Fury va Joshua: Wembley superjangi qaytmoqda
Tyson Fury va Anthony Joshua o‘rtasidagi orzu jangi yana London sari og‘moqda. Promouter Eddie Hearn muzokaralar qayta ochilganini e’lon qildi va Wembley Stadium yana asosiy nomzodga aylandi.
Bir muddat avval hammasi boshqacha ko‘rinayotgandi. Madison Square Garden sahnaga chiqdi, Nyu-Yorkdagi afsonaviy arena moliyaviy takliflar va global bozor nuqtayi nazaridan ustun ko‘rinib, muzokaralarga jiddiy to‘siq bo‘ldi. Superjang Atlantika ortiga ko‘chib o‘tadigandek edi.
Shu payt Eddie Hearn ijtimoiy tarmoqqa chiqdi va yo‘nalishni keskin burdi. U muxlislarga murojaat qilib, Wembley variant sifatida yana stol ustida ekanini ma’lum qildi. Hearnning qisqa, lekin aniq xabari boks jamoatchiligida kuchli aks-sado berdi: u muxlislarga “aql bovar qilmaydigan qo‘llab-quvvatlash” uchun minnatdorlik bildirdi va aynan shu bosim tufayli London stsenariysi qayta jonlanganiini ta’kidladi. Uning chaqiruvi bitta: tarix yaratish, mamlakat ko‘rgan eng katta sport lahzalaridan birini aynan shu yerda sahnalashtirish.
Wembley atrofida shov-shuv kuchayarkan, Fury tomonining pozitsiyasi kutilmoqda. Sky Sports Frank Warren bilan bog‘langan, ammo hozircha rasmiy javob yo‘q. Shunga qaramay, ring tashqarisidagi psixologik jang allaqachon qizib ketgan.
Tyson Fury haftaning boshida ijtimoiy tarmoqlarda Anthony Joshuaga keskin hujum qilgan, uni “qo‘rqoqlik”da ayblab, cho‘zilib ketgan muzokaralar fonida muxlislarni “aldayapti”, degan da’volarni ilgari surgan edi. Og‘ir vazn toifasining eng katta nomlari o‘rtasidagi bu so‘z urushi, ayniqsa, arenaning taqdiri hal bo‘layotgan bir paytda, jang atrofidagi taranglikni yanada oshirdi.
Londonning bosimi: Sadiq Khan sahnaga chiqdi
Bu faqat promouterlar va bokschilar o‘rtasidagi tortishuv emas. London ham o‘z so‘zini aytyapti. Shahar meri Sadiq Khan Fury – Joshua superjangini poytaxtga olib kelish uchun ochiqcha kampaniya boshladi.
Uning pozitsiyasi aniq: bu jang Londonniki bo‘lishi kerak. Khan moliyaviy jihatdan jozibali Nyu-York variantini tushunishini aytgan bo‘lsa-da, asosiy dalil – muxlislar. Uning fikricha, Fury ham, Joshua ham aynan Britaniya auditoriyasi tufayli bugungi maqomiga yetdi va eng katta to‘qnashuv ham ularni yillar davomida qo‘llab-quvvatlab kelgan tomoshabinlar ko‘z o‘ngida bo‘lishi lozim.
Khan Wembley’da 100 ming tomoshabinni yig‘ish, yana millionlab muxlislarni butun dunyo bo‘ylab ekran qarshisiga mixlab qo‘yish mumkinligini ochiq aytdi. U promouterlarga murojaat qilib, Fury va Joshua xohlaydigan narsani qilishga chaqirdi: jangni Londonga olib kelish.
Mer faqat bayonot bilan cheklanib qolmadi. U Eddie Hearn bilan bevosita muloqot bo‘lganini oshkor qildi. Matchroom boshlig‘i London meri ofisiga murojaat qilgan, shahar esa bu tarixiy kechani tashkil etishda hamkorlikka tayyorligini bildirgan. Khan o‘z davrida London bir necha yirik boks kechalariga mezbonlik qilganini eslatib, yana bir supershouni qabul qilishga shay ekanini ko‘rsatdi.
Ringga eltuvchi yo‘l: Fury va Joshua so‘nggi janglari
Boks tomoni ham unutilgani yo‘q. Anthony Joshua yozda Kristian Prenga ustidan ikkinchi raundda nokaut bilan g‘alaba qozonib, Furyga qarshi ehtimoliy jang oldidan o‘zini “qizdirdi”. Shu bilan birga, u birinchi raunddayoq ikki marta nokdaunga tushgani, uning himoyasidagi bo‘shliqlar va ruhiy bosim ostidagi holati haqida savollarni ochiq qoldirdi. Ammo natija baribir nokaut. Va bu statistikada faqat bitta so‘z yoziladi.
Tyson Fury ham iyul oyida ringga ko‘tarilib, Mariusz Wach ustidan yettinchi raundda to‘xtatib qo‘yish orqali g‘alaba qozondi. U o‘zining tanish ustunligi, ringni boshqarish mahorati va bosim ostida ham jang ritmini ushlab turish qobiliyatini yana bir bor namoyish etdi. Endi ikkala og‘ir vazn giganti ham navbatdagi qadamga tayyor – savol faqat qayerda va qachon.
Wembley va Madison Square Garden o‘rtasidagi kurash hali yakunlanmadi. Lekin Eddie Hearnning so‘nggi bayonoti, Sadiq Khanning ochiqcha bosimi va Britaniya muxlislarining talabchan ovozi fonida savol tobora keskinlashib boryapti: bu avlod jangini qaysi shahar tarixga muhrlaydi – Nyu-Yorkmi yoki London?
