Cincinnati tuni: Venus va Tsitsipasning qiyinchiliklari
Cincinnati kortlarida kecha avlodlar almashinuvi yanida ravshan ko‘rindi. Bir tomonda tarix yozgan afsona, ikkinchi tomonda esa o‘z izini endi chiza boshlayotgan yangi to‘lqin.
Venus uchun og‘ir haqiqat
46 yoshli Venus Williams yana bir marta o‘tmish shon-shuhrati bilan hozirgi holati o‘rtasidagi keskin tafovutni his qildi. Kolumbiyalik Emilia Arango uni 6-2, 6-2 hisobida atigi 66 daqiqada mag‘lub etib, o‘tgan yil iyulidan buyon davom etayotgan mag‘lubiyatlar seriyasini 14 o‘yinga yetkazdi.
Yetti karra “Grand Slam” chempioni, hozirda reytingda 615-o‘rinda turgan Venus bu turnirga yana bir “wild card” orqali kirdi. Bir paytlar aynan shu Cincinnati kortlarida yarim finalga chiqqan edi, oradan o‘n ikki yil o‘tdi. Endi esa bu mavsumda tashkilotchilar bergan bepul yo‘llanma bilan maydonga tushib, 11-o‘yinda ham g‘alaba topa olmadi.
Uning har bir urishi ortida tajriba, lekin har bir kechikkan qadamida vaqtning ayovsizligi ko‘rindi. Arango esa ritmni qo‘ldan bermadi, tezlikni oshirdi, Venusning mudofaasidagi bo‘shliqlarni birin-ketin topdi. Natija – bir tomonlama hisob va sahnaga yangi ismning dadil chiqishi.
Chexlar to‘qnashuvi: Bejlekning darsi
Ayollar turnirida yana bir keskin hisob: chexiyalik Sara Bejlek vatandoshi, 2016-yil chempioni Karolina Pliskovani 6-0, 6-2 hisobida taslim etdi. Pliskova bu kortlarni yaxshi biladi, bu yerda kubok ko‘targan. Ammo bu safar u o‘yinga kirib ulgurmay, Bejlekning agressiv va aniq o‘yiniga dosh bera olmadi.
Hisobning o‘zi hammasini aytib turibdi: tajribali sobiq chempionga atigi ikki gem.
Dimitrov qo‘ldan chiqargan ustunlik
Erkaklar bahsida e’tibor markazida bo‘lganlardan biri – 2017-yil g‘olibi Grigor Dimitrov. U ham kechani xotirjam yakunlash imkonini qo‘ldan chiqarganlardan bo‘ldi.
Argentinalik Sebastian Baezga qarshi o‘yinda Dimitrov birinchi setni 6-1 hisobida yutdi, uchinchi setda esa 4-1 oldinda borayotgan edi. Shundan keyin hammasi qulab tushdi. Baez ketma-ket besh gem yutdi va uch setlik jangni 1-6, 6-3, 6-4 bilan o‘z foydasiga yakunladi.
35 yoshli bolgariyalik, reytingi 138-o‘ringa tushib ketgan, bu yerda ham “wild card” bilan o‘ynayotgan edi. U besh yildan beri Cincinnati kortlarida g‘alaba ko‘rmagan, bu safar ham seriya uzilmadi. Ustunlikni saqlab qolish, bosim ostida sovuqqonlik – bir paytlar uning kuchli tomoni edi. Endi esa aynan shu fazilatlar yetishmayotgani ayon bo‘lib qoldi.
Baez esa navbatdagi bosqichda amerikalik iste’dod Learner Tien bilan to‘qnash keladi. Tien bu hafta Montrealda yarim finalga qadar yetib kelib, o‘z nomini tanita boshlagan.
Tsitsipas: g‘alaba, lekin asablar hisobiga
Kechaning eng dramatik o‘yinlaridan biri Stefanos Tsitsipas va fransiyalik Valentin Royer o‘rtasida bo‘ldi. Bir paytlar uchinchi raqamli tennischi bo‘lgan yunon hozirda uzoq davom etgan inqirozdan so‘ng 49-o‘ringa tushib ketgan. Shunga qaramay, u 7-6 (7/4), 7-5 hisobida g‘alaba qozondi, ammo bu raqamlar ortida qattiq asab sinovi yotibdi.
Tsitsipas bir set va 5-2 hisobida oldinda borar, g‘alaba uchun servisga kelgandi. Hammasi tugayotgandek edi. Royer esa taslim bo‘lmadi: ikkita match-poyntni saqlab qoldi, hisobni 5-5 ga tenglashtirdi va Tsitsipasni ichki kurashga majbur qildi.
Shu pallada yunon tennischisi o‘zini yo‘qotib qo‘yishi mumkin edi. Lekin ikki gemdan so‘ng u nihoyat oltinchi match-poyntini ishga soldi va ikki soatlik o‘yinga nuqta qo‘ydi. U butun o‘yin davomida tez-tez oldinga oshib, tarmoq yonida o‘ynashga intildi, qisqa to‘plarni ichkarida “jazolashga” urindi. Aynan shu hujumkor yondashuv unga kerakli lahzalarda ustunlik berdi.
Tsitsipas o‘zini yana yuqori darajaga qaytish yo‘lida sinab ko‘rayotgan bir paytda, bu g‘alaba unga nafaqat reyting ochkolari, balki ruhiy tayanch ham berdi. Endi u ikkinchi raqamli raketka Felix Auger-Aliassimega qarshi maydonga tushadi. Bu qarama-qarshilik uning hozirgi darajasi haqida aniqroq tasavvur beradi.
Qolgan natijalar: Hurkacz va Berrettini yo‘lga tushdi
Kun yakunida yana ikki muhim ism keyingi bosqichga yo‘l oldi. 2023-yilgi yarim finalchi Hubert Hurkacz “lucky loser” maqomidagi Sho Shimabukuro ustidan 6-2, 6-4 hisobida ishonchli g‘alaba qozondi. U o‘yinni boshidanoq nazorat qildi, servisdagi ustunligi raqibga deyarli imkon qoldirmadi.
Matteo Berrettini esa jarohatlardan keyingi qaytishini davom ettirmoqda. Wimbledon’dan beri atigi ikkinchi rasmiy uchrashuvini o‘tkazgan italiyalik Thomas Droguet ustidan 3-6, 6-2, 6-4 hisobida g‘alaba qozondi. Birinchi setni boy bergach, u kuchli servis va agressiv forehand hisobiga o‘yinni o‘zgartirdi va uchinchi setda zarur bo‘lgan yagona breykni qo‘lga kiritdi.
Cincinnati bu hafta yana bir bor katta savolni o‘rtaga tashlayapti: eski yulduzlar qanchaga chidashadi va yangi avlod bu bo‘shayotgan sahnani qanchalik tez egallaydi? US Open boshlanishiga bir haftalar qolgan bir paytda javoblar kort ustida, har bir gem, har bir breykda yozilmoqda.
