Ben Sulayem: “Alonso sahnani tark etishi mumkin emas”
Formula 1 atrofidagi eng keskin gaplardan biri bu safar poyga yo‘lagidan emas, balki Madriddagi sahnadan yangradi. FIA prezidenti Mohammed Ben Sulayem Fernando Alonso haqida ochiq gapirdi va uning sportni hozirgi holatda tark etishini “qabul qilib bo‘lmaydigan” holat deb atadi.
45 yoshli, ikki karra jahon chempioni bu mavsum oxirida Aston Martin bilan amaldagi shartnomasini yakunlaydi. U yaqinda kelajagi borasidagi qarorni “yaqinda emas” deb ta’riflab, vaqtni cho‘zishini aytgan edi. Bu orada esa raqamlar o‘zi uchun gapirmoqda: Aston Martin joriy mavsumda konstruktоrlar reytingida 10-o‘rinda, mashina raqobatbardosh emas, Honda dvigateli esa poyga maydonida eng kuchsiz paket sifatida baholanmoqda.
Ben Sulayemning Fikri
Shu fon ostida Ben Sulayem Madridda bo‘lib o‘tgan tadbirda keskin ohangda so‘zladi: “Biz Fernando’ni ketishiga yo‘l qo‘ya olmaymiz. Alonso – buyuk chempion. U shunchaki holatlar qurboni bo‘lgani uchun sahnani tark etmasligi kerak”, – dedi u. “Bu sahnadan ketishning to‘g‘ri yo‘li emas. U muvaffaqiyatli bo‘lishi kerak, keyin xohlagan paytida ketadi. Lekin natijalar majbur qilgani uchun emas.”
FIA rahbari so‘zlariga ko‘ra, u allaqachon Alonso bilan shaxsan suhbatlashgan. U Madridda shunday deya esladi: “Uni juda tushkun holda ko‘rdim. ‘Fernando, tushunaman, bu qabul qilib bo‘lmaydi: o‘z yurtiga kelasiz, ikki karra jahon chempionisiz…’ dedim unga.”
Dvigatel Masalalari
Ben Sulayem may oyidayoq jamoaga dvigatel bo‘yicha huquqiy yo‘l ochib berilganini ham ochiqladi: “Biz may oyida jamoa uchun, dvigatel bo‘yicha, yaxshilash imkonini beradigan huquqiy ish qildik. Keyin unga aytdim: ‘Men senga nima qilishimizni aytmayman. Aksincha, sen ayt – sen haydovchisan. Kel va bizga ayt, natijalarni yaxshilash uchun nima qilishimizni xohlaysan?’”
FIA matbuot kotibi bu fikrlar ortida F1dagi qo‘shimcha ishlab chiqish va yangilash imkoniyatlari tizimi – Aduo turibdi, deb tushuntirdi. Ushbu mexanizm bo‘yicha, kuch qurilmalari eng yaxshi dvigateldan 2 foizdan ortiq orqada qolsa, ishlab chiqaruvchilarga dizaynni sezilarli darajada yangilash, kuchaytirish uchun qo‘shimcha imkoniyatlar beriladi.
Matbuot kotibi qisqa izoh bilan kifoyalandi: “Bu Aduo jarayoni haqida aytilgan gaplar va u (Ben Sulayem) FA sportda qolishini xohlashi haqida. Xolos.”
Shunga qaramay, savollar paydo bo‘ldi. Axir FIA prezidenti, mustaqil va xolis boshqaruv organi rahbari sifatida, texnik tenglikka bevosita ta’sir qiluvchi qarorlarga aralashayotgandek taassurot uyg‘otishi mumkin. Bu haqda so‘ralganda, FIA vakili buni shaxsiy ehtiros bilan izohladi: “U o‘zi ham sobiq haydovchi sifatida poygachilarga juda mehr bilan qaraydi. Bu gaplardan ortiqcha ma’no qidirmaslik kerak.”
Alonsoning Kelajagi
Shu tariqa, Alonso kelajagi atrofidagi savollar yanada chigallashdi. Aston Martin hozircha uni chempionlik uchun kurashadigan mashina bilan ta’minlay olmayapti, Honda paketi esa raqobatchilardan orqada. Lekin FIA rahbari ochiqchasiga shuni aytyapti: ikki karra jahon chempioni sportni pastga qarab emas, tepaga qarab ketishi kerak.
Endi so‘z Alonso tomonda. U sabrini yana bir necha yilga cho‘zadimi yoki bu sahnadan o‘zi xohlagancha, lekin boshqa ranglarda tushib ketadimi? Формула 1 mavsumi shu savol soyasida davom etadi.
