Leicester City: yozgi bozor va 81-daqiqadagi zarba
League One’da yangi hayot boshlayotgan Leicester City uchun yozgi bozor hali tugamadi. Russell Martin bunga tayyor turish kerakligini yaxshi biladi. U buni yashirmayapti ham.
Klub tarkibni ixchamlashtiryapti, byudjet va daromadlar yangi darajaga moslanmoqda, demak, ketishlar davom etishi tabiiy. Eng katta savol ostida turganlar – belgiyalik markaziy himoyachi Wout Faes va qanotdagi tezkor hujumchi Stephy Mavididi.
Ikkalasi ham mavsumoldi yig‘inida faol qatnashdi, Mavididi hatto bir hafta avval Northamptonga qarshi EFL Cup uchrashuvida asosiy tarkibda maydonga tushgandi. Ammo shanba kuni Notts Countyga qarshi ochilish o‘yinida ikkisining ham qaydnoma tashqarisida qolishi – bu endi tasodif emas, aniq signal.
Martin ochiq gapirdi: tarkibni rejalashtirishda ularni bor deb emas, yo‘q deb o‘ylab harakat qilayapti.
“Biz o‘zgarishlarni imkon qadar eng yaxshi usulda boshqaryapmiz, – dedi u BBC Radio Leicester’ga. – Ular juda hurmat bilan munosabatda bo‘lishyapti, biz ham ularga hurmat ko‘rsatmoqdamiz. Ular bu yerda ekan, mashg‘ulot qilishadi, jarayonga qo‘shilishadi. Lekin biz o‘zimizni ularsizga tayyorlashimiz kerak deb hisoblaymiz.”
Bu so‘zlar ortida aniq reallik yotibdi: klub ikkala futbolchi uchun ham takliflarni rad etgan, lekin qiziqish darajasi yuqori, jarayon davom etyapti. Martin hozircha tezkor yakun kutmayapti, ammo yozgi oynaning yopilishi bilan Faes va Mavididi hanuz bu yerda bo‘lishiga ham kafolat yo‘q.
“Agar qolishsa – muammo yo‘q, ikkalasining ham bu yerda bo‘lishidan xursand bo‘lamiz. Lekin ularga bo‘lgan qiziqish darajasi yuqori. Ikkalasiga ham takliflarni rad etdik, jarayon davom etyapti. Qachon yakunlanishini esa ayta olmayman, yaqin kunlarda biror narsa bo‘lishiga ishonchim komil emas,” – deya qo‘shimcha qildi Martin.
81-daqiqadagi zarba va yoshlar “tensiyasi”
Meadow Lane’dagi ochilish o‘yini Leicester City uchun ruhiy jihatdan juda muhim bo‘lishi mumkin edi. G‘alaba – yangi bosqichga ishonchli qadam, yangi murabbiy uchun ilk kuchli signal bo‘lardi. Ammo 81-daqiqada kiritilgan gol barchasini o‘zgartirdi. Uch ochko qo‘ldan chiqdi, o‘yin durang bilan yakunlandi va Martin bunga jamoa ichidagi “tashvish” va “tensiya” sabab bo‘lganini aytdi.
Uning ta’kidlashicha, oxirgi 20 daqiqada to‘p bilan muomala keskin pasayib ketgan, bu esa jamoani o‘ziga to‘p qayta-qayta qaytadigan, o‘z uslubiga mos bo‘lmagan o‘yinga majbur qilgan.
“Eng katta xulosa shuki, agar biz bir-birimizni to‘p bilan qo‘llab-quvvatlamasak, ayniqsa oxirgi 20 daqiqadagi kabi, o‘yin shunday ko‘rinish oladi va bu bizga mos kelmaydi,” – dedi u. – “Bir-ikki lahza bizni asabiylashtirdi, shundan keyin o‘z maydonimizda to‘p bilan yetarlicha intensivlik va aniqlik bilan o‘ynay olmadik, to‘p qayta-qayta biz tomonga qaytaverdi.”
Bu – League One’dagi birinchi dars. Yoshlar ligasi emas, kichik xatolar jazolanuvchi marafon.
Yangi qahramonlar uchun eshik ochiq
Shunga qaramay, Martin o‘z jamoasidan ko‘p narsani yoqtirganini alohida urg‘uladi. Ayniqsa, maydonga zaxiradan tushgan hujumchi Admir Bristricning debyuti bilan bog‘liq lahzalar unga umid berdi. Yakuniy daqiqalarda hujum chizig‘ida paydo bo‘lgan uchlik – Bristric boshchiligidagi juda yosh front.
“Guruhdan juda xursandman, chin dildan,” – dedi Martin. – “Ular juda yosh, buni oxirida ko‘rdingiz. Admir maydonga tushgach, oldingi uchlik juda yosh bo‘lib qoldi.”
Bu esa yana bir haqiqatni yuzaga chiqaryapti: Leicester Cityga hali ham tajribali futbolchilar kerak. O‘yinni “o‘ldirishni” biladigan, hisobni ushlab turishni, ritmni pasaytirishni yoki aksincha, bosimni oshirishni boshqarib bera oladigan futbolchilar.
Martin buni ham yashirmadi:
“Bizga, ehtimol, shunday o‘yinlarni boshqarishga yordam bera oladigan, bu yo‘ldan allaqachon o‘tgan bir-ikki futbolchi kerak bo‘lishi mumkin. Ko‘ramiz. Lekin keyingi bir-ikki kun ichida hech narsa kutilmayapti.”
Yozgi oyna hali ochiq, Faes va Mavididi atrofidagi shovqin bosilgani yo‘q, tajribali o‘yinchilar qidiruvi davom etyapti. Shu orada esa Martin juda yosh, lekin quvvatga to‘la guruh bilan League One marafonini boshlab yubordi.
Savol bitta: bu yosh jamoa bosim, bozor va “tensiya”ni yengib o‘tib, Leicester Cityni yana yuqoriga olib chiqishga qodirmi?
