Luka Modrich VAR bo‘yicha keskin chiqishi: penaltini berishmasligi kerak edi

Xorvatiya sardori Luka Modrich yana VAR haqida gapirdi – va bu safar ohang yanada keskinroq edi. Maydondagi mag‘lubiyat og‘ir bo‘ldi, lekin uni chindan ham kuydirgan narsa ekranda chizilgan chiziqlar va monitor ortidan berilgan qaror bo‘ldi.

Modrich uzoq vaqtdan beri VARga ishonmasligini yashirmaydi. Uningcha, texnologiya o‘yinni adolatli qilish o‘rniga, noaniqlik va ikki xil talqinga yo‘l ochib beryapti. Sardor fikricha, tizim faqat bitta holatda ishga tushishi kerak: hakam “mutlaqo aniq va oshkora xato” qilganida.

Uning g‘azabini portlatgan epizod – bahsli penaltidan keyingi lahza. Modrichga ko‘ra, bu yerda “aniq xato” haqida gap bo‘lishi ham mumkin emas.

U shunday deydi, “Ha, biz ko‘proq narsaga loyiq edik. Ba’zi narsalar biz tomonga ishlamadi. O‘sha penalti… Agar vaziyat teskari bo‘lganida, VAR umuman aralashmagan bo‘lardi. VAR ilk bor joriy qilinganda ham aytgandim, yoqmasligini.”

Bahs markazida – jarima maydonidagi kurash. Modrichning talqinida, bu oddiy o‘yin epizodi, unda ikki futbolchi ham jismoniy kurash olib borgan, xolos. “Bu penalti emas. Ikkala futbolchi ham o‘ynayapti, itarish bor, [Nikola] Vlasic tortgani yo‘q, u faqat ushlab turdi va ikkalasi ham yiqildi. Shuning uchun bunday o‘yinda bunday penaltini qo‘yib bo‘lmaydi”, – deya ta’kidlaydi u.

Modrichning asosiy da’vosi – mezon yo‘qligi. Bir o‘yinda penalti bo‘lgan epizod, boshqasida davom ettiriladi. Xorvatiya esa, uning so‘zlariga ko‘ra, bu noaniqliklardan doim yutqazib chiqadi. “Shu sababdan aytyapman, u faqat xato ‘200 foiz’ bo‘lganda ishlatilishi kerak. Agar bir holatni u yoq-bu yoqqa talqin qilish mumkin bo‘lsa, sening gaping o‘tmaydi. Bu meni asabiylashtiradi va har doim bizning zararimizga ishlaydi”, – deydi sardor.

Bu shikoyat faqat bitta o‘yinning alamidan tug‘ilgan hissiyot emas. Modrich bu mavzuga birinchi bor qaytayotgani yo‘q. U uchun VAR – futbolning tabiiy ritmini buzadigan, hakamning maydondagi avtoritetini yemiradigan va eng muhimi, o‘yinchilarda adolatsizlik hissini kuchaytiradigan omilga aylangan.

Texnologiya futbolni “xatolardan tozalash” uchun kiritilgandi. Ammo Modrich kabi tajribali futbolchilar bu jarayonda yana bir savolni o‘rtaga tashlayapti: agar “aniq adolat” va’da qilingan bo‘lsa, nega bahsli vaziyatlar va alamli shubhalar kamaymadi?

Xorvatiya sardori uchun hozircha javob bitta: VAR faqat og‘ir xatoni tuzatishi kerak, lekin maydonni boshqarishni emas, o‘yinning ruhini esa umuman emas.