Hansi Flickning markaziy hujumchi talabi: Barça Julián Álvárezga tikmoqda
Hansi Flickning markaziy hujumchi talabi: Barça barcha kartalarini Julián Álvarezga tikmoqda
Robert Lewandowski ketganidan beri Barcelona hujum chizig‘ida bo‘shliq sezilib turibdi. Endi bu bo‘shliq yanada xavotirli tus oldi: Ferran Torres kelajagi borasida ochiqcha shubha bildirdi. Shunday vaziyatda Hansi Flick bir narsani aniq aytyapti – jamoadagi navbatdagi markaziy hujumchi tezroq kelishi kerak.
Bu pozitsiya uchun klub deyarli bir yildan beri bitta nomga yopishib olgan: Julián Álvarez.
Deco Madridga yo‘l oldi
So‘nggi soatlarda Sporting Director Deco Madridga uchib bordi. Uning vazifasi bitta: bu transferni tiqilib qolgan joyidan siljitish. Atlético bilan muzokara qilish deyarli imkonsiz tus olgan, ular savdoga kirishishni ham istamayapti. Shuning uchun uchrashuvlar ko‘proq strategiyani aniqlash va real imkoniyatlarni o‘lchashga qaratilgan.
Flick esa ortga chekinmayapti. Dushanba kuni u yana bir bor markaziy hujumchi so‘ragan. Deco esa nemis murabbiyining talabini bajarish va 25-26 mavsum uchun haqiqiy sovrinlarga da’vogarlik qiladigan tarkib qurish yo‘lida tinmay harakat qilmoqda.
Barça rahbariyati va Deco Julián Álvarez bo‘yicha ishni o‘tgan yilning o‘zidayoq boshlagan. Oylab davom etayotgan aloqalar, uchrashuvlar, variantlar. Ammo vaqt o‘tmoqda, hujumchi esa hanuz Atlético safida. Sabab bitta: Madrid klubi uni qo‘yib yuborishni istamayapti.
100 million yetmadi
Barcelona allaqachon jiddiy qadam tashladi. Klub 100 million yevrolik taklifni stolga qo‘ydi. Atlético esa rad etdi. Ularning talabi aniq: shartnomadagi bo‘shatish bandi – taxminan 500 million yevro.
Spotify Camp Nou atrofida taslim bo‘lish kayfiyati yo‘q. Katalonlar oxir-oqibat bu transferni amalga oshirish mumkinligiga ishonyapti. Aynan shu ishonch Deco safarini tezlashtirdi – Jijantes xabar bergan, MARCA tasdiqlagan Madridga uchish bejiz emas.
Barcelona hozir agentlar bilan bir yoqadan bosh chiqarishga urinmoqda. Maqsad – argentinalik hujumchi tomoni bilan aniq rejani kelishib olish va Atlético’ni o‘z pozitsiyasini yumshatishga majbur etish.
Julián Álvarezga ochiq ishonch votumi
Deco tashrifi faqat klublar o‘rtasidagi muzokaralar uchungina emas. Bu safar futbolchining o‘zi va uning atrofidagi odamlar uchun ham signal: Barcelona hali ham uni birinchi raqamli nishon sifatida ko‘ryapti.
Bu – shubha qoldirmaydigan ishora. Agar Álvarezda hanuz ikkilanma fikr bo‘lsa, Kataloniyadan kelayotgan bu qat’iyat ularni kamaytirishi kerak.
Endi esa sahnaga futbolchining o‘zi chiqishi mumkin. 10-sana kuni Simeone bilan mashg‘ulotlarga qaytishi kerak bo‘lgan hujumchi bosim o‘tkaza oladimi? Barça ofislarida shunga ishonishadi. Ularning fikricha, futbolchining qat’iy pozitsiyasi – transferni ochadigan asosiy kalit.
Flick kutmaydi, lekin voz ham kechmaydi
Barcelona ichkarisida ishonch hali so‘nmagan. Klub Julián Álvarezni 26-27 mavsum uchun blaugrana libosida ko‘rish rejasidan qaytmoqchi emas. Har qanday variant ko‘rib chiqiladi, barcha yo‘llar sinab ko‘riladi.
Ammo chegaralar ham bor. Barcelona «osmoniy» taklif berib, moliyaviy mantiqni yo‘qotmoqchi emas. Yana bir nuqta: Flick abadiy kutmaydi. Murabbiy markaziy hujumchini hozir istayapti, kechagi yoki ertangi emas. Agar jarayon cho‘zilib ketsa, klub boshqa variantlarga ham o‘tishi mumkin.
Shunga qaramay, bugungi kun holatiga ko‘ra, Álvarez – asosiy nishon. Klub bu transferni hanuz amalga oshirish mumkin deb hisoblaydi.
Katalonlar bir narsani takrorlashyapti: shu hafta hal qiluvchi bo‘lishi mumkin. Barcelona Julián Álvarezni qo‘lga kiritadimi yoki Flick yangi davrni baribir bo‘sh «9» bilan boshlashga majbur bo‘ladimi? Savol ochiq qolmoqda.
