Messi jarimaga tortildi: Subaru Parkdagi asabiy kecha
Lionel Messi uchun odatdagi kecha emasdi. Major League Soccer sahnasida yulduz odatda sehrli paslari va gollari bilan esda qoladi, bu safar esa u intizomiy sarlavhalarning markaziga aylandi.
Inter Miami hujumchisi Philadelphia Unionga qarshi bahsda raqib futbolchiga qo‘l ko‘targani uchun liga intizom qo‘mitasi tomonidan jarimaga tortildi. 39 yoshli argentinalik uchrashuvning so‘nggi daqiqalarida Quinn Sullivan bilan to‘qnashib, raqibining ensa qismiga qo‘li bilan zarba bergani qayd etildi.
Vaziyat 101-daqiqada, keskinlik chizig‘i allaqachon cho‘zilib ketgan paytda yuz berdi. Messi to‘pni o‘ynab bo‘lgach, Sullivan undan o‘tib ketar chog‘i tirsagi bilan tegib o‘tgandek ko‘rindi. Shundan keyin Messi keskin burilib, raqibiga qo‘l siltadi. Ortiqcha asabiylik bir necha soniyada maydondagi muvozanatni buzib yubordi.
Hakam voqeaga zudlik bilan aralashdi. Mojaro kattalashishidan oldin futbolchilar ajratildi, ammo epizod MLS intizom qo‘mitasi e’tiboridan chetda qolmadi. Ligaga tegishli rasmiy bayonotda shunday deyiladi:
“MLS intizom qo‘mitasi Inter Miami CF hujumchisi Lionel Messini 19 avgust kuni Philadelphia Unionga qarshi o‘yinining 101-daqiqasida raqib futbolchining yuzi/boshi/bo‘yni tomon qo‘l ishlatish bo‘yicha liga siyosatini buzgani uchun miqdori oshkor etilmagan jarimaga tortdi”.
Subaru Parkdagi kecha shundoq ham tinch o‘tmagan edi. O‘yin 2:2 hisobida yakunlandi, lekin protokolda hisobdan ko‘ra kayfiyat ko‘proq esda qoladigan turdan bo‘ldi. Qarama-qarshiliklar, maydondagi kichik to‘qnashuvlar, doimiy e’tirozlar – uchrashuv ohiriga borib portlashga tayyor bo‘lgan muhitni yaratdi.
Bosim oxir-oqibat o‘z so‘zini aytdi. Qo‘shimcha daqiqalarda ikki futbolchi qizil kartochka oldi: Miami safidan Yannick Bright, Philadelphia tomonidan esa Sullivan’ning ukasi Cavan maydonni tark etdi. Oxirgi daqiqalardagi bu hayajon, asab va keskinlik uchrashuvni deyarli nazoratdan chiqarib yubordi.
Intizomiy choralar faqat Messi bilan cheklanib qolmadi. Miami himoyachisi Ian Fray ham Sullivan bilan to‘qnashuvi uchun MLS tomonidan jarimaga tortildi. Demak, Inter Miami uchun bu faqat ochko yo‘qotilgan kecha emas, balki protokollarda davom etadigan oqibatlarga ega bo‘lgan tur bo‘ldi.
Shunga qaramay, turnir jadvali Miami uchun hanuz umidli ko‘rinishda. Klub Sharqiy konferensiyada ikkinchi o‘rinda bormoqda, peshqadam Nashville’dan yetti ochko ortda. Ammo raqobat tobora qizib borayotgan pallada bunday intizomiy zarbalar jamoaning ritmini buzishi, ayniqsa, hal qiluvchi o‘yinlar oldidan murabbiy shtabini o‘ylantirishi aniq.
Messi odatda raqibni emas, to‘pni “jazolash” bilan tanilgan. Subaru Parkdagi bu lahza esa, MLSdagi mavsum hikoyasiga boshqa ohang qo‘shdi. Savol endi bitta: Inter Miami bu asabiy burilishni tezda ortda qoldira oladimi yoki aynan shu kecha ularning chempionlik poygasida burilish nuqtasiga aylanadimi?
