Man Utd hujum chizig‘ini qayta qurmoqda: Ollie Watkins muhokamada
Michael Carrick qo‘l ostida kutilmagan uchinchi o‘rin, qaytadan qo‘lga kiritilgan Champions League yo‘llanmasi va endi – yozgi qayta qurilishning eng nozik nuqtasi: hujum chizig‘i.
Oldinga qarab yugurayotgan Man Utd endi bir narsani juda aniq tushunib turibdi – Benjamin Sesko kelajak uchun sarmoya, ammo hozirgi bosimni yelkasida yolg‘iz ko‘tarib yurishi kerak bo‘lgan yigit emas. Klub ichida tajribali, tayyor hujumchi kerakligi borasida fikrlar tobora keskinlashmoqda. Shu fon’da Ollie Watkins nomi yana kun tartibiga qaytdi.
Carrick rejasi: Sesko yoniga tayyor forvard
Carrick va Man Utd skautlar guruhi allaqachon bir nechta bo‘shliqlarni belgilab qo‘ygan: markaziy yarim himoya – eng katta og‘riqli nuqta edi. Yoz bo‘yi bu chiziqqa ikki yangi futbolchi olib kelindi, transfer oynasi yopilguncha yana bittasi rejalashtirilgan.
Ammo bu qayta qurilish faqat markaz bilan tugamaydi. Chap qanot, yangi full-back va, albatta, hujumchi. Aynan shu pozitsiyada klub strategiyasi yanada aniq: Sesko’ni o‘stiradigan, uni himoya qiladigan, og‘ir pallalarda yonida turadigan tajribali “to‘qqizlik” kerak.
Shu maqsadda Man Utd ro‘yxatida ikki nom bor: Aston Villa hujumchisi Ollie Watkins va erkin agent maqomidagi Dusan Vlahovic. Hisobotlarga ko‘ra, ikkalasi ham klub ichki muhokamalarida jiddiy ko‘rib chiqilmoqda.
Watkins – ko‘pdan beri kuzatilayotgan nishon
Watkins atrofidagi qiziqish yangi emas. Klub uni bir necha transfer oynalaridan beri sinchiklab kuzatib kelmoqda. Muammo – Aston Villa. Birmingham klubi o‘z yetakchi hujumchisini arzon narxda qo‘yib yuborishga mutlaqo tayyor emas. Man Utd esa ma’lum bir moliyaviy chegaradan oshishni istamaydi.
Shunday bo‘lsa-da, Watkins profili Old Trafforddagi ko‘plab sobiq futbolchilar ko‘z o‘ngida “ideal variant” sifatida gavdalanadi. U allaqachon Premier League darajasida isbot bergan, pressingda ishlaydi, orqaga qaytib yordam beradi, yosh hujumchilar uchun maydonda ham, kiyinish xonasida ham tayanch figura bo‘la oladi.
Hargreaves va Butt: “O‘tgan yozdayoq Watkinsni olish kerak edi”
Bu fikrlar havodan olingan emas. O‘tgan mavsum boshidayoq Owen Hargreaves va Nicky Butt Man Utd transfer siyosatini muhokama qilarkan, aynan Watkins nomini tilga olgan edi.
Butt o‘sha paytda klubning 2025-yilgi yozgi ishlaridan to‘liq qoniqmaganini yashirmagandi. U tajribali hujumchi yetishmayotganini ochiq aytgan, Sesko transferi fonida Rasmus Hojlund bilan bog‘liq xatoni takrorlashdan qo‘rqqanini ta’kidlagan.
Uning fikricha, Premier League tajribasiga ega bo‘lmagan yosh forvardni birdaniga asosiy umid sifatida oldinga surish – xavfli yo‘l. Yomon seriyalar, gol urmay qolgan haftalar, bosim ostida qolgan yosh yigitlar… Bunday paytda ularni “o‘t chizig‘idan” vaqtincha olib qo‘yadigan, zarbani o‘ziga oladigan tajribali sherik zarur.
Butt aynan shu nuqtada Watkinsni misol qilib ko‘rsatgan: narxi qimmat bo‘lsa ham, yosh hujumchilarni og‘ir pallada tortib chiqara oladigan figura sifatida.
Hargreaves ogohlantirgandi: “Tarix takrorlanmoqda”
Owen Hargreaves ham o‘sha davrda o‘z fikrini aytgan. U Hojlund atrofida vujudga kelgan bosimni eslab, Rashford va Martialning ilk yillarini tilga olgan, ularning yelkalariga erta yuklangan mas’uliyat haqida gapirgan.
Keyin esa yana bir paradoksga e’tibor qaratgan: Hojlund tajribasizligi sabab ijaraga ketishga majbur bo‘lganidan so‘ng, klub yana o‘sha yosh toifadagi Sesko’ni olib keladi. Premier League uchun tayyor bo‘lgan, allaqachon bu ligada o‘zini ko‘rsatgan variantlar – Cunha, Mbeumo singari futbolchilar – bor paytda, Man Utd yana 22 yoshli, hali bu bosqichda sinovdan o‘tmagan hujumchiga sarmoya kiritadi.
Hargreaves savolni keskin qo‘ygan: agar birinchi oynada allaqachon xuddi shunday xatoni qilgan bo‘lsang, nega keyingisida tayyor, ligaga moslashgan forvard – masalan, Watkins tipidagi futbolchini olib kelmaysan?
Endi-chi?
Endi esa stsenariy yana o‘sha nuqtaga qaytdi. Sesko – kelajak. Lekin Carrick qo‘l ostida Champions League va ichki chempionatdagi maqsadlar bugunning o‘zida natija talab qiladi. Shunday sharoitda savol yanada keskinlashadi: Man Utd bu safar o‘z xatolaridan saboq oladimi?
Watkins uchun Aston Villa bilan og‘ir muzokaralarga kirishadimi yoki erkin agent Dusan Vlahovic yo‘lini tanlaydimi – buni yaqin haftalar ko‘rsatadi. Bitta narsa aniq: Old Trafford endi navbatdagi yosh iqtidorni yolg‘iz qoldirishni ko‘tara olmaydi.
