Ispaniya bosh murabbiyi Luis de la Fuente Argentina futbolchilarining xatti-harakatlarini qoraladi
Ispaniya bosh murabbiyi Luis de la Fuente Jahon chempionati finalidan keyingi Argentina futbolchilarining xatti-harakatlarini “chidab bo‘lmas va qabul qilib bo‘lmaydigan” deb atadi. Finaldagi dramatik daqiqalar o‘tib bo‘lgach, maydon chetida boshlangan mojaro endi FIFA darajasidagi tekshiruvga aylanib ulgurgan.
Finaldan keyingi portlash
Yakunda Ispaniya g‘alabasi, Ferran Torresning qo‘shimcha bo‘limdagi zarbasi va Rodri boshchiligidagi shodiyonalar. Ammo so‘nggi hushtakdan keyin his-tuyg‘ular chiziqdan chiqib ketdi.
Leandro Paredes to‘g‘ridan-to‘g‘ri qizil kartochka oldi. Sabab – zo‘ravonlik: u bir nechta ispan futbolchilarini, jumladan Eric Garcia va Gavi bilan jismoniy to‘qnashuvga bordi, ularni ushlab, itarib yubordi. Bu allaqachon tarang bo‘lgan vaziyatni yanada keskinlashtirdi.
Shu payt Nahuel Molina ham o‘zini tutib turolmadi. U Manchester City yarim himoyachisi Rodrini yiqitishga urindi – aynan o‘sha paytda Rodri Jahon chempionligi nishonlanayotgan lahzadan zavqlanayotgan edi. Maydon chetida esa yana bir sahna: Argentina murabbiylar shtabidan Roberto Ayala Dani Olmo tomon zarba berishga qo‘l ko‘tardi. Keyin u bu harakati uchun uzr so‘radi, ammo tasvirlar allaqachon butun dunyoga tarqalib bo‘lgandi.
De la Fuente o‘sha lahzada bo‘layotgan voqealarning barchasini ko‘rmaganini aytadi, ammo keyin hammasini qayta tomosha qilgach, pozitsiyasi qat’iy bo‘lib qoldi.
“Atrofda nima bo‘layotganini darhol anglamadim. Men o‘sha paytda bayram qilayotgan, jamoadoshlarimni quchoqlayotgan edim,” – dedi u ispan televideniyesiga. “Lekin baribir bu – chidab bo‘lmaydigan, qabul qilib bo‘lmaydigan holat, bunga yo‘l qo‘yib bo‘lmaydi. Bunday darajadagi futbolchilar – men o‘yindan oldin ham ularga yuqori baho berganman, hozir ham ularga hurmatim baland – ajoyib murabbiy boshchiligidagi katta futbolchilar. Ular ham bu reaksiyalarni ko‘rib, biz kabi o‘zlarini yomon his qilgan bo‘lishlari kerak.”
De la Fuente uchun asosiy nuqta – o‘z jamoasining javobi. U shogirdlarining bosim ostida ham sovuqqonlikni yo‘qotmagani bilan faxrlanadi.
“Men bizning o‘sha tajovuz va qo‘zg‘atuvchilikka javoban tutgan o‘zimizni alohida ta’kidlamoqchiman. Futbolchilarimiz doimo o‘zlarini tutib, haqiqiy professional kabi ish tutishdi,” – deya qo‘shimcha qildi u.
Medal marosimidagi sovuq sahna
Final yakunida Ispaniya futbolchilari raqibga hurmat ko‘rsatdi: ular Argentina futbolchilari podiumga, medallarini olish uchun yo‘l olayotganda sharaf yo‘lagini tashkil qilishdi. Bu – klassik sport odobi, yirik turnirlar tarixida ko‘p bora ko‘rilgan manzara.
Ammo keyngi lahza butun kayfiyatni o‘zgartirdi. Lionel Scaloni boshchiligidagi Argentina futbolchilari kubok topshirish marosimi paytida orqasini o‘girib ketdi, Ispaniyaning tarixiy chempionlik nishonlanayotgan onini kuzatishni istamadi. Bu harakat allaqachon keskinlashgan bahsga yangi darajadagi bahs-munozara olib kirdi.
FIFA jim turmadi. Tashkilot rasmiy bayonotida shunday deyiladi: “FIFA Intizomiy qo‘mitasi o‘yindan keyingi hodisalarga doir FDC qoidalarining mumkin bo‘lgan buzilishlarini o‘rganish uchun Intizomiy va etika bo‘yicha prokurorni tayinladi. Prokuror hisobotini yakunlagach, qo‘mita tomonidan qo‘shimcha ma’lumotlar beriladi.”
Bu – endi faqat maydon ichidagi jang emas. Endi gap intizom, obro‘ va kelajakdagi jazolar haqida ketmoqda.
Enzo Fernandezning boshqa ohangi
Argentina lageridan esa butunlay boshqa ohang eshitildi. Finalda maydondan chetlatilgan Enzo Fernandez o‘z pozitsiyasini ijtimoiy tarmoqda bildirdi. U yozganlari bilan bahs markaziga tushdi.
Chelsea yarim himoyachisi Instagram’dagi xabarida natijadan kattaroq narsaga urg‘u berdi: “Vaqt o‘tishi bilan tushunib borasan: natijaning o‘zi hammasi emas, undan ham kattaroq narsa bor.”
U bu avlodning yillar davomida mamlakatni qanday himoya qilib kelganini eslatdi: “Yillar davomida bu guruh bizni eng yaxshi tarzda ifoda etib keldi. U shuni o‘rgatadi: raqobat faqat g‘alaba qilish emas; bu – libos uchun borini berish va hech qachon taslim bo‘lmaslik.”
Fernandez o‘z xabarini faxr va kamtarlik haqidagi so‘zlar bilan yakunladi: “Har doim oldinga chiqib, eng yuqori darajada raqobatlashgan, bu ranglarni faxr, kamtarlik va fidoyilik bilan himoya qilgan guruhning bir qismi bo‘lish – imtiyoz bo‘ldi.”
Bir tomonda – De la Fuente tilga olgan “chidab bo‘lmas” sahnalar, boshqa tomonda – Argentina ichidan kelayotgan “g‘urur va kamtarlik” haqidagi da’volar. Endi so‘z FIFA intizomiy organlarida. Ular beradigan hukm nafaqat bu final xotirasini, balki kelgusi yillarda Jahon chempionati sahnasidagi o‘zaro hurmat chegaralarini ham belgilab bermaydimi?
