Cadillac’da yozgi portlash: Lowdon ketdi, Budkowski keladi

Zandvoortdagi startga atigi bir hafta qolganida paddokni eng kutilmagan xabar larzaga keltirdi: Cadillac Graeme Lowdon’ni iste’foga chiqardi va uning o‘rniga sobiq Alpine rahbari Marcin Budkowski’ni olib keldi.

Debyut mavsumining yarmida, 11 ta poygadan so‘ng bunday keskin burilish – yangi jamoa uchun kamdan-kam uchraydigan qaror. Ayniqsa, Cadillac boshidan boshlab bu yil orqa qatorlarda o‘rganish va qurilish mavsumi bo‘lishini ochiq aytib kelayotgan bir paytda.

Bu qarorning ortida Cadillac F1 bosh direktori Dan Towriss turibdi. U Budkowski bilan birga ommaviy axborot vositalari oldiga chiqib, nega aynan hozir, nega shunday va Cadillac keyingi bosqichga qanday sakramoqchi ekanini ochib berdi.

“Tor deraza” – nega aynan hozir Lowdon bilan xayrlashishdi?

Formula 1’da so‘nggi yillarda jamoa rahbarlari almashinuvi odat tusiga kirgan bo‘lsa-da, mavsum o‘rtasida iste’foga chiqarish hanuz keskin qadam hisoblanadi. Mercedes bundan mustasno, 2022 yil oxiridan beri deyarli barcha jamoalar tepasida almashinuv bo‘ldi, lekin baribir bu darajada to‘satdan emas.

Lowdon atrofida mish-mishlar yo‘q edi. Cadillac hali 11 ta poygani ortda qoldirdi, xolos. Natijalar ham kutilganidek – orqa tomonda, o‘rganish rejimida. Shunga qaramay, qaror keskin bo‘ldi.

Towrissning so‘zlariga ko‘ra, dastlabdan reja bor edi: Lowdon bir bosqichni qurib beradi, keyingi sakrash uchun esa boshqa rahbar keladi. Faqat bu almashinuv kutilganidan ertaroq sodir bo‘ldi.

U ochiq aytdi: bu uning shaxsiy qarori.

Uning fikricha, Cadillac hozir “butunlay yangi va innovatsion narsa qurish” uchun juda qisqa, noyob oynaga ega. Eski modelni ko‘chirib, keyin uni yaxshilash – bu yo‘l emas. Shuning uchun ham vaqtni cho‘zish emas, aynan hozir harakat qilishni tanlashdi.

Towriss bu qarorni so‘nggi haftalardagi natijalar yoki “bolalik kasalliklari” bilan bog‘lashni istamadi. U uchun asosiy narsa – kelajakdagi aniq yo‘l, rivojlanish sur’ati va bularning hammasi egalar ambitsiyasiga mos kelishi.

Budkowski uchun birinchi vazifa: ishonchlilik – “juda, juda shoshilinch”

Qog‘ozda Cadillac uchun og‘ir mavsum kutilgani ma’lum edi. Ammo MAC-26 bilan bog‘liq ishonchlilik muammolari bu jarayonni yanada og‘irlashtirdi. Yozgi tanaffusga qadar yetti poygada atigi bir marta ikkala bolid ham marragacha yetib kelgan. Tormozlarning qizib ketishi – jamoani ta’qib qilayotgan asosiy bosh og‘riq.

Endi bu muammolarni hal qilish Budkowski zimmasida. U dushanbadan zavodda ishni boshlaydi va birinchi kundanoq ustuvor vazifani aniq belgilab oldi: ishonchlilikni zudlik bilan tartibga solish.

U yangi jamoa uchun xatolar tabiiy ekanini tan oldi: yangi guruh, birga o‘rganish, birga yiqilish. Formula 1’da xato – o‘rganishning ajralmas qismi. Lekin bu xatolar bir narsani o‘g‘irlab ketmoqda: masofa. Poyga kilometrlarini.

Poyganing har bir aylanasi – ma’lumot. Har bir yakunlangan grand-pri – bolidni chuqurroq tushunish demak. Cadillac esa aynan mana shu boylikdan mahrum bo‘lib qolyapti. Shuning uchun Budkowski buni “juda, juda shoshilinch” hal qilinishi kerak bo‘lgan masala sifatida ko‘radi.

Uning fikri keskin: agar olib kelinayotgan yangilanishlarni poygada ishlata olmasangiz, rivojlanishning ham ma’nosi yo‘q. Demak, avval ishonchlilik, keyin yangilanishlardan maksimal foyda.

Perez kelajagi: Williams mish-mishlari fonida qat’iy ohang

Kadrlar siyosatida Cadillac ancha konservativ yo‘lni tanlagan: tajribaga suyanish. Sergio Perez va Valtteri Bottas – 500 dan ortiq start va 16 g‘alabaga ega juftlik. Yangi jamoa uchun bunday bagaj – katta kafolat.

Hozircha ustunlik Perez tomonida. Meksikalik qaytganidan beri Bottasdan ko‘ra ko‘proq hayrat uyg‘otmoqda va bu uning bozorini yana jonlantirdi. 2027 yil uchun boshqa variantlar, jumladan, Carlos Sainz boshqa tomonga yo‘l olsa, Williams bilan bog‘liq taxminlar paydo bo‘ldi.

Towriss bu shovqindan xabardor, lekin ohangi qat’iy: Cadillac Perezni ushlab qolishiga ishonadi.

U Checo’ni “jamoa uchun ulkan aktiv” deb atadi, uning ishlashini, bosimni va jamoani oldinga surayotganini alohida ta’kidladi. Va eng muhimi – Williams atrofidagi mish-mishlar ularni “bir soniyaga ham chalg‘itmayotgani”ni aytdi.

Cadillac o‘z navbatida yoshlar bozorida ham tilga olinmoqda. Eng ko‘p tilga olinayotgan nomlardan biri – Ferrari tizimidagi Rafael Camara. 21 yoshli braziliyalik – amaldagi F3 chempioni, ilk F2 mavsumida esa uchinchi o‘rinda ketmoqda.

Towriss hozircha o‘z juftligidan mamnun. U “ikki tajribali haydovchidan juda xursand” ekanini aytar ekan, shu bilan birga eshikni butunlay yopmadi. Formula 1’da hamma narsa o‘zgarishi mumkin. 2027 yil uchun hozircha o‘zgarish rejalashtirilmagan, lekin bu sportda “hech qachon” degan so‘z yo‘q.

Yosh haydovchilar haqidagi mish-mishlarga kelsak, u ularni qat’iy rad etdi: hozircha bular “asosga ega emas” va Cadillac bu bilan shug‘ullanmayapti.

Budkowski qaytishi: FIA’dan Cadillac’gacha – “qoidalar o‘zgargan, o‘yin esa o‘sha-o‘sha”

Marcin Budkowski uchun bu – Formula 1 jamoasidagi birinchi katta lavozimga qaytish. U 2022 yil boshida Alpine’dan ketganidan beri paddokni tark etmadi, lekin televideniye orqali, Polsha telekanali uchun ishladi.

Endi u beshinchi turli jamoada ish boshlaydi. Uch yil davomida FIA texnik bo‘limini boshqargan, so‘ng Renault/Alpine’da rahbarlik qilgan mutaxassis sifatida u paddokni har ikki tomondan ko‘rgan: qoidalar yaratiladigan xonadan ham, ularni cheklov emas, qurol sifatida ishlatadigan garajlardan ham.

To‘rt yillik tanaffusdan so‘ng u qaytib kelib, bir narsani aniq ko‘rdi: kurash yanada shafqatsizlashgan. Har bir jamoa – yuqori darajada, har bir bo‘lim – professionallikning yuqori nuqtasida.

Qoidalar o‘zgargan, lekin o‘yin mohiyatan o‘sha-o‘sha. Uning roli ham alohida texnik bandlar bilan emas, balki katta rasm bilan bog‘liq bo‘ladi. Savol bitta: kelajakdagi reglamentlarni Cadillac foydasiga qanday burish mumkin?

Budkowski bu borada tajribaga ega. FIA davridan biladi: reglamentlar sport manfaati uchun yoziladi, lekin har bir jamoa ularni o‘z foydasiga talqin qilishga urinadi. Kim bu o‘yinda ustun kelsa, trekda ham yutadi.

U bugungi davrni aniq ta’rifladi: endi hamma joyda eng yaxshi bo‘lish kerak. Har bir detalga e’tibor. Cheklangan byudjet davrida esa xatoni pul bilan yopib bo‘lmaydi. Mablag‘ bilan tezlik sotib olish davri tugagan.

Cadillac maqsadi: “shunchaki qatnashuvchi” emas, g‘olib bo‘ladigan tashkilot

General Motors yelkasiga tayangan Cadillac F1 – bu shunchaki yangi jamoa emas, balki uzoq muddatli loyiha. GM kelajakda o‘z dvigatelini yaratmoqchi. Demak, bu loyiha infratuzilma, texnologiya va resurslar nuqtai nazaridan ham chuqur ildiz otishi kerak.

Towriss buni ochiq aytadi: ular bu yerga shunchaki ishtirok etish uchun kelmagan. Maqsad – g‘alaba qozonadigan, tizimli ravishda yuqoriga intiladigan tashkilot qurish. Hozircha bu cho‘qqidan uzoq, lekin yo‘l aniq.

U Formula 1’dagi katta o‘zgarishlarni sanab o‘tdi: reglamentlar yangilanmoqda, jamiyat esa sun’iy intellekt bilan yangi davrga kirib bormoqda. AI asta-sekin paddokka ham kirib kelmoqda. Hozircha bu jarayon endi boshlanmoqda, lekin ertangi kun jamoasi bugungidan mutlaqo boshqacha ko‘rinishda bo‘ladi.

Shuning uchun Cadillac uchun vazifa ikki qavatli: qisqa muddatda mavjud tizimni yaxshilash, uzoq muddatda esa butun tuzilmani kelajakdagi Formula 1 talablari va texnologiyalari uchun moslab qayta shakllantirish.

Savol endi bitta: Budkowski boshchiligidagi Cadillac bu tor “imkoniyat derazasi”ni haqiqiy sakrash maydonchasiga aylantira oladimi yoki bu yozgi portlash shunchaki yangi loyihaning og‘ir, lekin tabiiy o‘sish og‘rig‘i bo‘lib qoladimi?