Gasperini: Orzularni bo‘g‘maslik kerak
Seriya A startidayoq maydonda ham, poytaxt kayfiyatida ham havo o‘zgardi. Dastlabki turlar natijalari Rimaning ikkala qirg‘og‘iga ham yengil shovqin, yangi umid olib keldi. Shu fon’da Gian Piero Gasperini o‘z jamoasi atrofida paydo bo‘lgan erta optimizmni muvozanatga keltirishga chiqdi.
Murabbiy “La Gazzetta dello Sport” bilan suhbatda nafaqat maydondagi ishtiyoq, balki kiyinish xonasidagi orzular, tribunadagi kayfiyat va muxlislar bilan aloqasi haqida ham gapirdi. Dastlabki g‘alabalar fonida jamoa ichida balandroq maqsadlar, katta mukofotlar haqida gap-so‘zlar ko‘paygan.
Shu ruhda Bryan Cristante va Lorenzo Pellegrini ham katta marralar, hatto Circo Massimo’dagi chempionlik bayrami haqida gapirib o‘tdi. Bunday Scudetto orzulari atrofida shovqin oshgani sari, tajribali murabbiy bir qadam orqaga chekinib, oyoqni yerga mahkam bosish kerakligini eslatdi.
— Orzularni hech qachon bo‘g‘maslik kerak, — deydi Gasperini. — Muhimi, budilnik chalinganda, haqiqat butunlay boshqa narsa ekanini bilish. Agar sen o‘sha haqiqatni to‘g‘ri yashasang, bir kuni uni orzular bilan moslashtirishing ham mumkin. Lekin bular sentabr boshida qilinadigan suhbatlar emas.
Qisqa, lekin aniq signal. Ambitsiya bor, lekin kundalik mehnat ustida.
Poytaxt nafas olmoqda, lekin hushyor
Gasperini faqat kiyinish xonasini emas, butun poytaxt kayfiyatini ham sinchiklab kuzatayotgani seziladi. U Rimdagi muhit, muxlislar bilan aloqasi, stadion atrofidagi mayda, lekin muhim detallarni tilga oldi.
Uning ta’kidlashicha, bu safargi shovqin oddiy romantik hayajon emas. Rima ko‘pni ko‘rgan. Bu shahar futbolda aldanishni yomon ko‘radi.
— Ishtiyoq doim bor edi, — deya tushuntiradi Gasperini. — Hozir esa entuziazmni ko‘ryapman, lekin yetuk, xabardor entuziazm. Rim tashqarisidagi odamlar o‘ylagandan ancha boshqacha. Roma muxlislarini oson alday olmaysiz.
Bir-ikki yaxshi natija bilan havoga uchib ketadigan auditoriya emas bu. Ular yulduzlarni ko‘rgan, katta jamoalarni ko‘rgan, katta kechalarni boshidan o‘tkazgan.
— Ular buyuk chempionlarni, buyuk jamoalarni ko‘rishgan. Futbolni bilishadi, — deydi murabbiy. — Bugun ular mamnun muxlislar. Mening eng katta mukofotim — ularni mamnun holda ko‘rishim.
Murabbiy uchun bu oddiy maqtov emas, ichki mezon. Muxlis qoniqsa, demak jamoa to‘g‘ri yo‘ldan ketmoqda. Ammo Gasperini gapida biron joyda “chempionmiz” degan ohang yo‘q. U Seriya A marafoni endi boshlanayotganini, sentabr kayfiyati may oyidagi jadvalni kafolatlamasligini juda yaxshi biladi.
Rim esa hozircha tush ko‘rayapti. Savol bitta: bu safar budilnik haqiqatni buzadimi yoki haqiqatning o‘zi orzuga aylanadimi?
