Bruno Guimaraes Arsenalga o‘tishni xohlaydi: Newcastle vaziyatni boshqarishga harakat qilmoqda

Newcastle yozgi oynaning eng nozik nuqtasida turibdi. Klub kapitani, muxlislarning sevimlisi Bruno Guimaraes ketishni xohlayapti, asosiy manzil sifatida esa aynan Arsenalni ko‘rsatgan. Biroq shimoliy-sharqdagi klubni eng ko‘p bezovta qilayotgan narsa bu emas. Ularni asabiylashtirayotgan narsa — London jamoasining uslubi.

Sky Sports News’ning shimoliy-sharq bo‘yicha muxbiri Keith Downie ma’lumotiga ko‘ra, Bruno allaqachon klub rahbariyatiga bu yozda Arsenalga o‘tish istagini bildirgan. Shunga qaramay, Newcastle hali ham London klubi bilan bevosita muzokara olib bormagan. Hech qanday rasmiy qo‘ng‘iroq, hech qanday to‘g‘ridan-to‘g‘ri taklif yo‘q.

Arsenal hozircha oraliq shaxslar, vositachilar orqali sharoitlarni o‘rganish bilan cheklanmoqda. Aynan mana shu yondashuv Newcastle’ni jiddiy ranjitgan. Klub rahbariyati uchun bunday “masofadan turib” qiziqishdan qanchalik rostakamiga jiddiy ekani ayon emas.

Newcastle: sotish niyati yo‘q, ammo o‘yinchi bosim qilmoqda

Downie aytishicha, Newcastle Bruno’ni sotishni istamayapti. Klub allaqachon Sandro Tonali’ni Tottenham’ga 100 million funtga qo‘yib yuborgan, shuning ortidan yana bir markaziy tayanchni yo‘qotish – sport nuqtayi nazaridan ham, kiyinish xonasi ruhiyati nuqtayi nazaridan ham og‘ir zarba bo‘ladi.

Shunga qaramay, o‘yinchining o‘zi qat’iy. U sovrinlar istayapti. U faoliyatini faqat Carabao Cup bilan yakunlashni xohlamaydi. Newcastle bilan yana bir kubok yutish ehtimoli bor, lekin u uchun bu yetarli emas. U liga chempionligi, katta sahnadagi unvonlarni xohlaydi. Shunday paytda Arsenal nomi uning uchun mantiqiy qadamga o‘xshaydi.

Newcastle esa, Downie ma’lumotiga ko‘ra, vaziyatni o‘z qo‘liga olishga uringan. Klub London tomoniga o‘zi murojaat qilgan: “Siz rostdan ham bu futbolchini olmoqchimisiz? Biz sizdan hech narsa ko‘rmadik”, degan mazmunda signal yuborgan. Hozircha javob – sukut.

Vositchilar o‘yini esa vaziyatni yanada murakkablashtiryapti. Hammasi agentlar atrofida aylanayotgani, rasmiy pozitsiyalarning yo‘qligi futbolchini ham, klubni ham bezovta qilmoqda. Aynan shuning uchun Bruno o‘z variantlarini ko‘rib chiqishni istayotganini bildirgan.

Narx: sakkizdan boshlanadigan summa

Pul masalasiga kelganda, Newcastle pozitsiyasi aniq. Bruno Guimaraes klub uchun arzon o‘yinchi emas. Downie bahosiga ko‘ra, uning transferi “sakkiz” raqamidan boshlanishi kerak – ya’ni kamida 80 million funt atrofida. Bundan pastiga gap bo‘lishi qiyin.

Klub yaqinda Sandro Tonali uchun 100 million funt olganini eslatish kerak. Bruno undan uch yosh katta, shu sababli bozor qiymati biroz pastroq bo‘lishi tabiiy. Ammo Newcastle braziliyalikni 2022-yilda 40 million funtga olganini inobatga olsak, klub aniq katta foyda kutyapti.

Shu bilan birga, klub ichida ham bir haqiqatni yaxshi bilishadi: o‘yinchi ketishni qat’iy istasa, uni ushlab qolish tobora mushkul bo‘ladi. Rasmiy pozitsiya “sotilmaydi” bo‘lsa-da, futbolchining kayfiyati va bozor bosimi baribir o‘z ta’sirini ko‘rsatadi.

Arsenal esa hanuzgacha konkret qadamsiz. Hech qanday aniq taklif, faqat oraliq suhbatlar. Newcastle uchun esa bu jiddiylik belgisi emas. Ular faqat real, yozma yoki og‘zaki, lekin to‘g‘ridan-to‘g‘ri taklif kelganidagina bu qiziqishni haqiqiy deb qabul qilishga tayyor.

Newcastle yozgi qayta qurilish ichida

Bruno atrofidagi shov-shuv klubning umumiy yozgi siyosati fonida yanada keskinroq ko‘rinadi. Newcastle allaqachon katta o‘zgarishlar ichida. Anthony Gordon Barcelona’ga 69,3 million funt evaziga sotildi, undan keyin Tonali ham Tottenham’ga 100 million funtga ketdi.

Bunday chiqimlar bilan bir qatorda, kirimlar ham bor: Bazoumana Toure, Sean Steur va Ewen Jaouen uchun jami 83,5 million funt sarflandi. Klub tarkibni qayta shakllantiryapti, moliyaviy qoidalar doirasida raqobatbardosh bo‘lishga urinmoqda. Shunday paytda yana bir tayanch figura – kapitan Bruno’ning ketishi butun loyihani izdan chiqarishi mumkin.

Arsenalning sokin bozori va Guimaraesning jozibasi

London tomonida esa manzara boshqacha. Arsenal hali katta transferni yakunlamadi. Maqsadlardan biri bo‘lgan Morgan Rogers kutilmaganda Aston Villa’dan Chelsea’ga o‘tib ketdi. Bu yo‘qotish fonida Bruno Guimaraes yanada qimmatli nishonga aylanadi.

Uning o‘yin profili – tayanch, yarim himoya markazida to‘liq to‘plamga ega futbolchi. Yetakchilik, tajriba, jismoniy chidamlilik, pressing ostida to‘pni ushlab qolish va hujumni boshlash qobiliyati. Bularning barchasi Arsenal kabi chempionlikka intilayotgan jamoa uchun juda muhim.

Bruno allaqachon Braziliya terma jamoasi bilan Jahon chempionatida ishtirok etgan, Newcastle safida barcha musobaqalarda 195 o‘yin o‘tkazib, 31 ta gol urgan. Bu raqamlar uning nafaqat ijodkor, balki natija beruvchi futbolchi ekanini ko‘rsatadi.

Saga davom etadi

Downie ta’riflaganidek, bu voqea tez tugaydigan ko‘rinmaydi. Hikoya cho‘zilishga mahkum. Bir tomonda – kapitanni ushlab qolishni istagan, lekin bozor va o‘yinchi istagini inkor eta olmaydigan Newcastle. Ikkinchi tomonda – konkret qadamsiz, ammo kuchli qiziqish bilan kuzatayotgan Arsenal.

Endi bitta savol qoladi: London klubi nihoyat stolga pul qo‘yadimi yoki bu yoz ham Emirates’da katta markaziy yarim himoyachi kelishini kutib yashaydigan mavsumlardan biriga aylanadimi?