkie de Jong’ga tushadi. U tajribali, jamoa ichida hurmatga ega, avvalgi sardorlar davridan qolgan eng katta figura. Lekin vaziyat oddiy emas.
Gollandiyalik yarim himoyachining jarohati hamon muammoli. Uning tiklanish jarayoni atrofida klub ichida bahslar kuchaygani aytilmoqda. Barcelona rahbariyati, xabarlar bo‘yicha, De Jongning o‘zini Jahon chempionati uchun asrayotgandek tutishi, klub manfaatlaridan ko‘ra terma jamoani ustun qo‘yayotgandek taassurot qoldirayotganidan norozi. Shunday fon ostida unga birdan birinchi sardorlikni topshirish – murabbiy shtabi uchun xavfli qaror.
Demak, Flickga boshqa tayanch kerak. Aynan shu yerda Raphinha sahnaga chiqadi.
Raphinha – kiyinish xonasining yangi ovozi
Mundo Deportivo ma’lumotiga ko‘ra, Raphinha so‘nggi oylar ichida nafaqat maydonda, balki kiyinish xonasida ham eng ta’sirchan figuraga aylangan. Uning o‘yindagi fidoyiligi, xarakteri, jamoa ichidagi munosabatlari – hammasi bir yoqqa qarab ishlayapti: u tobora ko‘proq yetakchi sifatida qabul qilinmoqda.
Braziliyalik hujumchi ko‘p gapirmaydi, lekin gapirganda tinglashadi. Hamyurtlariga xos hissiyot, agressiv pressing, mag‘lubiyatni qabul qilmaslik – bular Barcelona ichida hamisha qadrlanadigan fazilatlar. Aynan shuning uchun ham u sardorlik bog‘ichini muntazam taqishga eng jiddiy nomzodlardan biri sifatida ko‘rilmoqda.
De Jong, Raphinha va Pedri uchligining asosiy yetakchilar sifatida shakllanishi deyarli kutilgan hol. Lekin klubga besh kishilik sardorlar guruhi kerak. Yana ikki bo‘sh o‘rin bor. Bu esa eshikni La Masia farzandlari uchun ochadi.
Eric Garcia – La Masia ruhi va katta sahna tajribasi
Hisobga olingan eng kuchli nomzodlardan biri – Eric Garcia. U Manchester City bilan eng yuqori darajada o‘ynab ko‘rgan, xalqaro tajribaga ega, eng muhimi – La Masia tarbiyalanuvchisi. Klub falsafasini, ichki bosimni, “Barcelona bo‘lish” nimani anglatishini juda yaxshi biladi.
Garcia uchun sardorlik – shunchaki bog‘ich emas, o‘z akademiyasi vakili sifatida mas’uliyat ramzi bo‘lishi mumkin. U hali global yulduz maqomiga chiqmagan bo‘lsa-da, kiyinish xonasida jiddiy, tartibli va fikrini aniq aytadigan futbolchi sifatida qabul qilinadi. Bunday profil Flick uchun ayni muddao.
Gavi – yoshlik, g‘azab va Camp Nou talab qiladigan energiya
Ikkinchi yo‘nalish esa ancha hissiyotli: Gavi. Atigi 22 yoshda. Lekin Barcelona birinchi jamoasida o‘tgan yillari unga o‘n yillik tajriba bergandek.
Gavining o‘yini – Barcelona qadriyatlarining jonli ko‘rinishi: intensivlik, maydondagi tajovuzkorlik, to‘p uchun oxirigacha kurashish, tomoshabinlarni uyg‘otadigan ehtiros. Yoshi kichik bo‘lishiga qaramay, u ko‘p o‘yinlarda jamoani “tishlab” tortib chiqqan, ritmni oshirgan, raqibni psixologik bosim ostida qoldirgan.
Ana shu xarakter uni sardorlik guruhi uchun real variantga aylantiradi. Barcelona ko‘p yillardan beri aynan shunday “jonli nerv”ga ega futbolchilar orqali o‘z uslubini himoya qilib kelgan.
Flick uchun sinov: yoshlar, bosim va yangi davr
Klub rahbariyati mavsum startiga qadar bu masalani yopishi kerak. Vaqt oz, bosim katta. Flick uchun esa bu qaror strategik ahamiyatga ega: aynan shu sardorlar murabbiy shtabi bilan maydon o‘rtasidagi ko‘prikka aylanadi, yosh tarkibni tartibga soladi, ichki intizom va kayfiyatni ushlab turadi.
De Jong avvalgi davrdan qolgan eng katta figura bo‘lib turibdi, lekin uning jarohati va kelajagi borasidagi savollar sabab, uzoq muddatli yetakchilik og‘irligi tobora ko‘proq Raphinha va La Masia vakillari yelkasiga tushayotgani ko‘rinib turibdi.
Barcelona yangi sport davriga kirib bormoqda. Savol bitta: bu yangi sardorlar guruhi klub og‘irligini ko‘tara oladimi yoki Camp Nou yana bir bor o‘z yetakchisini qayta izlashiga to‘g‘ri keladimi?
