Manchester United chap qanot qidiryapti: Antonee Robinson
Yozgi oynaning dastlabki haftalarida butun e’tibor markazi – markaziy chiziq. Old Trafforddagi qayta qurilish avvalo o‘rtadan boshlandi: Andrey Santos va Youri Tielemans allaqachon kelib bo‘ldi, yana bir yarim himoyachi kutilmoqda. Ammo klub ichida yaxshi bilishadi: bu yoz faqat markaz haqida emas.
Chap qanot ham og‘riqli nuqtaga aylanib ulgurgan.
Luke Shaw 31 yoshda va hozircha klubdagi yagona tabiiy chap qanot himoyachisi. Chempionlar Ligasi qaytishi bilan esa taqvim siqiladi, safarlar ko‘payadi, jarohatlar xavfi oshadi. Bir mavsumni bitta mutaxassis chap qanot bilan o‘tkazib bo‘lmaydi.
Shu bois Manchester United yoz boshidan beri yangi chap qanot qidiryapti. Dastlab reja aniq edi: yosh, uzoq muddatga sarmoya bo‘ladigan futbolchi, darhol raqobat yaratadigan, lekin ertaga Shaw o‘rnini to‘liq egallashga tayyor bo‘ladigan nomzod.
Bu rejaga mos ikkita ism paydo bo‘ldi. Ikkalasi ham klub qo‘lidan uchib ketdi.
Lewis Hall – yopiq eshik
Newcastle United himoyachisi Lewis Hall dastlabki maqsad edi. Profil mos, yosh mos, bozor qiymati yuqori, lekin mantiqli. Ammo Tyneside tomoni eshikni darhol berk qilib qo‘ydi.
Ichki manbalar, jumladan Graeme Bailey, Newcastle bu yoz Hallni sotmaslikka qat’iy qaror qilganini aytib bo‘ldi. Klub allaqachon Anthony Gordon, Sandro Tonali va Bruno Guimaraes bilan xayrlashgan, navbatdagi asosiy aktivni qo‘yib yuborish – chegaradan o‘tish bo‘lardi.
Keyin David Ornstein ham shu pozitsiyani tasdiqladi: bu transfer oynasida Hall ketishi kutilmaydi. U hatto Eddie Howe ketganidan keyin Newcastle amerikalik himoyachini ushlab qolishga yanada ko‘proq intilayotganini, yangi shartnoma ham kun tartibida ekanini ta’kidladi.
Manchester United uchun bu – birinchi jiddiy to‘siq.
Arsenal bilan yopiq yo‘l: Myles Lewis-Skelly
Keyingi urinsh – Arsenal akademiyasining navbatdagi umidi Myles Lewis-Skelly. Profil yana o‘sha: yosh, dinamik, kelajak uchun sarmoya. Ammo bu yo‘l ham tezda berk ko‘chaga aylandi.
Football Insider xabariga ko‘ra, Arsenal o‘z tarbiyalanuvchisini sotish niyatida emas. Ayniqsa, Big Six ichida bevosita raqib bo‘lgan klubga. London klubi o‘z akademiyasini himoya qilmoqda, Manchester esa bu borada imkoniyatni boy berdi.
Shu bilan dastlabki kontseptsiya – “yosh, uzoq muddatli chap qanot” – amalda ishlamay qoldi. Bozor talab qiladi, raqiblar yopiladi, vaqt esa ketmoqda.
E’tibor keskin buriladi: Antonee Robinson
Endi esa sahnaga yangi ism chiqdi. talkSPORT ma’lumotiga ko‘ra, Manchester United ko‘zini Fulham himoyachisi Antonee Robinsonga tikdi.
Ularning bosh transfer reportyori Alex Crook shunday deydi: Fulhamning AQSh terma jamoasi a’zosi, Premer-ligada sinovdan o‘tgan, tajribali chap qanot Manchester uchun real variant sifatida ko‘rilmoqda. Eng muhimi – narx.
Robinson, Crook ta’kidlaganidek, Hallga qaraganda ancha arzon tushishi mumkin. Bozor bu yozda qizib ketgan, 60 million funt atrofidagi raqamlar Hall va Lewis-Skelly uchun tilga olinayotgandi. Bunday sharoitda 29 yoshga yaqinlashayotgan, lekin tayyor, sinovdan o‘tgan himoyachi – juda jozibali imkoniyat.
Reja o‘zgarayaptimi yoki vaziyat majburlayaptimi?
Hall va Lewis-Skellyni birlashtirgan jihat – yosh. Old Trafforddagi ilk reja aniq ko‘rinardi: hozir Shaw bilan raqobat qila oladigan, ertaga esa uning merosxo‘riga aylanishi mumkin bo‘lgan futbolchini topish.
Robinson esa boshqa toifa. U ikki kundan so‘ng 29 yoshni qarshi oladi. Bu transfer kelajak haqida emas, hozirgi lahza haqida bo‘ladi. Bu – “bu yil Chempionlar Ligasi va Premer-ligada raqobat qilishimiz kerak” degan qarorning ifodasi.
Shu bilan birga, bu bozor imkoniyati. 60 millionlik tavakkal o‘rniga, tayyor, tajribali, yuqori tempdagi o‘yinlarga moslashgan himoyachi. Ayniqsa, Manchester United taqvimi oldinda qanday ko‘rinishini hisobga olsak, bu pragmatik qarorga o‘xshaydi.
Savol esa o‘z-o‘zidan tug‘iladi: klub uzoq muddatli rejasidan voz kechayaptimi yoki bu faqatgina bir bosqich, keyinroq keladigan “ideal merosxo‘r” uchun vaqt yutishmi?
Javobni yangi mavsum beradi. Chap qanot bo‘sh qolmaydi. Lekin u yerda kim turadi – bozor yakunida ma’lum bo‘ladi.
