Mackenzie Dern: Yan Xiaonan bilan jangdan keyingi o'zgarishlar
Mackenzie Dern besh bor mag‘lub bo‘lgan. Lekin ularning faqat bittasini “burilish nuqtasi” deb ataydi. Chunki o‘sha kecha bo‘lmaganda, bugun u UFC strawweight chempioni bo‘lmasligi mumkin edi.
2016-yilda professional oktagonga qadam qo‘ygan, 2018-yil martida UFC sahnasiga chiqqan Dern uzoq vaqtgacha o‘zini bir narsaga ishontirib yashadi: u, avvalo, braziliyalik jiu-jitsu yulduzi. Qolgan hammasi – ikkinchi planda. Oktabr 2022, UFC Fight Night 211, bosh jang. Raqib – Yan Xiaonan. Ana shu kecha bu tasavvur butunlay buzildi.
Jiu-jitsu qahramoni emas, to‘liq MMA jangchi
Xiaonan bilan bo‘lgan o‘sha jangda Dern ko‘p narsa ko‘rdi. Uch hakamdan biri durang berdi, qolgan ikkitasi esa g‘alabani Xianonga yozdi. Rasmiy bayon: majority decision. Natija – mag‘lubiyat. Ammo Dernning ichki tarozisida hammasi boshqacha edi.
U o‘sha lahzalarni eslar ekan, o‘zini “ko‘chadagi janjalda yutgan qiz”dek his qilganini tan oladi. Jiu-jitsu mezonlariga ko‘ra, u raqibini xavf ostiga qo‘ydi, oxirgi daqiqalarda bo‘g‘ish bilan jangni tugatishga juda yaqin keldi. Ammo hakamlar boshqa sportni baholashardi – bu endi sof jiu-jitsu emas, bu MMA edi.
Shu yerda hammasi o‘zgardi.
Dern hakamlar qanday o‘ylashini, nimani “ustunlik” deb ko‘rishini anglay boshladi. Association of Boxing Commissions qoidalari bo‘yicha ishlaydigan hakamlar uchun zarba – ko‘rinadigan xavf. Raqibning boshi chayqaladi, tizzasi bukiladi, ko‘zida dovdirash paydo bo‘ladi – bu ularning “knockdown”i.
Jiu-jitsu olamida esa xavf boshqacha yashirinadi. Bo‘g‘ishdan oldingi so‘nggi nafas, bukilishga chiday olmayotgan tirsak, bo‘g‘imning “chirt” etishga bir qadam qolgani – bularni faqat gilam ustida, ichkarida turganlar his qiladi. Tashqaridan esa hammasi “oddiy kurash” bo‘lib ko‘rinadi.
Dern aynan shuni anglaganini aytadi: u endi faqat bo‘g‘ishga shoshiladigan jiu-jitsu qizi emas. U o‘yin qurishni, vaziyat tayyorlashni, zarba va kurashni bir-biriga ulashni o‘rgandi. Avval hujumga otilib ketadigan bo‘lsa, endi jangni “o‘qib”, raqibni sekin-sekin tuzoqqa olib kiradigan bo‘lib qoldi.
O‘sha mag‘lubiyat uning ongida tugagan eski bo‘lim bo‘ldi. Yangi bo‘lim esa – to‘liq shakllangan MMA jangchi Mackenzie Dern.
Bo‘shagan taxt, yangi malikasi
33 yoshli Dern o‘tgan yil oktabrida nihoyat cho‘qqiga chiqdi. Zhang Weili bo‘shatgan 115 funtlik kamar uchun jangda u Virna Jandirobani mag‘lub etdi va bo‘sh turgan taxtga o‘tirdi.
Bu faqat kamar emas edi. Bu – Yan Xiaonan kechasida tug‘ilgan yangi mentalitetning tasdig‘i bo‘ldi.
Endi oradan qariyb o‘n oy o‘tdi. Chempionlik eforiyasi ortda qoldi, kamar yelkasiga o‘rganib qoldi, lekin u bilan birga bosim ham og‘irlashdi. Birinchi himoya har doim boshqa. Ayniqsa, raqib jangni yerda ham, tik turgan holatda ham qabul qila oladigan Gillian Robertson bo‘lsa.
Philadelphia sahnasi va sinovga tayyor chempion
Shanba kuni Xfinity Mobile Center Arena, Philadelphia. UFC 330 co-main event. Kamar o‘rtada. Dern – himoyada, Robertson – ovda.
Dern bu jangga allaqachon boshqacha ko‘z bilan qarayapti. U endi hakamlar zalda nimani ko‘rayotganini, zarba va pozitsiya o‘rtasidagi nozik balansni, tomoshabinlar reaksiyasi qanchalik ruhiy bosim yaratishini biladi. U uchun har bir raund – nafaqat raqibga, balki hakamlar stoliga ham ishontirish zarur bo‘lgan kichik jang.
Uning aytishicha, Yan Xiaonan bilan bo‘lgan o‘sha mag‘lubiyat aynan shunga o‘rgatdi: faqat bo‘g‘ish bilan emas, butun jang manzarasi bilan g‘alaba qozonish kerak.
Endi savol bitta: o‘sha achchiq kecha yaratgan yangi Mackenzie Dern, Philadelphia yoritgichlari ostida chempion sifatida ham shunday sovuqqon va hisob-kitobli bo‘lib qola oladimi?
