Carrickning katta rejasi: 2028-yilda 21-chempionlikni ko‘tarish
Old Trafford atrofi yana orzu bilan to‘lgan. Bu safar orzuning markazida maydonda emas, chetda turgan bir odam — Michael Carrick. U o‘zi besh marta qo‘l ko‘targan chempionlikni endi bosh murabbiy sifatida qayta keltirishni maqsad qilgan.
U biladi: bu sakrash bo‘ladi. Og‘ir sakrash. Lekin u “imkonsiz” so‘zini ishlatmaydi.
Manchester United 2028-yilda, klubning 150 yillik yubileyida, 21-chempionlikni ko‘tarishni reja qilgan. Bu uzoq masofa. Ammo Carrick allaqachon yo‘lga tushib bo‘lgan: qiyin sharoitda yanvar oyida jamoani qabul qilib olib, uchinchi o‘ringa olib chiqqan murabbiy endi shu marrani minimum deb biladi.
“Biz evolyutsiya qilmoqchimiz”
Carrick maydonda yillar davomida o‘zi boshqargan hudud – markaziy chiziq – bugun ham uning fikrida. Ammo bu safar gap o‘z o‘yini haqida emas, jamoaning butun o‘sish jarayoni haqida.
“Biz jamoa sifatida evolyutsiya qilmoqchimiz”, – deydi u Hull safaridan oldingi matbuot anjumanida.
United tarkibida yoshlar ko‘p. Carrick ularni alohida-alohida o‘stirishni, shu orqali butun jamoani oldinga tortishni maqsad qilgan. Ketma-ket g‘alabalarning ta’mi, odatga aylangan yutuq hissi — murabbiy aynan shuni urg‘ulaydi. Bu klubda o‘yinchilar nimaga erishayotganini his qilishi, buning uchun nimalarni berish kerakligini aniq bilishi shart.
U so‘zini cho‘zmaydi: bu jamoa yana Champions League yo‘llanmasi uchun kurashadi. Shunchaki kurashmaydi, o‘sha marraga yetib borishni talab sifatida qo‘yadi.
“Biz yana Champions League o‘rinlari uchun finish qilishni xohlaymiz, shubhasiz. Bu katta sinov. Bu o‘rin uchun kurashayotgan jamoalar ko‘p. O‘tgan mavsum bunga erishdik, endi yana shuni nishonga olishimiz, mavsum davomida bosimni ushlab turishimiz kerak”, – deydi u.
Uch bo‘limli reja oddiy ko‘rinadi, ammo murabbiy uchun bu manzara aniq: kuchli start, sovuq oylarni bardosh bilan o‘tish va kuchli finish. Qolganini jadval hal qiladi.
Midfild – yangi Unitedning yuragi
Unitedning yangi mavsumdagi taqdiri bitta chiziqqa juda qattiq bog‘langan: markaz. Carrick buni yashirmaydi ham.
Casemiro ketdi. Manuel Ugarte safdan chiqqan. Bu bo‘shliqni yopish uchun klub yozda Youri Tielemans va Andrey Santosni olib keldi, endi esa Brighton yarim himoyachisi Carlos Baleba bilan kelishuv ustida ishlamoqda. Raqobat kuchaymoqda, lekin murabbiy bu tarkibni “juda yaxshi balansli” deb ataydi.
U uchun midfild – shunchaki bo‘g‘in emas, butun jamoaning poydevori.
“Jamoaning poydevorini aynan shu chiziq beradi, deb hisoblayman. Bir o‘yinni boshidan oxirigacha barqaror o‘ynash, bir necha hafta, hatto oylar davomida bir xil darajada qolish uchun markaz mustahkam bo‘lishi kerak”, – deydi Carrick.
U “spina” tushunchasini yaxshi biladi. Yillar davomida eng kuchli jamoalar aynan shu yo‘nalishda qurilgan: darvozabon, markaziy himoya, markaziy yarim himoya, hujumchi. Carrick bugungi Unitedda aynan shu umurtqa paydo bo‘layotganiga ishongan.
“Yillar davomida eng katta jamoalarga qarasangiz, hammasida jamoaning o‘qi juda kuchli bo‘lgan. Biz buni yaxshi tushunamiz va hozir jamoamizning umurtqasi yaxshi, deb o‘ylayman”, – deya qo‘shadi u.
Murabbiylikdan ko‘proq narsa
Carrick o‘zini faqat transferlar bilan ishlayotgan boshqaruvchi sifatida emas, murabbiy sifatida ko‘radi. U maydonga tushayotgan har bir futbolchini alohida loyiha deb biladi.
“Biz turli yo‘llar bilan yaxshilana olamiz: mashg‘ulot orqali, yigitlarga yordam berish, ularni rivojlantirish orqali. Hozir yaxshi holatdamiz”, – deydi u.
Bu so‘zlar ortida bir haqiqat yotadi: United hali chempionlik uchun tayyormi yoki yo‘qmi, bu mavsum javob beradi. Lekin Carrick uchun hozir eng muhim narsa — yo‘lning o‘zi. Champions League yo‘llanmasi bu yo‘lda majburiy bekatga aylanib ulgurgan.
Savol bitta: bu poydevor 2028-yilga borib, 21-chempionlikni ko‘tarishga yetadimi?
