Hamza Abdelkarimning Barcelona'dagi porlashi
Yozgi tayyorgarlik ko‘pincha akademiya yigitlari uchun faqat tajriba maydoni bo‘ladi. Kelishadi, o‘ynashadi, keyin yana ijaraga ketishadi. Hamza Abdelkarim esa bu yozni boshqacha yozmoqchi.
Misrlik hujumchi “Barcelona”ning mavsumoldi uchrashuvlarida shunday darajada porladiki, Hansi Flick uni e’tiborsiz qoldira olmayapti. Ayniqsa Angliyada, “Birmingham City”ga qarshi bahsda urilgan dublidan keyin.
Flick ishonchini olgan yigit
Kataloniyada chiqadigan “Sport” nashrining yozishicha, Hamza yozgi tayyorgarlikda nemis murabbiyi qo‘l ostida eng yorqin ko‘rinayotgan yosh futbolchilardan biri. U yozgi dastlabki ikkita o‘rtoqlik uchrashuvini ham asosiy tarkibda boshladi: “Europa”ga qarshi 4:1 hisobidagi g‘alaba va so‘ng “Birmingham City”ga qarshi o‘yin. Bunday ishonch har bir yosh futbolchiga ham nasib etmaydi.
Flick uni oddiy sinov varianti sifatida emas, haqiqiy markaziy hujumchi sifatida ko‘ryapti. Maydondagi javobi esa aniq: tayyor ekanini ko‘rsatmoqda.
To‘liq hujumchi portreti
“Birmingham”ga qarshi o‘yinda Hamza o‘zini sof “9-raqam” sifatida namoyish etdi. Orqasi bilan darvozaga qarab o‘ynadi, raqib himoyachilarini tanasida yopib oldi, to‘pni ushlab turdi, keyin yuzlanib hujumga o‘tib, ularni ortda qoldirishga urindi. Jurnalistlar bu chiqishni “juda ishontiruvchi” deb ta’riflashdi.
Birinchi bo‘limda uning o‘yini tezlik va tinimsiz harakat bilan ajralib turdi. To‘pni so‘rashdan to‘xtamadi, jarima maydoni ichida bo‘sh zonalarni doim izlab yurdi. Aynan shu doimiy harakat penaltiga olib keldi: Hamza raqibini diqqat bilan kuzatib, uning xatosini kutdi va jarima maydoni ichida ustunlikni qo‘lga kiritdi.
Penaltini kim tepadi, degan savol paydo bo‘lishiga ham ulgurmay, u javobni o‘zi berdi. To‘pni qo‘liga oldi, nuqtaga qo‘ydi va chap oyog‘i bilan “Birmingham” darvozaboni James Beadleni aldab, pastdan aniq zarba berdi. Yozgi o‘rtoqlik o‘yinlaridagi ilk goli.
Kurash, sariq kartochka va murabbiy talab qiladigan ruh
Hamzaning ishtiyoqi faqat hujumda emas, himoyada ham ko‘rindi. U birinchi bo‘limda “Barcelona” tomonidan qilingan olti qoidabuzarlikning uchtasiga muallif bo‘ldi. Oxirgisi uchun sariq kartochka ham oldi. Statistikada bu faqat raqam. Murabbiylar uchun esa — old chiziqda kerak bo‘ladigan jangovar ruh, agressiya va yutishga bo‘lgan ochlik.
Bu ogohlantirish uni to‘xtatmadi. Aksincha, xarakterini yanada ochib berdi. U markaziy hujumchidan talab qilinadigan narsa — doimiy tahdid, raqibga tinchlik bermaydigan bosimni davom ettirdi.
Ikkinchi gol esa bu kechani uning kechasiga aylantirdi. Jarima maydoni chetidan Roony kuchli zarba yo‘lladi, darvozabon qaytardi. Hamza esa vaziyatni kutib turgandek, bir lahzada reaksiya ko‘rsatdi. Reboundga birinchi bo‘lib yetib bordi va texnik jihatdan puxta zarba bilan dublni rasmiylashtirdi.
Markaziy hujumchi uchun shafqatsiz poyga
Hamza Abdelkarim o‘tgan qish Misrning Al Ahly klubidan “Barcelona”ga kelganida, uni ko‘pchilik kelajak loyihasi sifatida ko‘rdi. Bugun esa u hozirning o‘zida tarkib uchun kurashmoqchi ekanini ochiq ko‘rsatyapti.
Katalon klubi yozgi transfer oynasida sof markaziy hujumchi izlayotgan bir paytda, ichkaridan chiqqan bu nom murabbiy shtabini o‘ylashga majbur qilmoqda. Pozitsiya uchun raqobat keskin, yakuniy qarorlar esa keyinroq qabul qilinadi. Ammo hozircha bitta haqiqat bor: Hamza har daqiqa, har imkoniyatdan maksimal foydalanmoqda.
U o‘zini nafaqat kuzatuv ro‘yxatida qoldirish, balki birinchi jamoa eshiklarini ochish uchun kurashayotgan futbolchi sifatida ko‘rsatyapti. Savol endi bitta: Flick yangi hujumchini tashqaridan izlaydimi yoki “Camp Nou” ichida allaqachon tayyor javobni topdimi?
