Madringdagi FP1: Russell va Hamiltonning tezlikdagi kurashi

Formula 1 taqvimi yangi nomni qabul qildi – Madring. Yangi asfalt, yangi chegaralar, yangi xatolar uchun joy. Birinchi bo‘lib esa uni o‘ziga bo‘ysundirgan odam – Mercedes poygachisi George Russell bo‘ldi.

U FP1 yakunida 1:34.077 bilan tepadan joy oldi. Yangi trassada tarixga birinchi raqamni aynan u yozdi. Yonida esa ikkinchi bo‘lib Kimi Antonelli, uchinchi bo‘lib Charles Leclerc paydo bo‘ldi. Lekin mashg‘ulotning haqiqiy markazida boshqa ism turardi.

Bu – Lewis Hamilton edi.

Tezliklar qulflari ochildi: Hamiltonning erta zarbasi

Sessiya boshlanishi o‘ziga xos bo‘ldi: 22 ta mashinadan 20 tasi ilk 100 soniya ichida trekka otilib chiqdi. Nico Hülkenberg va Franco Colapinto esa shoshilmadi, biroz kechroq qo‘shildi.

Dastlabki uchish aylanalari ehtiyotkorona kechdi – haydovchilar 1:42–1:45 oralig‘ida aylanib, yangi trassani “o‘qib” chiqishdi. Shundan keyin esa uch ism sahnaga chiqdi: Hamilton, Max Verstappen va Lando Norris. Ular birinchi urinishdayoq 1:39 ga tushishdi va Madringning haqiqiy tezlik chegarasi qayerdaligini ko‘rsatishdi.

Bosim oshdi. Vaqtlar ketma-ket yiqila boshladi.

Atigi sakkiz daqiqada Hamilton 1:36.066 ga tushdi. U barqaror ravishda hammadan tez edi, tempni ushlab, belgilangan me’yorni ketma-ket yangiladi: 1:35.563, so‘ng 1:34.803. Ferrari mashinasi Madring asfaltini ilk bor haqiqiy sinovdan o‘tkazayotgan edi.

Leclerc 0.120 soniyaga tezroq aylanib, uni pastga tushirishga ulgurdi, ammo Hamilton javob qaytardi – 1:34.620. Va bu hali ham o‘rta qattiqlikdagi shinalarda edi.

Softlarga o‘tish va Mercedes zarbasi

Sessiyaning birinchi yarmi deyarli to‘liq medium shinalarda o‘tdi. Faqat Gabriel Bortoleto qattiq (hard) komplektda qoldi. So‘ngra paddok kutgan pallaga yetib keldi – yumshoq, ya’ni soft shinalar maydonga tushdi.

Antonelli va Russell darhol hujumga o‘tdi. Har biri ikki martadan urinish qildi, lekin Hamiltonning mediumdagi 1:34.620 ko‘rsatkichini buzisholmadi. Antonelli 0.063, Russell 0.109 soniyaga yetmay qoldi.

Bosim kuchaydi. Madring ustidan ilk real jang boshlandi.

Russell uchinchi urinishda zarbani topdi: 1:34.145. Bu uni tepa pog‘onaga olib chiqdi. Oradan ko‘p o‘tmay u bu vaqtni ham yaxshiladi – 1:34.077. Antonelli esa 1:34.363 bilan Mercedes uchun 1–2likni ta’minladi.

Ferrari oldingi zarbasiga qaramay, softlarda bunday javob qaytara olmadi. Leclerc uchinchi bo‘lib qoldi, Hamilton esa umuman boshqa yo‘lni tanladi – uning eng yaxshi vaqti baribir mediumda qolib ketdi. Sessiyada faqat ikki haydovchi – Hamilton va Yuki Tsunoda – o‘zining eng tez vaqtini yumshoq shinada qayd eta olmadi. Tsunoda esa bunga texnika sababli ham ulgurmay qoldi: Racing Bulls bolidi 25 daqiqa qolganida rul boshqaruvi (power steering) muammosi tufayli chetga chiqdi.

Xatolar, chiqib ketishlar va xavfli uchrashuvlar

Yangi trassa haydovchilarni tezda kechirmadi. Leclerc ham, Hamilton ham 17-burilda keng chiqib ketishdi. Leclerc o‘zining shaxsiy natijasini ozgina yaxshiladi, Hamilton esa chegarani izlab yurib, yana ham ko‘proq e’tibor markaziga chiqdi – bu safar nafaqat tezligi, balki joylashuvi bilan.

Sessiyaning asosiy bahsli lahzasi Arvid Lindblad bilan bog‘liq bo‘ldi. U tez aylanada ketayotgan paytda La Monumental sektorida sekin harakatlanayotgan Antonelli va Hamiltonning mashinalariga duch keldi. Tezkor, ko‘r-ko‘rona burchakda ikki sekin mashina – yosh haydovchi uchun bu mutlaqo yoqimsiz manzara.

Lindblad radio orqali keskin norozilik bildirdi, aynan qaysi so‘zlarni ishlatgani ma’lum, lekin mazmuni bitta edi: bu vaziyatni u nafaqat g‘alati, balki xavfli deb baholadi va bu ikki haydovchi bilan bunday holat ikkinchi marta takrorlanayotganini ta’kidladi.

Hamilton uchun bu bilan ham tugamadi. U yana bir necha bor raqiblarning tez aylanalariga xalal bergani uchun tilga olindi – bu safar jamoa ichida ham, tashqarida ham. Leclerc va Hülkenberg bilan bog‘liq epizodlar qayd etildi, Carlos Sainz esa La Monumentalda Hamilton uni qanday o‘tkazib yuborganidan norozi bo‘ldi.

Madringdagi ilk sessiya – va allaqachon hakamlar, stewardlar, protokollar uchun ish yetarli.

Orqa fon: Verstappen, Norris va o‘rtadagi jang

Tepada Mercedes va Ferrari o‘zaro joy almashayotgan bir paytda, Max Verstappen beshinchi bo‘ldi – 1:34.703, softlarda. Uning ortidan Lando Norris (1:34.947) keldi. Norris va McLaren Madringni qanday “o‘qigani”ni hali to‘liq ko‘rmadik, lekin ilk ritm yomon emas.

Lindblad kuchli oltitalikdan ozgina ortda qolib, 1:35.033 bilan yettinchi bo‘ldi va o‘rtadagi guruhdan aniq ajralib chiqdi. Oscar Piastri sakkizinchi, Hülkenberg to‘qqizinchi, Liam Lawson o‘ninchi bo‘ldi. 9–13-o‘rinlar oralig‘ida Hülkenberg, Lawson, Bortoleto, Esteban Ocon va Colapinto 1:35.5–1:35.9 oralig‘ida jam bo‘lishdi – Madringning ilk kunida o‘rtadagi jang naqadar zich bo‘lishini ko‘rsatadigan diapazon.

Pierre Gasly 14-o‘rinda, Fernando Alonso esa 15-pog‘onada qayd etildi. Lekin kontekst bu yerda muhim: Aston Martinning hozirgi holatidan kelib chiqsak, bu natija Ispaniya qahramoni uchun ma’lum ma’noda ijobiy signal bo‘lib ko‘rindi. Uning ortidan bir Haas, ikkala Williams, ikkala Cadillac va Lance Stroll keldi.

Sergio Perez va Valtteri Bottas Madringdagi ilk FP1ni jadvalning eng pastki ikki pog‘onasida yakunladi. Cadillac loyihasi uchun bu boshlanish savollarni ko‘paytiradi, javoblar esa hali ko‘rinmayapti.

Raqamlar tilida Madring: FP1 yakuni

Rasmiy natijalar Madringning ilk ertalabini quyidagicha chizdi:

1-o‘rin: George Russell – 1:34.077, soft
2-o‘rin: Kimi Antonelli – +0.286, soft
3-o‘rin: Charles Leclerc – +0.459, soft
4-o‘rin: Lewis Hamilton – +0.543, medium
5-o‘rin: Max Verstappen – +0.626, soft
6-o‘rin: Lando Norris – +0.870, soft
7-o‘rin: Arvid Lindblad – +0.956, soft
8-o‘rin: Oscar Piastri – +1.071, soft
9-o‘rin: Nico Hülkenberg – +1.452, soft
10-o‘rin: Liam Lawson – +1.462, soft

Quyi qismda esa:

Gabriel Bortoleto 11-o‘rin, Esteban Ocon 12, Franco Colapinto 13, Pierre Gasly 14
Fernando Alonso 15, Oliver Bearman 16, Carlos Sainz 17
Yuki Tsunoda 18 (rul boshqaruvi muammosi tufayli erta to‘xtadi)
Lance Stroll 19, Alexander Albon 20
Sergio Perez 21, Valtteri Bottas 22

Oldinga qarab: yangi trek, eski savollar

Madring birinchi zarbani berdi: qaysi mashina yangi konfiguratsiyaga tezroq moslashadi, kim chegaralarni ko‘proq bosadi, kim esa stewardlar bilan ko‘proq ishlashga majbur bo‘ladi?

Mercedes ilk soatda tepadan joy oldi, lekin Ferrari ham, Red Bull ham o‘z kartalarini to‘liq ochgani yo‘q. Hamilton allaqachon tezlik, xatolar va mojarolar markazida. Madring esa shafqatsiz savolni qo‘yib turibdi:

Kim birinchi bo‘lib bu yangi asfaltni nafaqat tezlik, balki mukammal ijro bilan zabt etadi?