Infantino FIFA ichida bosim kuchaydi
FIFA ichida bosim kuchaydi. Gianni Infantino esa nihoyat chekinishga majbur bo‘ldi.
Infantino ortga qadam qo‘ydi
Jahon chempionati huquqlarini sotish atrofidagi mojaro va Fifa Forward Enterprise bo‘yicha savollar Infantino uchun oddiy ichki nizo bo‘lib qolmadi. Bu safar u global miqyosdagi norozilik to‘lqiniga duch keldi.
O‘tgan oyda bir qator FIFA Kengashi a’zolari tashqi, mustaqil boshqaruv tekshiruvini talab qila boshladi. Gap nafaqat Fifa Forward Enterprise loyihasining sotilishi, balki Folarin Balogun bilan bog‘liq bahsli jarayon haqida ham ketmoqda. Angliya futbol assotsiatsiyasi raisi Debbie Hewitt o‘tgan haftada Infantino nomiga rasmiy xat yo‘llab, aynan shu ikki masalaga oid barcha hujjatlarni oshkor qilishni talab qilib, bosimni yanada oshirdi.
Infantino avvaliga norozi kengash a’zolari bilan ochiq muloqotga kirishmadi. Ammo endi u ilk bor tashqi nazoratga tayyorligini tan oldi: barcha 211 a’zo assotsiatsiyaga yuborgan maktubida u mustaqil boshqaruv sharhini buyurtma qilishga rozi ekanini ma’lum qildi. Bu, uning davrida kamdan-kam uchraydigan yon berish.
Mustaqil sharh va ichki islohotlar chaqiruvi
Infantino o‘sha maktubida ikki yo‘nalishni taklif qildi. Birinchisi – FIFA’ning yirik strategik tashabbuslari bo‘yicha amaldagi boshqaruv tizimini mustaqil tashqi ekspertlar tekshirib chiqishi.
“Avvalo, men Kengashdan FIFA’ning yirik strategik tashabbuslari uchun amaldagi boshqaruv doirasiga mustaqil tashqi sharh buyurtma qilishni istash-istamasligini so‘rayman”, – deb yozdi u.
Ikkinchi yo‘nalish – ichkaridan turib tuzilmani qayta ko‘rib chiqish. Infantino konfederatsiyalar, milliy assotsiatsiyalar va boshqa manfaatdor tomonlar bilan bevosita, tuzilgan va muddatli maslahatlashuv jarayonini yo‘lga qo‘yishni taklif qilmoqda. Maqsad – qaror qabul qilish tizimini kuchaytirish.
Bu maslahatlashuvlar doirasida prezident, byuro, Kengash va Kongressning aniq vakolatlari qayta muhokama qilinadi. Shuningdek, yirik strategik tashabbuslarda shaffoflik, ishtirok va hisobdorlikni kuchaytirishning amaliy yo‘llari bo‘yicha aniq takliflar yig‘iladi.
Savol ochiq: FFE va Balogun qay darajada ko‘riladi?
Shunga qaramay, bir muhim nuqta bor: Infantino o‘z maktubida Fifa Forward Enterprise va Folarin Balogun bo‘yicha alohida, nomma-nom tekshiruv o‘tkazishni va’da qilmagan. Demak, u Debbie Hewitt talab qilganidek, aynan shu ikki masalani markazga qo‘ygan mustaqil surishtiruvga rozilik bergani yo‘q.
Kengashning o‘zi – olti konfederatsiyadan 28 nafar vakil, sakkiz vitse-prezident va Infantino – tashqi sharhni ma’qullashi deyarli aniq. Ammo hammasi vakolat va vazifalar doirasiga bog‘liq bo‘ladi. Tekshiruv qanchalik chuqur kirib boradi? Bu haqiqiy islohotlarga eshik ochadimi yoki bu ham navbatdagi siyosiy manevr, kelasi yil mart oyida bo‘lib o‘tadigan prezidentlik saylovidan oldin hokimiyatni mustahkamlashga urinishmi?
Savol aynan shu yerda.
Pul bosimi: 6 milliard dollarlik zaxira nishonda
Infantino faqat boshqaruv masalasi bo‘yicha emas, moliyaviy frontda ham kuchli bosim ostida. FIFA’ning 6 milliard dollarlik naqd zaxirasi a’zolar nigohida qotib qolgan resursga aylanib ulgurgan.
O‘tgan haftada UEFA prezidenti Aleksander Ceferin va Concacaf rahbari Victor Montagliani har bir milliy assotsiatsiya uchun kamida 10 million dollardan to‘lov ajratishni rasmiy ravishda so‘rab chiqdi. Bu shunchaki ramziy murojaat emas, balki FIFA kassasiga bevosita yo‘naltirilgan siyosiy zarba.
Osiyo Futbol Konfederatsiyasi prezidenti Shayx Salman bin Ibrohim Al Xalifa ham ortda qolmadi. U dushanba kuni shunga o‘xshash mazmunda xat yubordi. Demak, kelasi oy bo‘lib o‘tadigan FIFA Kengashi yig‘ilishida boshqaruv islohoti bilan bir qatorda eng keskin mavzulardan biri – mablag‘ taqsimoti bo‘ladi.
Infantino endi nafaqat qanday boshqarayotganini, balki kim uchun boshqarayotganini ham isbotlashi kerak bo‘ladi.
