Devid Bekxem: Superklub Me’mori
Devid Bekxem futbolchi sifatida allaqachon afsona maqomiga ko‘tarilgan edi. Endi esa u boshqa sahnada – klub egasi sifatida – o‘z nomini qayta yozmoqda.
“Old Trafford”dan dunyo bo‘ylab
Bekxemning o‘yinchi sifatidagi yo‘li shunchaki muvaffaqiyatli emas, hukmron edi. U “Manchester United” safida 394 ta o‘yin o‘tkazib, klub uchun 85 ta gol urdi, Angliya futbolining oltin davrida asosiy yuzlardan biriga aylandi. Ser Aleks Fergyuson qo‘l ostida yutgan kuboklar ro‘yxati cho‘zilib ketadi, lekin uning zarbali to‘plari va aniqligi hali-hanuz ko‘z oldida.
2003-yil yozida Bekxem “Real Madrid” tarkibiga qo‘shildi. “Galaktikos” davri. U yerda ham bo‘sh kelmadi: 2007-yilda La Liga chempionligiga erishdi. Keyingi yillarda uning yo‘li “Los Angeles Galaxy”, “Paris Saint-Germain” va “AC Milan” orqali o‘tdi – har bir klub Bekxem nomini global brendga aylantirgan sahna bo‘ldi.
U faqat klub darajasida emas, terma jamoada ham ramziy shaxsga aylandi. Angliya terma jamoasining sardori bo‘lib, “Three Lions” safida 115 ta o‘yin o‘tkazdi – bu raqam uning o‘zini ayamay ishlaganini aytib turibdi.
Karrington bolasi endi egalar safida
Akademiya tarbiyalanuvchisi bo‘lgan Bekxem bugun boshqa rolda. U “Salford City” klubini Gari Nevill bilan birga hammuassis sifatida boshqaradi. Ammo uning eng katta sahnasi Atlantika ortida.
MLS dagi “Inter Miami” – Bekxemning eng yirik loyihasi. Klub 2020-yilda debyut qilgan bo‘lsa-da, natijalar uzoq kuttirmadi. 2023-yilda Leagues Cup, 2024-yilda Supporters' Shield, 2025-yilda esa MLS Cup qo‘lga kiritildi. To‘rt yil ichida to‘liq shakllanib ulgurmagan klub uchun bu – keskin sakrash.
“Inter Miami” shunchaki liga ishtirokchisi bo‘lib qolmadi. Ular o‘tgan yozda ilk bor o‘tkazilgan FIFA Club World Cup turnirida ham qatnashib, MLS nomini global sahnaga olib chiqdi. Bekxemning rejalari maydon bilan cheklanmasligini aynan shu ishtirok ko‘rsatdi.
Transferlar: yulduzlar shahri
Bekxemning eng katta ustunligi – uning telefon kitobi. Futbolchi sifatida yutgan nufuzi endi transfer bozorida ishlayapti.
U 2023-yilda futbol tarixidagi eng katta ismlardan birini ko‘ndira oldi: Lionel Messi “Paris Saint-Germain”ni tark etib, “Inter Miami”ga ko‘chib o‘tdi. Bu nafaqat MLS, balki butun futbol xaritasini silkitgan qaror bo‘ldi.
Messi bilan birga Luis Suarez, Jordi Alba, Sergio Busquets va Rodrigo De Paul ham Bekxem loyihasiga ishondi. Ularning barchasi bir paytlar “Manchester United” yulduzi bo‘lgan insonning futbol va biznesga bo‘lgan yondashuviga ishonib, Atlantika ortiga yo‘l oldi.
Yaqinda Casemiro ham qarorini qildi. U Jahon chempionatidan so‘ng Messi va Bekxem bilan bir jamoada bo‘lish uchun Mayamiga kelishga rozi bo‘ldi. Bir paytlar “Real Madrid” markazida hukmronlik qilgan braziliyalik endi MLS maydonlarida kurashadi.
Bu ketishda “Inter Miami” o‘z ichida yangi “galaktikos”ni shakllantirayotgandek.
Navbatdagi superyulduz – Mbappe?
Endi savol bitta: keyingi navbat kimniki?
TalkSPORT xabariga ko‘ra, Bekxem allaqachon navbatdagi superyulduz haqida o‘ylayapti. E’tibor markazida – fransuz hujumchisi Kylian Mbappe.
Karyerasining keyingi bosqichida AQShga ko‘chib o‘tish ehtimoli haqida so‘ralganda, Mbappe qisqa, ammo mazmunli javob berdi: “Ko‘ramiz. David Beckham bu haqda menga ko‘p marta gapirgan. Amerika madaniyati boshqacha, ambitsiyaga cheklov yo‘q, bu menga yoqadi”.
Bu so‘zlar rasmiy va’da emas. Ammo ohangida rad etish ham yo‘q. Aynan shunday iboralar yillar o‘tib orqaga qaralganda, katta o‘zgarishlarning boshlanish nuqtasi sifatida eslanadi.
Bekxem uchun bu oddiy orzu emas, balki navbatdagi qadam bo‘lishi mumkin. Messi allaqachon Mayamida. Suarez, Alba, Busquets, De Paul va Casemiro ham shu yerda. Savol shundaki, Kylian Mbappe ham bu safga qo‘shiladimi – yoki Bekxemning telefon daftarida hali ochilmagan boshqa sahifa bormi?
