Cody Gakpo: Amsterdamdan Anfieldgacha yo‘li
Shvetsiya darvozasiga ikki marta yo‘l topganidan so‘ng, Cody Gakpo maydonni tark etar ekan, savol ko‘p, javob esa qisqa bo‘ldi. Niderlandiya terma jamoasidagi roli bilan Liverpooldagi vazifasi o‘rtasidagi farq haqida so‘rashdi.
“Yaxshi savol. Albatta, biroz boshqacha”, dedi u. Keyin biroz sukut, yana bir jumla: “Murabbiy meni qayerda ko‘rishni xohlashi, menga berilgan erkinlik boshqacha”. Shunda to‘xtadi. Ko‘proq gapirmaslikni tanladi.
Ammo uning atrofida gapiradigan mavzu yetarli.
Chap qanotga yana navbat keldi
Gakpo Shvetsiyaga qarshi o‘yinida yaltiragan bir haftada Liverpool yana bir chap qanot futbolchisini olib keldi. Osasuna klubi qanot hujumchisi Victor Munoz 34,5 million funt evaziga Anfieldga ko‘chib o‘tdi. Klub yana bir qanot o‘yinchisi – atigi 19 yoshli, ikkala qanotda ham harakat qila oladigan Yan Diomande uchun RB Leipzig bilan 86 million funtlik paket bo‘yicha muzokara yuritmoqda.
Ikki yangi nom, ikkisi ham asosan Gakpo o‘ynaydigan hududda. Savol tabiiy: bu 27 yoshli hujumchining Liverpooldagi kelajagiga qanday ta’sir qiladi?
Arne Slot boshchiligidagi 2024-25 yilgi chempionlik mavsumida Gakpo barcha musobaqalarda 49 o‘yinda 18 ta gol urdi, yetti marta golli uzatma berdi. Bu natijalar unga o‘tgan yozda Anfieldda uzoq muddatli shartnoma olib keldi. U bundan chin dildan mamnun edi.
Keyingi mavsum esa boshqacha tus oldi. Uchta o‘yinga ko‘proq maydonga tushdi, lekin raqamlar pasaydi: to‘qqiz gol, olti golli uzatma. Jamoaviy o‘yin ham izdan chiqqan, u yolg‘iz emas edi. Baribir, bu ko‘rsatkichlar Gakpo uchun yetarli emas. U buni yaxshi biladi.
Kerkez bilan sinov yili
Gakpo o‘zini chap qanotda eng qulay his qiladi. 2025-26 yilgi mavsumda aynan shu chiziqda Milos Kerkez bilan hamkorlik sinovdan o‘tdi. Qog‘ozda bu juftlik xavfli ko‘rinardi, amalda esa bir-birini tushunish, ayniqsa Kerkezning tez-tez amalga oshiradigan qo‘shimcha yugurishlarini to‘g‘ri baholash borasida kamchiliklar ko‘rinib qoldi.
Mavsum o‘tgan sari ular o‘rtasidagi aloqa yaxshilandi. Endi esa Kerkez sobiq murabbiysi Andoni Iraola bilan yana birlashdi. Bournemouth davridagi tanish tizim, tanish talablar. Vengriyalik chap qanot himoyachidan kelasi mavsumda keskin o‘sish kutilyapti.
Bu – Gakpo uchun imkoniyat. Yaxshi ishlangan chap chiziq, aniq kelishilgan yugurishlar, bo‘sh zonalarga kirish – bu uning o‘yini uchun ideal sahna.
Raqamlar va ishonch
Liverpool tarixida 50 ta gol chegarasini zabt etgan ikkinchi niderlandiyalik futbolchi – Dirk Kuytdan keyin – aynan Gakpo bo‘ldi. 180 o‘yinda 50 gol. Sog‘lom bo‘lsa, deyarli doim asosiy tarkibda.
Klub uni hanuz Premier League darajasida isbotlangan, turli rolda foyda keltira oladigan hujumchi sifatida ko‘radi. Ayniqsa, Hugo Ekitike to‘pig‘idagi og‘ir jarohat sabab 2027 yilgacha safdan chetda qolishi mumkin bo‘lgan bir paytda Gakponing markaziy hujumchi sifatida o‘ynay olishi Iraola uchun muhim variant.
Mohamed Salah ketganidan so‘ng Anfieldda kamida yana bitta hujumchi transferi kutilmoqda. Diomande bo‘yicha qiziqish aynan hozir kuchaygan. Yana bir tomonda – iqtidorli yosh Rio Ngumoha, kelasi mavsumda maydonda ko‘proq ko‘rinish olishi taxmin qilinmoqda. Florian Wirtz ham o‘tgan mavsumda ba’zan chapdan o‘ynadi, hozir Germaniya terma jamoasida ham shu rolda ko‘rinmoqda.
Iraola Wirtzni qaysi pozitsiyada ko‘rishni xohlashi – Gakpo kelajagini belgilab berishi mumkin bo‘lgan omillardan biri. Agar Wirtz markazga yaqinroq joylashtirilsa, chap qanotdagi raqobat boshqacha ko‘rinish oladi. Agar u muntazam chapdan o‘ynasa, Gakpo uchun har bir daqiqa – sinov.
Raqobat, bosim va transfer soyasi
Gakpo raqobat ostida yashashni biladi. Luis Diaz Liverpoolda porlab turgan paytda ham u o‘z o‘rnini topgan, bosim ostida kuchaygan. Ammo bu safar vaziyat biroz boshqacha. Birinchi marta 2022 yil dekabrida klubga kelganidan beri uning ketishi haqida haqiqiy ehtimol paydo bo‘ldi.
Bir nechta klub, jumladan Tottenham Hotspur ham uning vaziyatini diqqat bilan kuzatmoqda. Bozor bahosi? 60 million funtdan kam bo‘lishi qiyin. Bu – PSV Eindhoven’dan 2022 yilgi jahon chempionatidan so‘ng 35 million funtga olingan futbolchi uchun jiddiy foyda.
Shvetsiyaga qarshi o‘yinda kiritilgan gollar esa Liverpool rahbariyatiga yana bir bor eslatma bo‘ldi: bu futbolchi hali ham eng yuqori darajada hal qiluvchi bo‘la oladi. Birinchi gol – uzoqdan emas, murakkab emas, lekin to‘g‘ri joy tanlash, orqa ustun tomonga o‘z vaqtida yetib kelish. Ikkinchisi – uning “vizit kartasi”: chapdan ichkariga kirish, o‘ng oyoqda joy topish va aniq zarba.
Klubdosh Aleksander Isak o‘sha o‘yinda gol ura olmadi. Kontrast yaqqol ko‘rindi.
Terma jamoada boshqa Gakpo
Niderlandiya terma jamoasi ichkarisidan kelayotgan gaplar bir xil: bu – birlashgan, ichki muhit mustahkam jamoa. Og‘ir klub mavsumidan so‘ng Gakpo turnirni juda kuchli boshladi.
Jahon chempionati statistikasi ham buni tasdiqlaydi: 7 o‘yinda 5 gol. Umuman olganda, 5 yil ichida terma jamoadagi 52 o‘yinda 23 gol. Bu raqamlar tasodif emas, barqarorlik belgisidir.
Maydondan tashqarida ham u o‘z o‘rniga ega. Terma jamoa ichida nasroniy futbolchilarga ko‘mak beruvchi, ma’naviy tayanch bo‘lib xizmat qiluvchi futbolchi sifatida tilga olinadi. Crysencio Summerville uni shunday ta’riflagan: “Cody bizning pastorimiz – u ibodatlarga boshchilik qiladi”.
Kapitan Virgil van Dijk esa maydondagi Gakpo haqida hech qanday shubha bildirmaydi. Shvetsiyaga qarshi 5:1 hisobidagi g‘alabadan so‘ng u shunday dedi: bu “ajoyib futbolchi, jamoa uchun juda ko‘p ishlaydi, intizomli, sifatlari – uzatmalari, gollari – alohida ajralib turadi”.
Iraola qo‘lida yechimmi yoki jumboqmi?
Jahon chempionatida davom etayotgan bu o‘yinlar Gakpo uchun ikki yoqlama ahamiyatga ega. Bir tomonda – terma jamoa bilan natija, ikkinchi tomonda – klubdagi mavqeini mustahkamlash imkoniyati. U qancha ko‘p gol ursa, qancha ko‘p o‘yin taqdirini hal qilsa, Liverpool uni kamida yana bir mavsumga ushlab qolish istagi shuncha kuchayadi.
Yangi kelganlar uchun Anfield har doim ham qulay sahna bo‘lavermaydi. Isak va Wirtzning ilk mavsumdagi qiynalishlari bunga yaqqol misol. Tizimga moslashish, bosim, talab – bularning barchasi vaqt talab qiladi. Gakpo esa bu bosqichni allaqachon ortda qoldirgan, ligani biladigan, murakkab davrlardan o‘tib bo‘lgan futbolchi.
Endi esa navbat Iraolaga. U va Liverpoolning transfer bo‘limi o‘tgan mavsumda qiynalgan hujum chizig‘ini qayta qurishga urinmoqda. Savol ochiq turibdi: Gakpo bu yangi hujumning markazida bo‘ladimi yoki yozgi transfer bozorining eng yirik hikoyalaridan biriga aylanadimi?
