Memphis Depay: San’at va g‘azab orasidagi kurash
Braziliyada allaqachon keskinlashgan muhitga bitta uchqun yetarli edi. Uni esa Memphis Depayning o‘zi tashladi.
Yaqindagina Corinthians bilan maoshini “sezilarli” qisqartirib, klubda qolishga rozi bo‘lgan Niderlandiya terma jamoasi hujumchisi endi boshqa frontda o‘zini himoya qilmoqda. Sabab – yangi trekiga olingan “Don’t Panic” klipi.
Klipdan keyin portlagan savollar
Video Corinthians uchun og‘ir haftadan keyin paydo bo‘ldi. Klub atigi bir hafta avval Depay bilan shartnomani uzaytirmaslikka qaror qilgan, keyin esa tomonlar muzokara qilib, futbolchi klubda qolishi evaziga katta maoshdan voz kechishga majbur bo‘lgan edi.
Shunday fon ortidan atigi 24 soat o‘tib, Depay Copa Libertadores chorak finaliga olib chiqqan o‘yindan keyin klipni chiqaradi. Va ekranda – Parque São Jorge yonmoqda. Bu oddiy tasvir emasdi. Bu Corinthiansning ma’muriy yuragi.
Klipda Depay hech kimni ism bilan tilga olmaydi. Lekin satrlar aniq manzilga borayotgandek: “rivoj”lar, “endi mening dushmanimga aylangan vitse-prezident” haqida qo‘shiq aytiladi. Bu paytda klub atrofida allaqachon moliyaviy va boshqaruv inqirozi tufayli muxlislar noroziligi kuchaygan, egalariga qarshi shiorlar ko‘paygan, tribunalar va ko‘chalarda bosim ortib borayotgan edi.
Shu fon bilan yonayotgan Parque São Jorge tasviri – benzin ustiga tushgan gugurtga o‘xshab ko‘rindi.
Bu bir necha oy oldin olingan – Depay pozitsiyasi
Depay bo‘ronni oldindan sezgandek, klip atrofidagi bahslar avj olmasidan avval pozitsiyasini ochiq bildirishga shoshildi. U ijtimoiy tarmoqlarda murojaat qilib, videoni “bir necha oy oldin” suratga olinganini ta’kidladi va muxlislarni tinch namoyishga chaqirdi.
“Umid qilamanki, bu tinch norozilik bo‘ladi, odamlar fikrini xotirjam ifoda etadi. Mening musiqam haqida gapiradigan bo‘lsak, men yana bir bor aytaman: bu faqat san’at”, – deya yozdi u.
Yonayotgan shtab binosi tasviriga alohida to‘xtalar ekan, Depay o‘z pozitsiyasini yanada keskinroq chizdi: u “har qanday zo‘ravonlikning barcha ko‘rinishlariga qat’iyan qarshi” ekanini bildirdi. Ya’ni, videodagi olov – sahna, ramz, lekin ko‘chadagi olov – qat’iyan yo‘l qo‘yib bo‘lmaydigan chiziq.
San’at, ramz va tribunalar bosimi
Depayning musiqaga qiziqishi yangilik emas. U yillar davomida o‘zini nafaqat hujumchi, balki ijodkor sifatida ham ko‘rsatib keladi. Lekin Corinthiansdagi so‘nggi mojaro, shartnoma atrofidagi tortishuvlar va klub rahbariyatiga qarshi satrlar fonida bu klip oddiy kreativ loyiha bo‘lib ko‘rinmaydi.
Corinthians muxlislari hozircha asosan klub egalariga va rahbariyatga qarshi chiqmoqda. Moliyaviy tanglik, boshqaruvdagi savollar, qarorlar ortidagi shaffoflik yo‘qligi – bularning barchasi tribunalarni qo‘zg‘atgan. Depayning “vitse-prezident endi mening dushmanim” degan satri esa bu norozilik kayfiyatiga juda mos tushadi.
Savol tug‘iladi: bu satrlar va yonayotgan Parque São Jorge tasviri – shaxsiy hisob-kitobmi yoki futbolchining ichki isyoni bilan muxlislar g‘azabi bir nuqtada kesishib qoldimi?
Depay hozircha chizig‘ini aniq ushlab turibdi: u san’atni himoya qilmoqda, siyosiy maydonga esa rasmiy qadam qo‘ymayapti. Biroq Braziliya futbolida, ayniqsa Corinthians darajasidagi klubda, bunday ramzlar hech qachon shunchaki fon bo‘lib qolmaydi.
Endi savol boshqa: bu klip va uning atrofidagi bahslar Depayning maydondagi mavqeiga ta’sir qiladimi yoki u Corinthians tarixida nafaqat gollari, balki qo‘shiqlari bilan ham iz qoldiradigan futbolchiga aylanadimi?
