Jurgen Klopp Germaniya terma jamoasini boshqaradi
Bir paytlar u Liverpoolda deyarli payg‘ambar darajasiga ko‘tarilgandi. Endi esa Jurgen Kloppdan butun bir millatni qutqarish so‘ralyapti.
Paragvay shokidan keyingi bo‘shliq
O‘tgan oy Klopp Germaniya terma jamoasining navbatdagi qulashini tomoshabinlar qatori tomosha qildi – ammo bu safar chiziq bo‘yida, teleekspert sifatida. Jahon chempionatida Paragvayga qarshi penaltilar seriyasidagi mag‘lubiyat nafaqat turnirdan chiqib ketish, balki butun tizimga urilgan zarba bo‘ldi.
Julian Nagelsmann iste’fo berdi. Germaniya futboli esa navbatdagi “kimligimiz kim o‘zi?” degan og‘ir savol bilan yuzma-yuz qoldi.
Oradan uch hafta o‘tmasdan, bo‘sh qolgan kursiga o‘tiradigan nom aniq bo‘ldi. Endi bo‘shliqni Klopp to‘ldiradi. To‘rt yillik shartnoma, qo‘lida esa mamlakatning eng og‘ir yuklaridan biri – mentalitetni qayta tiklash vazifasi.
U Yevro-2028 va 2030-yilgi Jahon chempionatigacha jamoani boshqaradi. Dastlabki sinov – 24 sentabr kuni Niderlandiyaga qarshi o‘yin. Raqib tanlangan paytdanoq bu ish oson bo‘lmasligi ayon.
Klopp bu lavozim haqida gapirar ekan, “milliy terma jamoa biz nemislarni deyarli hech narsa qila olmaydigan darajada birlashtira oladi” deya ta’kidladi. Uning uchun bu ish shunchaki navbatdagi murabbiylik bosqichi emas, balki hissiy vazifa.
DFBning orzu transferi
Liverpool bilan Chempionlar ligasi va Premyer-ligani yutgan, Borussia Dortmund bilan ikki karra Bundesliga chempioni bo‘lgan 59 yoshli murabbiy allaqachon nemis futboli tarixidagi eng yirik figuradan biriga aylangan.
Shu bois Germaniya futbol ittifoqi – DFB uchun u boshidan beri birinchi raqamli variant edi. Nagelsmann iste’fosidan so‘ng tashkilot rahbariyati Kloppni qo‘lga kiritish uchun deyarli hamma narsani ishga soldi.
DFB prezidenti Bernd Neuendorf uni “jo‘shqinlik, ishonchlilik va odamlarni ruhlantira olish qobiliyatining timsoli” sifatida ta’riflab, Nagelsmann ketgan zahoti Klopp yagona va muqobilisiz nomzod bo‘lganini ochiq aytdi. So‘zlar ortidan amallar keldi – kelishuv rasmiylashdi.
Klopp 2030-yilgacha mo‘ljallangan shartnomaga imzo chekdi va murabbiylar shtabini ham tanish yuzlar atrofida quradi. Uning yonida Liverpooldagi sobiq yordamchilari Pep Lijnders va Peter Krawietz bo‘ladi. Ular birga Premyer-ligada tarixiy davr yaratgan, endi esa Germaniyada yana bir “titan”ni oyoqqa turg‘azish vazifasi oldida turibdi.
Xalq ishonchi – raqamlar va kayfiyat
Kloppning nomi e’lon qilingach, Germaniyada bahslar darhol avj oldi. Biroq kayfiyatni birgina so‘rovnoma ham ko‘rsatib qo‘ydi.
Kicker jurnalining so‘roviga qatnashganlarning 80 foizi Kloppni to‘g‘ri tanlov deb hisoblagan. Bu – futbol jamoatchiligi ichida hamon katta ishonch borligini anglatadi.
So‘nggi yillarda terma jamoaga eng ko‘p qo‘yilgan ikki ayb bor: g‘alaba mentalitetining yo‘qolishi va muxlislar bilan aloqaning uzilishi. Klopp esa butun faoliyati davomida “mentallitet monstrlari” haqida gapirib kelgan, boshqargan har bir klubida kult qahramonga aylangan murabbiy. Nazariy jihatdan u aynan shu ikkala muammoning ham yechimiga o‘xshaydi.
Doppelpass ko‘rsatuvida sobiq Germaniya va Bayern Munich yarim himoyachisi Stefan Effenberg Klopp mamlakat bo‘ylab “yangi optimizm ruhi”ni olib kirishi mumkinligini aytdi. Borussia Dortmund bosh ijrochi direktori Carsten Cramer esa uning ta’siri sport chegarasidan ham oshib ketishi mumkinligini ta’kidladi: Klopp hozirgi Germaniya futboli va jamiyati yetishmayotgan ko‘plab fazilatlarni mujassam etganini uqtirdi.
Red Bull soyasi va xafsalasi pir bo‘lgan muxlislar
Ammo hamma ham yangi bosh murabbiydan mamnun emas. Kloppning obro‘si ayniqsa 2024-yilda Red Bull global futbol bo‘yicha rahbari etib tayinlangach sezilarli darajada zarba yedi. Ko‘plab muxlislar buni xiyonat deb qabul qildi.
Germaniyada Red Bull yillar davomida ko‘p tanqidga uchragan: ko‘p klublik modeli, mashhur 50+1 qoidasini amalda chetlab o‘tish, klublarda muxlislarning ovoz huquqini cheklash – bularning bari jamoatchilikni asabiylashtirib keladi.
Shu fon’da iyul oyida tarqalgan xabarlar, ya’ni Klopp Germaniya terma jamoasini boshqargan holda ham Red Bull brend elchisi bo‘lib qolishi mumkinligi haqidagi mish-mishlar haqiqiy portlashga sabab bo‘ldi.
Sobiq DFB prezidenti Theo Zwanziger buni “mutlaq mumkin emas” deb atadi, Red Bullni sport ichida hokimiyatni qo‘lga kiritishga urinayotgan kuch sifatida tasvirlab, ogohlantirdi. Unsere Kurve muxlislar guruhi esa DFB kapital oldida tiz cho‘kmasligi, Red Bullga Kloppni “o‘z ro‘yxatida” saqlab qolishga yo‘l qo‘ymasligi kerakligini bildirdi.
Guruh vakili Thomas Kessen SID agentligiga bergan intervyusida: “Uni yana bir bor ‘Messiya’ sifatida ulug‘lashdan oldin, ayniqsa Dortmund muxlislari orasida u qanchalik ishonchni yo‘qotganini eslashimiz kerak”, deya keskin fikr bildirdi.
“Yamog‘” bo‘ladigan murabbiymi?
Bahslar faqat Red Bull atrofida emas. Ayrimlar DFBning Kloppga bo‘lgan shoshilinch harakati, Nyu-Yorkka maxsus delegatsiya uchib ketgani, deyarli boshqa nomzodlar ko‘rib chiqilmagani haqida ham savol qo‘yishmoqda.
2014-yilgi jahon chempioni Bastian Schweinsteiger ARD efirida shunday dedi: Klopp birinchi raqamli nomzod ekani tushunarli, ammo bu shoshma-shosharlik DFBda haqiqatan ham muqobil reja bo‘lganmi, degan savolni tug‘diradi. Uning fikricha, Klopp hozircha faqat “yamoq” bo‘lishi mumkin, chunki Germaniyaning muammolari faqat texnik zona bilan cheklanib qolmaydi.
Bu tanqidlar asossiz emas. Germaniya terma jamoasi so‘nggi uchta Jahon chempionatida ham nimchorakka ham chiqa olmadi. Bu – butun bir avlod uchun tushkunlik, tarixiy mezonlar bilan o‘lchaganda esa fojia darajasidagi natija.
Ko‘plab mutaxassislar singari Kloppning o‘zi ham muammo ildizi ancha chuqurda ekanini ochiq tan olgan. U yaqinda MagentaTVga bergan intervyusida: gap faqat bosh murabbiyda emasligini, nemis futboli burilish nuqtasida turganini, tizim bo‘ylab fundamental o‘zgarishlar zarurligini aytdi.
Birinchi sinov: Niderlandiya va Nations League
Klopp uchun qayta qurish sentabrda boshlanadi. Germaniya Nations League doirasida ilk o‘yinini tarixiy raqib – Niderlandiyaga qarshi o‘tkazadi. Bu nafaqat turnir ochilish o‘yini, balki yangi davrning ohangini belgilab beradigan sinov bo‘ladi.
Ammo asosiy bosqich ikki yildan keyin kutib turibdi. Yevro-2028ga mezbonlikni Buyuk Britaniya va Irlandiya qo‘lga kiritgan. Turnir Klopp uchun ham o‘ziga xos dramatik sahnaga aylanishi mumkin.
Ironiya shundaki, u Liverpoolga qaytishi ehtimoli bor – ammo bu safar boshqa qirg‘oqda. Anfield Yevro-2028 mezbon stadionlari ro‘yxatiga kirmagan, biroq Germaniya Evertonning Hill Dickinson Stadium maydonida o‘ynashi mumkin.
O‘sha paytga kelib, savolga javob ancha ravshanlashadi: Liverpooldagi “najotkor” Germaniya uchun ham mo‘jiza yaratishga qodirmi yoki bu safar sehr yetmay qoladimi?
