Islom Maxachev: Rekord yoqasida va vaqt bilan poygada
Islom Maxachev o‘zini abadiy oktagonda qoladigandek tasavvur qilmaydi. U buni ochiq aytyapti. 34 yoshli rossiyalik yulduz UFC’da yarim o‘rta vazn chempionligini ilk bor himoya qilish arafasida turibdi va ayni paytda vaqt unga qarshi ishlayotganini tan olmoqda.
Shanba kuni Filadelfiyada, Xfinity Mobile Arena oktaqonida u Irlandiya vakili Ian Machado Garry bilan to‘qnash keladi. Bu oddiy himoya emas. Bu – tarixga yoziladigan jang bo‘lishi mumkin.
Anderson Silva rekordi nishonda
Maxachev 2015 yilda UFC sahnasiga ko‘tarilganidan beri promoushen tarixidagi eng yorqin rezyumelardan birini yig‘di: 18 jangda 17 g‘alaba. Endi esa u navbatdagi bosqichga tayyorlanmoqda.
Agar u 28 yoshli Machado Garryni mag‘lub etsa, Anderson Silva saqlab turgan, 13 yildan beri o‘zgarmagan ko‘rsatkich – UFC’dagi 16 ketma-ket g‘alabani ortda qoldiradi. Bunday marrani yangilash har qanday davr uchun mezon, har qanday chempion uchun o‘lchov.
Maxachev o‘tgan yili tarixiy to‘rtinchi marta yengil vazn kamarini himoya qilgach, vazn o‘zgartirishga qaror qildi va yarim o‘rta vaznga ko‘tarildi. Bu qaror uni ikki vazn toifasida chempionlikka olib keldi va uning merosini butunlay boshqa darajaga ko‘tardi.
“Men 28 yoshda emasman”
Uning o‘zi tan olganidek, bu bosqichda vaqt eng katta raqibga aylanadi. Maxachev UFC Hall of Famer Demetrious Johnson bilan suhbatda shunday dedi:
“Men endi yosh yigit emasman. Endi men uchun uch-to‘rt oyda bir marta jang qilish yaxshiroq”, – deya tushuntirdi u. “Tushunaman, men 28 yoshda emasman; hozir 34daman. Va menda ko‘p vaqt yo‘q”.
UFC taqvimi esa har doim ham chempion istagiga mos kelmaydi. “Ba’zan UFC’da hammasi xohlaganingdek bo‘lmaydi. Uch-to‘rt oydan keyin yana jang qilmoqchi bo‘lasan, lekin hammasi sening istagingga qarab bo‘lmaydi”, – deydi u.
U tezroq, ko‘proq va katta janglar istayapti. Chunki biladi: bu davr abadiy emas.
Khabib bilan solishtirishlar: boshqa yo‘l, boshqa meros
Bu jang atrofidagi asosiy bahslardan biri – Maxachev allaqachon murabbiyi va yaqin do‘sti Khabib Nurmagomedovdan o‘zib ketdimi, yo‘qmi, degan savol.
Khabib 2020 yilda 29-0 rekordi bilan ketdi. U raqiblarini bosim bilan ezib tashlaydigan, uzluksiz kurash va parter bilan yo‘q qiladigan uslub orqali afsonaga aylandi. Hech qachon mag‘lub bo‘lmadi, kamarni qo‘lidan tushirmadi.
Maxachev boshqacha. U oktagonda Khabibchalik shafqatsiz bosim qilmaydi, lekin arsenalida zarba almashuv ancha rang-barang, texnik jihatdan to‘liqroq ko‘rinadi. Uning yagona mag‘lubiyati – 2015 yilda Adriano Martinsga qarshi jangda. O‘sha xato uni to‘xtatmadi, aksincha, yanada pishitdi.
Eng muhim farq esa unvonlarida. O‘tgan yili u Jack Della Maddalena ustidan g‘alaba qozonib, ikki vazn toifasida chempionga aylandi. Khabib erisha olmagan marrani u zabt etdi. Shuning o‘ziyoq solishtirishni murakkablashtiradi: kimning merosi og‘irroq – mag‘lubiyatsiz yakunlangan karera yoki ikki divizionda kamar ko‘targan chempion?
Dana White: “To‘g‘ri yo‘lda”
UFC prezidenti Dana White ham bu bahsdan chetda qolmadi. U haftaning boshida Maxachev haqida gapirar ekan, uni promoushen tarixidagi eng buyuk jangchi maqomiga eltuvchi yo‘lda deb baholadi. Uning fikricha, Maxachev hozircha “to‘g‘ri yo‘lda”.
Bu so‘zlar bejiz emas. Ikki divizionda kamar, ketma-ket g‘alabalar, eng og‘ir raqiblarga qarshi janglar – bularning barchasi tarix kitoblarida qoladigan faktlar.
Endi esa oldinda Filadelfiya kechasi turibdi. Oktagonga yana bir bor chiqish, rekordsiz qolgan yagona sahifani to‘ldirish, vaqt bilan poygada navbatdagi qadamni tashlash fursati.
Savol bitta: Islom Maxachev Anderson Silva soyasidan chiqib, o‘z davrining bosh chempioni sifatida tarixga muhrlana oladimi yoki vaqt uning o‘zi aytganidan ham tezroq yetib keladimi?
