Barcelona yozgi transfer oynasida Julian Alvarez uchun jang
Barcelona yozgi transfer oynasida hashamat izlayotgan klub emas. Ular bo‘shliqni to‘ldirishga majbur bo‘lgan jamoa. Robert Lewandowski ketganidan keyin old chiziqda paydo bo‘lgan bo‘shliqni to‘ldirmasdan yangi mavsumni boshlash – bu Kataloniya klubi uchun deyarli o‘z-o‘zini jazolash bilan barobar.
Alvarez – Flickning bosh rejasi, lekin ikki tomondan bosim
Alvarez – bu oddiy “variant” emas, balki “Spotify Camp Nou” uchun tayyor asosiy tarkib futbolchisi sifatida ko‘rilayotgan yagona nom. Hisobotlarga ko‘ra, aynan u keladigan bo‘lsa, birinchi kundan maydonga tushadigan hujumchi bo‘ladi. Qolgan nomlar esa ishonchni asta-sekin yutib olishi kerak bo‘lgan tavakkal.
Ammo yo‘lning o‘rtasida ikki to‘siq turibdi.
- Birinchisi – Atletico Madrid. Klub Alvarez bo‘yicha har qanday kelishuvda o‘z pozitsiyasidan chekinmayapti, narxni tushirishga moyillik ko‘rsatmayapti. “Metropolitano”dagilar muzokaralarda oyoq tirab olgan.
- Ikkinchi to‘siq – Real Madrid. “Los Blancos” Alvarez uchun 150 million yevrolik taklif kiritdi. Florentino Perez bu summa rad etilishini bilardi. Bu taklifning maqsadi boshqa edi: Atletico Madridga Barcelonadan 150 milliondan kamiga rozi bo‘lish yo‘lini yopib qo‘yish. Tarixiy raqibning harakati Kataloniya klubini burchakka siqib qo‘ydi.
Endi Alvarez atrofida domino effekti ishga tushgan.
Vinicius va Arsenal omili: yashirin zanjir
Alvarez kelajagi Bernabeudagi boshqa yulduz – Vinicius Junior bilan ham bevosita bog‘lanib qoldi. Agar braziliyalik vinger Arsenal safiga yo‘l olsa, londonliklar Alvarez poygasidan chiqib ketadi va bu Barcelona uchun nafas olish imkonini beradi.
Ammo aynan mana shu ssenariyni tasavvur qilish mushkul. Real Madrid Viniciusdan voz kechishi – bugungi kun kontekstida deyarli tasavvur qilib bo‘lmaydigan qaror. Demak, Arsenal qoladi. Va agar ular poygada qolsa, moliyaviy jihatdan Barcelonani oson siqib chiqarishi mumkin.
Barcelona esa biladi: ular bu yozda Alvarezni qo‘lga kirita olmasa, bu oddiy yo‘qotish emas, balki sport loyihasining markaziy bo‘lagini yo‘qotish bo‘ladi.
Asllani va Kroupi – tavakkal, emas yechim
Alvarez bitimi barbod bo‘lsa, rejada ikkinchi ism tayyor: Vesnik Aslani. Unga ham Barcelona jiddiy qiziqmoqda, lekin bu yerda ham raqobat kuchli – Leipzig ham uni qo‘lga kiritmoqchi. Bu esa allaqachon murakkab bo‘lgan moliyaviy kurashni yanada chigallashtiradi.
Junior Krupi esa ro‘yxatdagi eng noaniq nom. Klub ichida bu transfer bo‘yicha fikrlar bo‘lingan, rahbariyat bir qarorga kelolmayapti. Hansi Flick hozircha “ha” degan, lekin bu ham umumiy ichki shubhalarni yo‘qotgani yo‘q.
Eng muhimi – Asllani ham, Kroupi ham Alvarezdan farqli ravishda darhol asosiy tarkibga kirib boradigan darajadagi yulduz sifatida ko‘rilmayapti. Ular katta klub yoki milliy terma jamoa darajasida hali porlamagan. Demak, Barcelona uchun bu – zaruratdan tug‘ilgan tavakkal, lekin yechim emas.
Ferran Torres: ketish xavfi va PSG soyasi
Ro‘yxatdagi to‘rtinchi ism – Ferran Torres. U allaqachon shartnomasining so‘nggi yiliga kirgan, lekin hali yangilashga qo‘l qo‘ymagan. Bu esa klubni xavotirga solyapti: kelasi yanvarda uni bepul yo‘qotish – Barcelona uchun qabul qilib bo‘lmaydigan ssenariy.
Parc des Princes yo‘nalishi bu yerda yana paydo bo‘ladi. Barcelona hanuzgacha Paris Saint-Germain bilan bo‘lgan og‘riqli tarixni unutgani yo‘q. Neymar da Silva transferi hanuz alam qiladi. Ousmane Dembéléning Parijdagi keskin burilishi ham shu ro‘yxatdan joy oladi.
Endi navbat Ferran Torresga kelgan bo‘lishi mumkin. U Luis Enrique bilan yaxshi munosabatlarga ega, yangi mavsumda chetga surib qo‘yilishidan cho‘chiydi. Shuning uchun agar klub uni bu yozda sotib yuborish orqali hech bo‘lmasa ma’lum darajada daromad olish imkoniyatiga ega bo‘lsa, buni ko‘rib chiqishi ehtimoli yuqori.
Barcelona Ferran Torresni bepul qo‘ldan boy berish xavfini ko‘ra turib, PSNga yo‘l ochib berishi mumkin. Bu qaror ham hissiy, ham sport nuqtai nazaridan og‘ir bo‘ladi, lekin moliyaviy realiyat shafqatsiz.
Raqiblar hashamat izlayapti, Barcelona esa tayanch qidiryapti
Yevropaning katta klublariga nazar tashlasak, manzara butunlay boshqa. Paris Saint-Germain yozgi oynani hashamat sifatida ko‘rmoqda: chuqurlik qo‘shish, ichki raqobatni kuchaytirish. Diomande bitimi barbod bo‘ldi – lekin Parij klubi bundan aziyat chekmaydi. Oxirgi kunlarda Ferran Torresni ham qo‘lga kirita olmasalar, baribir Luis Enrique ixtiyorida Ligue 1 va Champions League uchun kurashishga yetadigan asosiy va zaxira nomlar bor.
Real Madrid ham xuddi shunday holatda. Rodri nomi ular bilan bog‘lanmoqda, lekin klub allaqachon Tchouaméni bilan o‘sha pozitsiyani yopib qo‘ygan, Eduardo Camavinga ham xuddi shu zonalarda o‘ynay oladi. Bu – kuchni kuchga qo‘shish.
Arsenal – yana bir misol. Ular ham Alvarez uchun kurashda Barcelonaga raqib bo‘lib turibdi. Lekin London klubi allaqachon Viktor Gyokeres, Kai Havertz va Gabriel Jesus bilan hujum chizig‘ini shakllantirgan. Ular shu tarkib bilan Premier League chempionligiga va Champions League finaliga yetib kelishdi. Alvarez ular uchun qo‘shimcha qurol, Barcelona uchun esa tayanch nuqtasi.
Shu yerda asosiy farq ko‘rinadi: ko‘pchilik grandlar yozni “zaxira boyitish” deb qabul qilayotgan bo‘lsa, Barcelona uni “majburiy bo‘g‘in topish” sifatida boshdan kechirmoqda. Ular Premier League klublari bilan ochiq moliyaviy poygada qatnasha olmaydi. Har bir yevro hisobda.
Mavsum oldidan katta savol
Bugungi manzara shunday: Barcelona hozircha yangi mavsumni Alvarez darajasidagi hujumchisiz boshlamaslikka kafolat bera olmayapti. Hatto Ferran Torres kabi nisbatan xavfsiz “tavakkal” variantni ham saqlab qolishlariga ishonch yo‘q.
La Liga poygasi va yillar davomida orzu qilingan Champions League uchun haqiqiy da’vogar bo‘lishni istagan klub uchun bu juda xavfli chiziq.
Savol endi shunday: Barcelona bu yozda raqiblar o‘rtasidagi murakkab o‘yinda yo‘qotuvchi bo‘lib qoladimi yoki barcha cheklovlarga qaramay, o‘ziga kerak bo‘lgan bitta hal qiluvchi bo‘g‘inni topa oladimi?
