FIGC Infantino’dan yuz o‘girdi: Yevropadagi bosim kuchaymoqda
Jahon futboli markazida yana bo‘ron. Italiya futbol federatsiyasi – FIGC – FIFA prezidenti Gianni Infantino uchun eng og‘ir zarbalardan birini berdi: Rim endi uning yonida emas.
FIGC chorshanba kuni rasmiy bayonot bilan chiqdi va Jahon chempionati hamda boshqa FIFA turnirlarida ulushlarni xususiy investorlar qo‘liga topshirish bo‘yicha muvaffaqiyatsiz tashabbusdan so‘ng, Infantinoga ko‘rsatilgan siyosiy yelkani qaytarib oldi.
Bayonot keskin, ohangi esa aniq edi. FIGC bu qaror “FIFA prezidenti tomonidan xalqaro musobaqalar boshqaruvi va rivojlanishiga oid so‘nggi tashabbuslar borasida FIGC pozitsiyasini ochiq va shaffof ko‘rinishda ifodalash” uchun qabul qilinganini ma’lum qildi. Ya’ni Italiya endi bu yo‘lga sherik bo‘lmoqchi emas.
Yevropa fronti kengaymoqda
Italiya bu masalada yolg‘iz emas. Angliya, Irlandiya va Uels allaqachon Infantinoni qo‘llab-quvvatlashdan voz kechgan. Endi ularga Italiya ham qo‘shildi. Bu esa kelasi yilgi FIFA Congress oldidan prezidentlik poygasining kayfiyatini tubdan o‘zgartirishi mumkin.
Infantino bir necha oy davomida tobora kuchayib borayotgan bosim ostida qolmoqda. Uning FIFA turnirlariga, shu jumladan Jahon chempionatiga xususiy kapital jalb qilish rejasi rasmiy ravishda bekor qilingan bo‘lsa-da, bu urinish o‘zi uchun siyosiy mina bo‘lib chiqdi. G‘oya o‘ldi, ammo oqibatlari yashab turibdi.
FIGC prezidenti Giovanni Malagò pozitsiyani yanada ravshanlashtirdi: Italiya UEFA va boshqa Yevropa federatsiyalari bilan bir safda qoladi. U “merit, birdamlik, barqarorlik va muxlislarning markaziy roli”ga tayangan futbol konsepsiyasini qo‘llashini ta’kidladi. Bu so‘zlar bevosita Infantino loyihasiga qarshi manifest sifatida yangradi.
Malagò futbol taraqqiyoti uchun “muloqot, tinglash va bo‘lingan mas’uliyat” modelini himoya qildi, aynan shu yondashuv o‘yinlarni rivojlantirganini, innovatsiyaga yo‘l ochganini va eng muhimi – sportning asosiy tamoyillarini himoya qilib kelganini eslatdi.
Maydondagi afsonalar esa prezident tarafida
Biroq futbol siyosatidagi chiziq stadiondagidek toza emas. Yevropa federatsiyalari birin-ketin chekinayotgan bir paytda, maydonda afsona bo‘lgan bir qator sobiq yulduzlar Infantino atrofida jamlanmoqda.
Italiya terma jamoasining Jahon chempioni sardori Fabio Cannavaro, Braziliya afsonasi Cafu va boshqa yulduzlar ijtimoiy tarmoqlarda FIFA prezidentini ochiqcha qo‘llab-quvvatlashdi. Bu chiqishlar fransiyalik Mikael Silvestre boshchiligidagi boshqa guruh sobiq futbolchilari FIFA rahbariyatida “o‘zgarish” talab qilganidan keyin paydo bo‘ldi.
Cannavaro o‘z pozitsiyasini aniq ifoda etdi: so‘nggi o‘n yilda jahon futboli rivojlanganini, futbolchilar yana markaziy sahnaga qaytganini yozdi. U Infantino ishini “zo‘r” deb baholab, buni tan olmaslikni “intellektual halollikka zid” deb atadi. 2006 yilda Jahon chempionligini ko‘targan sobiq markaziy himoyachi hozirda O‘zbekiston milliy terma jamoasini boshqarayotgani fonida bu so‘zlar yanada katta rezonans uyg‘otdi.
Cafu ham xuddi shu ohangda fikr bildirdi. U FIFA va Infantino faoliyatini, ayniqsa futbolchilarning futbol boshqaruvida vakillik masalasida kuzatib kelayotganini yozdi. Uning ta’kidlashicha, bu darajadagi o‘yinchi ovozi ilgari deyarli mavjud bo‘lmagan.
Cafu bilan bir qatorda Braziliya yulduzi Roberto Carlos, argentinalik Javier Zanetti va Esteban Cambiasso, kolumbiyalik Ivan Ramiro Cordoba hamda meksikalik Jared Borgetti ham xuddi shunday ruhdagi xabarlarni tarqatishdi. Futbol maydonida bir vaqtlar raqib bo‘lgan bu nomlar endi siyosiy maydonda bir tomonda saf tortdi.
UEFA bosimi va Infantinoning kelajagi
Infantino 2016 yilda Sepp Blatter o‘rnini egallaganida, Yevropa federatsiyalari unga keng ko‘lamli ishonch bildirgandi. O‘sha paytda sobiq UEFA bosh kotibi sifatida u qit’a federatsiyalari uchun “o‘z odami”dek ko‘ringan. Endi esa aynan shu Yevropa uning eng qattiq tanqidchisiga aylangan.
UEFA hatto FIFA musobaqalarini boykot qilish bilan tahdid qilgan darajaga bordi. Bu futbol siyosatida kamdan-kam uchraydigan, juda keskin signal edi. Tahdid ortidan Infantino Jahon chempionati ulushlarini sotish rejasini muzlatishga majbur bo‘ldi, UEFA esa ushbu reja qayta tiklanmasligiga kafolat olgach, rasmiy boykot tahdidini qaytarib olishga tayyorligini bildirdi.
Ammo chiziq tortildi. Yevropa federatsiyalarining ishonchi darz ketgan. FIGCning bugungi qarori shuni ko‘rsatadiki, bu darz endi yashirilmaydi, balki ochiq siyosiy pozitsiyaga aylangan.
Bir tomonda federatsiyalar – siyosiy va institutsional kuch. Ikkinchi tomonda esa sobiq yulduzlar – futbol ramzlari, millionlab muxlislar uchun hanuz orzu timsoli bo‘lib qolayotgan ismlar. Infantino esa aynan shu ikkala front o‘rtasida turibdi.
Savol endi bitta: kelasi yilgi FIFA Congress zalida qaysi ovoz balandroq yangraydi – federatsiyalarnikimi yoki afsonalarnikimi?
