Malayziya Formula 1 Kalendarini Qutqarishi Mumkin
Malayziya yana Formulaga qaytishi mumkin. Bu safar qahramon sifatida emas, kalendarni qutqaruvchi sifatida.
Yaqin Sharqdagi urush erta-mavsumdagi poygalarni chilparchin qildi: Bahrain ham, Saudiya Arabistoni ham bekor qilindi. AQSh–Isroil va Eron o‘rtasidagi urush shunchaki siyosiy fon emas, Formula 1 taqvimini ham larzaga keltirgan asosiy omil bo‘lib turibdi. O‘tgan oyda e’lon qilingan sulh qisqa muddatga umid uyg‘otgandi – ehtimol, Baku va Singapore bosqichlari orasidagi bo‘sh haftada Bahrain Grand Prix qaytar, degan hisob-kitoblar paydo bo‘lgandi.
Ammo front chizig‘ida yana olov ko‘tarildi. Mintaqadagi keskinlik kuchayib borar ekan, Bahrain rejasi amalda kun sanab yashayapti. Bir necha kun ichida u rasman bekor qilinishi kutilmoqda.
Shu paytda sahnaga Malayziya chiqdi.
Sepang uchun kutilmagan chaqiriq
Geografiya bu yerda o‘z so‘zini aytyapti: Malayziya – Singaporega yonma-yon, logistik jihatdan qulay, infratuzilma bor. Shuning uchun oktabrdagi bo‘sh oynani to‘ldirish uchun tabiiy nomzod sifatida qaralmoqda.
Mamlakat yoshlar va sport vaziri, doktor Mohammed Taufiq Johari juma kuni rasmiy bayonot berdi. Unga ko‘ra, hukumat Bahrain Grand Prix o‘rniga Sepang International Circuitda Formula 1 bosqichini o‘tkazish ehtimoli haqida “dastlabki ma’lumotlarni” olgan.
“Yoshlar va sport vazirligi taklifni faol muhokama qilmoqda va baholamoqda”, – deyiladi bayonot yakunida.
Sepang hozirda eng nufuzli xalqaro seriya sifatida MotoGPni qabul qiladi. Lekin Formula 1 boshqa daraja. Tashkiliy yuk, xavfsizlik talablari, paddock logistikasi – bularning barchasi alohida resurs va vaqt talab qiladi.
2017 yildan keyingi sinov
Sepang 2017 yildan beri Formula 1ni ko‘rmagani bois, bu taklif oddiy “kalendar bo‘shlig‘ini to‘ldirish” emas, balki butun tizim uchun sinov bo‘ladi. F1 rahbariyati rasmiy taklif yuborgan emas, lekin mahalliy hokimiyat va trassaga aniq logistika va tashkiliy talablar ro‘yxatini yetkazgan.
Endi navbat Malayziyada. Ichki baholash, moliyaviy va texnik imkoniyatlarni tekshirish – bularning barchasi Sepang haqiqatan ham Bahrain o‘rnini bosishi mumkinmi, degan savolga javob beradi. Agar javob ijobiy bo‘lsa, F1 uchun kalendarni qutqaruvchi yangi manzil paydo bo‘ladi. Agar yo‘q bo‘lsa, Baku va Singapore oralig‘idagi bo‘shliq shunchaki bo‘sh qolishi ham mumkin.
Hozircha Kuala Lumpur eng mantiqli variant bo‘lib turibdi. Ammo mintaqadagi siyosiy va harbiy vaziyat fonida “mantiq” har doim ham yetarli bo‘lavermaydi.
Mavsum oxiri uchun B-reja
F1 rahbariyati faqat oktabr oyini emas, butun yakuniy qismni qayta ko‘rib chiqishga majbur. Qatar va Abu Dhabi bilan yakunlanadigan an’anaviy “dubl” ham xavf ostiga tushishi ehtimoli bor. Shuning uchun Portimao ham ishga tushishga tayyor turgan zaxira variant sifatida ko‘rilmoqda.
Portugaliyadagi bu trassa 2027 yilda kalendarga rasmiy qaytishidan oldin sinov maydoni bo‘lib xizmat qilishi mumkin. Agar Yaqin Sharqdagi keskinlik mavsum yakuniga ham ta’sir etsa, F1 karvoni yo‘lini Yevropaga burishi ehtimoli bor.
Shunga qaramay, vaqt hozircha F1 tomonida. Prezident va bosh ijrochi direktor Stefano Domenicali 2026 yil kalendarining oxirgi qismi bo‘yicha yakuniy qaror uchun o‘rtalariga qadar muddat belgilab qo‘ygan.
“Yaxshi tashkilotchi yoki promouterning vazifasi – har doim zaxira rejalariga ega bo‘lish”, – degandi Domenicali shu oy boshida Sky telekanaliga bergan intervyusida. “Yil oxiriga kelib, biz uchun hammasi aniq bo‘lishi kerak, qaror esa sentabr o‘rtalarigacha qabul qilinadi”.
Savol esa ochiq qolmoqda: Sepang bu imkoniyatni yana bir avlod muxlislariga F1 hayajonini qaytarish uchun ishlatadimi yoki Malayziya bu safar chetda qoladimi?
