Eddie Howe ketmoqda: Newcastle yangi murabbiyga tayyorlanmoqda
“Newcastle United” tongni portlovchi xabar bilan qarshi oldi. Klubni so‘nggi besh yil ichida qayta tiriltirgan Eddie Howe iste’foga chiqmoqda. Bu safar na bosim, na shoshma-shosharlik – bu murabbiyning o‘zi tanlagan pauza.
Shu bilan birga, sahna ortida allaqachon yangi davr uchun dekoratsiyalar almashtirilmoqda. “PIF” tanlovini qilgan: asosiy nomzod – “Al-Ahli” bosh murabbiyi Matthias Jaissle.
Howe davri: 70 yillik qurg‘oqchilikdan kubokkacha
Howe 2021-yil noyabrida “Newcastle”ni qabul qilib olganida, klub tushkunlik va xavotir ichida edi. Oradan ko‘p o‘tmay, u “St James’ Park”ni Yevropa xaritasiga qaytardi.
2025-yilgi Carabao Cup – klubning 70 yillik tanaffusdan keyingi ilk sovrini. Ikki marta Chempionlar Ligasi yo‘llanmasi. Tarkibdan maksimal foyda, kiyinish xonasida tartib, maydonda tizim. 48 yoshli murabbiy shunchaki natija emas, mentalitetni ham o‘zgartirdi.
Ammo bu yozda klub atrofidagi havoning o‘zi o‘zgardi.
Alexander Isak o‘tgan yozdayoq “Liverpool”ga 125 million funtlik mojaroli transfer bilan yo‘l oldi. Bu yoz esa Sandro Tonali va Anthony Gordon bilan xayrlashishga to‘g‘ri keldi. Bruno Guimaraes ham chiqish eshigiga yaqinlashib qoldi. Yulduzlar ketayotganda, murabbiy ham o‘z ichidagi charchoqni yashira olmadi.
“The Athletic” nashridan David Ornstein ma’lumotiga ko‘ra, Howe o‘tgan mavsum oxirida qolishga qaror qilgan, lekin oradan ko‘p o‘tmay fikrini o‘zgartirgan. U klub rahbariyatiga futbolchilikdan emas, murabbiylikdan vaqtinchalik chekinishni istashini bildirgan. Pauza. Nafas rostlash.
Klub ham bunga qarshilik ko‘rsatmayapti. Aksincha, hammasi xotirjam, kelishilgan, keskin burilishsiz. “Newcastle” bu ketishni oldindan kutgan, reja tayyor.
Romano xabari va Jaissle nomi
Tongda Fabrizio Romano “X” ijtimoiy tarmog‘ida xabarni portlatdi: Eddie Howe darhol kuchga kiruvchi tarzda “Newcastle” bilan yo‘llarini ajratmoqda. Qaror qilingan, o‘zgarishlar boshlanmoqda.
Bir necha daqiqadan so‘ng ikkinchi zarba: Matthias Jaissle – yangi bosh murabbiylik uchun asosiy nomzod, muzokaralar ilg‘or bosqichda, kelishuv “yaqin”.
Bu nom “PIF” uchun begonamas. 38 yoshli nemis mutaxassisi “Al-Ahli” bilan ikki bor Osiyo Chempionlar Ligasi g‘olibi bo‘lgan. Eng muhim nuqta: “Al-Ahli” ham, “Newcastle” ham Saudiya Arabistonining “Public Investment Fund” qo‘l ostida. Boshqaruvchilar bir xil, ishonch doirasi bir xil, qarorlar ham tezlashadi.
Ornstein ma’lumotiga ko‘ra, “Newcastle” va Jaissle o‘rtasidagi muzokaralar ancha ilgarilab ketgan. Klub Howe bilan xayrlashish jarayoniga tinch, rejalashtirilgan o‘tish sifatida qarayapti.
Ogohlantiruvchi signallar allaqachon ko‘ringan edi
Bu ketish mutlaqo kutilmagan zarba emas edi. Mart oyidayoq Graeme Bailey “St James’ Park”da Howe kelajagi jiddiy muhokama qilinayotganini yozgandi. Mavsum og‘ir kechdi: yakunda 12-o‘rin, ikki marta “Sunderland”ga yutqazish – bu shaharda kechirilmaydigan nuqta.
Aprelda Fraser Fletcher Howe atrofidagi bosim kuchayayotgani, yozgi transfer oynasi oldidan bir qator yetakchilar chiqib ketishni ko‘zlayotgani haqida xabar berdi. O‘sha paytdagi ogohlantirishlar bugun aniq ssenariyga aylandi.
Howe esa bu orada savollarni chetga surishga, e’tiborni maydonga qaytarishga harakat qildi. Mavsum yakunidagi ichki tahlildan so‘ng, u va yordamchisi Jason Tindall bilan ishlash davom ettirilishi haqida signal berilgandi. Ammo murabbiy o‘zi boshqacha qarorga keldi: vaqt keldi, ketish kerak.
Howe so‘zlari ortidagi charchoq
1-may kuni Howe jurnalistlar oldida hanuz uzoq muddatli rejalar haqida gapirardi. U o‘shanda shunday degandi: o‘ziga bo‘lgan ishonchni saqlashi kerakligi, har kuni ertangi kun, yozgi oyna va keyingi mavsumni bir vaqtning o‘zida o‘ylab ishlashini ta’kidlagan.
Kunlik tayyorgarlik, qisqa muddatli maqsadlar, lekin doimiy ravishda klubning uzoq muddatli manfaatlari haqida o‘ylash. Natijalardan qat’i nazar, klub manfaatini birinchi o‘ringa qo‘yish zarurligini urg‘ulagan. G‘alabalar kerak, degandi u.
Transferlar mavzusida esa u o‘sha paytning o‘zida og‘ir jarayonni sezdirgandi. Har bir yozgi oynada ma’lum darajada o‘zgarish bo‘lishi tabiiyligini aytarkan, o‘tgan yozdagi kabi birdaniga oltita yangi futbolchi olishning qanchalik murakkabligini eslatgan. Uningcha, “tomchilab” kuchaytirish – barqaror muvaffaqiyatning kaliti.
U “aqlli qo‘shimchalar” va “to‘g‘ri skautlik qarorlari” bilan jamoani tezda yaxshilash mumkinligini misol qilib keltirgan, ayrim klublar o‘tgan yozdayoq buni ko‘rsatganini aytgan. Bir jumla esa ayniqsa esda qoldi: “Bizning eng katta e’tiborimiz – skautlik va transferlar”.
Bugun orqaga qaralsa, aynan o‘sha transferlar, yulduzlarning ketishi va kelajakdagi loyihaning noaniqligi uning ketish qarorida asosiy omillardan biriga aylangandek ko‘rinadi.
Endi navbat Jaisslega?
Endi “St James’ Park” yangi nomni kutmoqda. Jaissle – yosh, tajovuzkor futbol tarafdori, Osiyoda g‘olib bo‘lishni uddalagan, “PIF” tizimida ishonch qozongan murabbiy. Unga “Newcastle”da nafaqat jamoani qayta qurish, balki Howe boshlab bergan ambitsiyali loyihani boshqa yo‘nalishda davom ettirish vazifasi yuklanishi mumkin.
Howe esa klubni trofey, Chempionlar Ligasi kechalari va qayta tiklangan g‘urur bilan tark etmoqda. “Newcastle” uchun savol endi bitta: bu ketish – cho‘qqidan pastga sirpanishning boshlanishimi yoki yangi, yanada jasur davrning startimi?
