Bundesliga’ni uyg‘onishga chaqirgan Bayern rahbari
Germaniya futboli o‘z chegaralariga tiqilib qolganmi? Bayern Munich marketing direktori Rouven Kasper bu savolga javobni allaqon topgandek: ha, vaqti keldi, deb bong uryapti.
Bavariya klubi o‘zining Osiyodagi o‘ninchi yozgi safari arafasida turgan bir paytda, Kasper butun Bundesliga’ni ochiq tanqid ostiga oldi. Uningcha, nemis klublari global sahnada o‘zini ko‘rsatish borasida raqobatchilaridan ancha ortda qolmoqda.
Bu mutlaqo yetarli emas
Kasper “Sky Sports” bilan suhbatda raqamlarga emas, mentalitetga zarba berdi. Uning aytishicha, mavsum tugagach, atigi bir nechta nemis jamoasi chet elga chiqqan.
U aniq misollarni sanab o‘tdi: mavsum yakunida faqat Leipzig xorijiy safarga otlandi, yoz bo‘yi esa butun dunyo bo‘ylab sayohat qilayotganlar – Bayern Munich va Borussia Dortmund xolos. Paderborn esa faqat sentabrda AQShga uchadi.
Kasperning hukmi qisqa va keskin bo‘ldi: bu Bundesliga uchun juda kam.
U klublarni strategik fikrlashga majbur qiladigan gapni ochiq aytdi: nemis jamoalari marketing va brend qurish bo‘yicha rejalarini qayta ko‘rib chiqishi, ichki bozor bilan cheklanib qolmasligi kerak.
Angliya dunyoni kezmoqda, Germaniya-chi?
Gap Angliya Premer-ligasiga kelganda, Kasper ohangini yanada keskinlashtirdi. U ingliz klublarining butun dunyo bo‘ylab muntazam safarlari, turli qit’alardagi o‘quv-mashg‘ulot yig‘inlari va tijoriy o‘yinlarini eslatib, shunday dedi: agar nemislar raqobatlashmoqchi bo‘lsa, o‘tirib bo‘lmaydi.
Uning fikri aniq: uyda qolib, keyin tushum kamayganidan nolish – mantiqsizlik. Hech narsa qilmasangiz, hech narsa olmaysiz. Nemis futboli chegaradan chiqishi, o‘zini ko‘rsatishi, tomoshabinga o‘zi borishi kerak.
Bu nafaqat obro‘, balki tirik pul masalasi ham.
Televizion tushumlar eriyapti
Kasper faqat safarlar haqida emas, televizion bozor haqida ham ogohlantirdi. U ayrim asosiy bozorlar, xususan AQSh va Yaponiya bo‘yicha media daromadlari pasayayotganini “achinarli, lekin haqiqat” sifatida ta’rifladi.
Aynan shu pasayish, uningcha, liga rahbariyatini hushyor bo‘lishga majbur qilishi kerak. U ligani klublar bilan birgalikda aniq strategik mexanizmlar ishlab chiqishga chaqirdi. Chunki Bayern Munich hamma joyga yolg‘iz bora olmaydi, butun brendni o‘zi ko‘tarib yurishi mumkin emas.
Bugungi kunda Bundesliga’ning xalqaro shartnomalardan oladigan televizion huquqlar bo‘yicha tushumi 218 million yevro atrofida. Homiylik va boshqa kelishuvlar qo‘shilganda bu raqam 302 million yevroga chiqadi.
Taqqoslash esa og‘riqli: Angliya Premer-ligasi bundan qariyb o‘n baravar ko‘p ishlab topyapti. Ispaniya chempionati esa uch baravar ko‘p daromad olmoqda. Bu farq – faqat sport natijalariga emas, aynan global marketing va borliqni egallash strategiyasiga bog‘liq.
Osiyo safari: Jeju oroli va Hong Kong
Shu fon’da Bayern o‘z ishini qilmoqda. Klubning yozgi Osiyo safari Janubiy Koreyadagi Jeju oroli va Hong Kongni qamrab oladi, safar 8-avgustgacha davom etadi.
Yo‘l-yo‘lakay ikki o‘rtoqlik uchrashuvi rejalashtirilgan: 4-avgust kuni Jeju SK bilan, 7-avgust kuni esa Angliya vakili Aston Villa bilan o‘yin.
Bu faqat sport formasi uchun sinov emas. Bu – bozorni kengaytirish, yangi muxlislarni jalb qilish, brendni his qilish imkonini muxlisning o‘z uyiga olib borish harakati.
Bayernning xaritasi: ikki Amerika va Janubi-Sharqiy Osiyo
Kasper suhbatni klubning uzoq muddatli rejalariga burarkan, maqsadli bozorlarni aniq belgilab berdi. Ikki Amerika qit’asi allaqachon e’tiborda: hozirgacha asosan Shimoliy va Markaziy Amerikaga urg‘u berilgan bo‘lsa, endi Janubiy Amerika tobora jozibador bo‘lib bormoqda.
Osiyo bo‘yicha ham rasm aniq: Bayern endi Hindiston, Indoneziya va Tailandga alohida e’tibor qaratmoqchi. U yerda yangi loyihalar, yangi tashabbuslar, yangi hamkorliklar kutilyapti.
Savol esa ochiq qoladi: Bayern va Dortmund dunyo kezayotgan bir paytda, qolgan Bundesliga klublari qachon uyg‘onadi – va Germaniya futboli global poygada yana qachon tezlikni oshiradi?
