Liverpool va Barcola: yozgi transferning eng katta zarbasi
Anfield bu yozda allaqachon bir qanotchini kutib oldi. Osasuna’dan kelgan ispaniyalik Victor Munoz uchun taxminan 40 million yevro to‘langan. Lekin bu Liverpoolning qanotdagi ishlarini yopib qo‘ymaydi. Aksincha, bu faqat birinchi qadamga o‘xshaydi.
Klub ichida bitta savol allaqachon kun tartibida turibdi: Mohamed Salah ketganidan keyin hujumning o‘ng tomoni kimga ishonib topshiriladi?
Diomande rejasi qulab tushdi, yo‘l Barcola tomon ochildi
Yoz boshida RB Leipzig hujumchisi Yan Diomande Liverpoolning asosiy nishoni edi. Reja oddiy ko‘rinar edi: Salahdan keyingi davrni Diomande bilan boshlash. Ammo manzara birdaniga o‘zgardi – Kot-d’Ivuar terma jamoasi a’zosi Parijni tanladi va PSG bilan kelishishga yaqinlashdi.
Aynan shu burilish Liverpool uchun yangi eshikni ochishi mumkin. Diomande uchun kurashdan chekinish fonida ko‘p o‘tmay bir savol paydo bo‘ldi: agar PSG Diomande’ni olib kelsa, Bradley Barcola bo‘shab qolmaydimi?
Avvaliga Parijda javob qat’iy edi: Barcola bu yozda sotilmaydi. Lekin vaziyat o‘zgardi.
Transfer bozorini yaqindan kuzatib boradigan Fabrizio Romano so‘nggi kunlarda aynan shuni ta’kidladi: Barcola endi “dast tegmas” emas. Uning aytishicha, fransiyalik qanotchining yozgi transfer oynasida klubni tark etish ehtimoli jiddiy ko‘tarilgan, eng muhimi – bu pozitsiya aprel oyidan beri o‘zgarmagan.
Romano yana bir muhim detaldan ogohlantirdi: Liverpool va Arsenal allaqachon Barcola bo‘yicha aloqaga chiqqan. Liverpool esa uni 2025-yilgi yozgi oynadan beri o‘zining yuqori darajadagi nishonlari ro‘yxatining eng yuqori qismida ushlab turibdi.
Arsenal uchun esa vaziyat boshqacha: u yerda asosiy maqsad – Rogers, Barcola esa ikkinchi raqamli variant sifatida baholanmoqda. London klubi boshqa qanotchilarni ham ko‘zdan kechirmoqda.
PSG bilan muzokaralar muzlab qolgan, narx esa osmonda
Parijda Barcola atrofidagi fon tobora taranglashib bormoqda. Yangi shartnoma bo‘yicha suhbatlar deyarli to‘xtagan, muzokaralar ancha vaqtdan beri qotib qolgan. Hozircha tomonlar o‘rtasida yangi bitim bo‘yicha hech qanday kelishuv yo‘q.
Bu esa transfer bozorida bitta aniq xabarni anglatadi: to‘g‘ri taklif bo‘lsa, PSG eshikni yopib o‘tirmaydi.
Biroq bu “to‘g‘ri taklif” oddiy summa emas. Manbalarga ko‘ra, PSG Barcola uchun taxminan 150 million yevro so‘ramoqchi. Bu 23 yoshli futbolchi uchun ulkan narx va bu bitim amalga oshsa, nafaqat Liverpool, balki Britaniya futboli tarixidagi eng qimmat transferlardan biriga aylanadi.
Liverpool o‘tgan yozda Alexander Isak uchun 125 million funt to‘lagan edi. Barcola kelishi uchun bu rekord yangilanishi kerak bo‘ladi.
“Yashirin baraka”: Diomande o‘rniga Barcola?
Bunday narxlar fonida savol tabiiy: Liverpool bu riskka boradimi?
Sobiq “qizillar” yarim himoyachisi Danny Murphy nazarida, Diomande bo‘yicha bitimning amalga oshmay qolishi klub uchun “berilgan dars” bo‘lishi mumkin. U Diomande uchun 100 million funtdan ortiq to‘lash fikrini boshi berk ko‘chaga o‘xshatadi: futbolchi iqtidorli, lekin hali bu miqdorni oqlaydigan darajada “tayyor mahsulot” emas.
Murphy fikricha, bunday sarmoya faqat istiqbol uchun emas, bugun ham yuqori darajada o‘yin taqdim eta oladigan futbolchiga yo‘naltirilishi kerak.
Barcola bu nuqtada boshqa tipdagi variant sifatida ko‘rinadi. U allaqachon PSG safida, xususan, Yevropa sahnasida o‘yin taqdirini o‘zgartira olishini ko‘rsatgan. Murphy nazarida, bu uni kamroq xavfli transferga aylantiradi.
Biroq bir muammo bor: Barcola tabiatan chap qanotda o‘zini erkinroq his qiladi. U o‘ng tomonda ham o‘ynay oladi, lekin bu uning eng tabiiy pozitsiyasi emas. Salah o‘rnini to‘ldirish haqida gap ketar ekan, bu omilni e’tiborsiz qoldirib bo‘lmaydi.
Shunga qaramay, Murphy bitta savolni ochiq qoldiradi: agar bozorga qaralsa va mavjud variantlar solishtirilsa, Barcola darajasidagi futbolchini “yo‘q” deyish qanchalik oson bo‘ladi?
Liverpool uchun qimmat, lekin zarur qayta qurish
TEAMtalk xabariga ko‘ra, Liverpool allaqachon Barcola bo‘yicha “sezilarli darajada yashil chiroq” olgan. Futbolchining atrofidagi guruh yozda klubdan ketish variantlarini faol o‘rganmoqda. Agar u PSGning navbatdagi shartnoma taklifini rad etsa, Parij klubi og‘ir yurak bilan bo‘lsa-da, transferni ko‘rib chiqishga tayyor.
Bu esa Anfield uchun eshik ochiq degani, lekin narxni unutmaslik kerak: 150 million yevroga yaqin summa klub siyosati, maosh tizimi va butun transfer strategiyasini qayta o‘ylashga majbur qiladi.
Liverpool hozir murakkab davrda. Jamoa tarkibi yangilanmoqda, bir necha mavsumlik tayanch futbolchilar ketishi yoki qarib borishi fonida klub qayta qurilish bosqichiga kirgan. Savollar ko‘p, javoblar esa hali yetarli emas.
Shu fon’da Barcola transferi bitta oddiy qaror emas. Bu kelgusi yillarda Liverpool qanday bo‘lishini belgilab beradigan, Salahdan keyingi davrga qanday kirib borishini ko‘rsatib qo‘yadigan signal bo‘lishi mumkin.
Endi navbat bitta savolda: Anfield bu yozda xavfga boradimi yoki Barcola nomi yana bir yo‘qolib ketgan imkoniyat sifatida eslanib qoladimi?
