Ivan Fresneda: Arsenal va 80 million yevro haqidagi hikoya

Arsenal va Ivan Fresneda o‘rtasidagi uzilib-uzilib davom etayotgan “roman” yana qaytdi. Portugaliyadan chiqqan yangi xabarlar Sporting CP himoyachisini yana London klubi bilan bog‘lamoqda. Biroq bu safargi raqamlar savollarni ham o‘zi bilan olib keldi.

Eski qiziqish, yangi narx

Fresneda — hozir 21 yoshda. Arsenal uni kamida to‘rt yildan beri kuzatib keladi. U hali 17 yoshida bo‘lganida, London klubi bilan muzokaralar bo‘layotgani haqida xabarlar tarqalgan, o‘shanda bitim taxminan 15 million yevroga baholangan, shartnomasidagi band esa 30 million edi.

2023-yil yanvar oyning ochilishi bilan bu hikoya qizigan: futbolchining vakillari Londonga uchib keladi, matbuot esa kelishuv deyarli yakunlangani haqida yozadi. Hammasi tayyordek ko‘ringan, ammo transfer yozga surilgan.

Shu bilan tugamadi. Fresneda keyinchalik Mikel Arteta ishini yoqtirishini, Arsenal bilan bog‘lanayotganidan faxrlanishini ochiq aytdi. Hatto ingliz tilini o‘rganishga kirishgani ham ma’lum bo‘ldi. Bularning bari uning keyingi manzili haqida aniq ishora bo‘lib tuyulgandi.

9 millionlik burilish

Natija esa boshqacha bo‘ldi. O‘sha yozda Arsenal tomonidan moliyaviy jihatdan jozibador taklif bo‘lgani haqida xabarlar chiqqan bo‘lsa-da, Fresneda Real Valladolidni tark etib, kutilmaganda Sporting safini atigi 9 million yevroga to‘ldirdi.

Shundan so‘ng shov-shuvlar asta-sekin pasaydi. Uning nomi London bilan kamroq tilga olinadigan bo‘ldi, Sportingdagi moslashuvi va o‘sishi esa Portugaliya ichidagi mavzu bo‘lib qoldi.

Endi esa sahnaga yana Portugaliya matbuoti chiqdi.

80 millionlik band va haqiqat hissi

Record nashri xabariga ko‘ra, Fresneda Sporting bilan 2028-yil iyungacha bog‘langan. Shartnomada 80 million yevrolik band bor. Xuddi shu xabarda uning bozorida yana ikki nom tilga olinadi: Arsenal va Newcastle.

Shu yerda mantiq sinovga tushadi. Arsenalning uzoq yillik qiziqishi real. Klubning o‘ng qanot himoyasida jarohatlar sabab muammolar bo‘lgani ham sir emas. Uzoq muddatli reja uchun yosh, texnik, yuqori pressingga mos o‘ng qanot himoyachisi – bu Arteta falsafasiga mos profil.

Ammo 80 million yevro?

Hozirgi bozorda, ayniqsa Arsenalning yozda hujum va yarim himoyaga katta sarmoya kiritishi kutilayotgan pallada, o‘ng qanot himoyachisi uchun bunday miqdorni tasavvur qilish qiyin. Bu faqat klub falsafasi emas, bozor mantiqiga ham borib taqaladi: bunday narx odatda tayyor yulduzlar, jahon darajasidagi hal qiluvchi futbolchilar uchun qo‘yiladi.

Fresneda esa hali potentsial. Yuqori chegaraga ega, lekin hanuz o‘sish bosqichida.

Muzokaralar uchun karta?

Shu bois Portugaliyadagi bu xabarlar boshqacha o‘qiladi. Fresnedaning Sporting bilan shartnomasida yana ikki yil bor. Bunday pallada klub odatda shartlarni yaxshilash, maoshni oshirish va kelajakdagi transfer qiymatini yanada mustahkamlash haqida o‘ylaydi.

Arsenal va Newcastle nomining tilga olinishi esa, ehtimol, o‘sha muzokaralarda qulay pozitsiya uchun ishlatilayotgan kuchli karta bo‘lishi mumkin. Bozorga signal: “Bu futbolchi arzon emas, unga katta klublar qiziqadi”.

Arsenal tomoni esa, ehtimol, odatdagidek kuzatishda davom etadi. Ular bu futbolchini birinchi marta ko‘rayotgani yo‘q, to‘rt yillik monitoring, scout hisobotlari, avvalgi muzokaralar – bularning bari klubda allaqachon mavjud.

Savol esa o‘sha: London klubi qachondir o‘ng qanot himoyachisi uchun 80 million yevroga yaqin summa to‘lashga tayyormi?

Hozircha javob aniq ko‘rinmaydi. Ammo bir narsa ravshan: Fresneda nomi yana sarlavhalarga qaytdi. Va bu hikoyada Arsenal ismi bo‘lgan ekan, bu mavzu yoz bo‘yi tinmaydi.