Mourinho Diomande bilan yangi reja tuzmoqda
Joze Mourinho yangi yulduz bilan shoshilmayapti. U Diomande atrofida qurayotgan rejasi bilan bir vaqtning o‘zida ikki maqsadga erishyapti: futbolchiga moslashish uchun vaqt berayapti va allaqachon o‘z o‘rnini isbotlaganlar oldida adolatni saqlayapti.
Arda Guler va Brahim Diaz bunga eng yaqqol misol. Ular yozgi tayyorgarlik davrida porladi, yillardan beri zaxira va asosiy tarkib o‘rtasida kurashib, bugungi mavqeiga yetib kelgan. Mourinho ularning mehnatini inkor qilmayapti, yangi kelgan futbolchi hisobiga ularni chetga surib qo‘ymayapti. Bu mayda tafsilot emas, kiyinish xonasida obro‘ aynan shunday qarorlarda yutqaziladi yoki yutib olinadi.
Boshqa murabbiylar bu chiziqni ushlab qololmaganini yaqinda ko‘rdik. Xabi Alonso shunday muvozanatni yo‘qotib qo‘yganlardan biri bo‘ldi. U yangi kelgan Mastantuonoga haddan tashqari tayanib, Rodrygo, Diaz va hattoki Vinicius hisobiga unga asosiy tarkibni topshirib qo‘ydi. Natija uzoq kuttirmadi: hali doimiy yetakchi bo‘lishga yetarlicha pishmagan argentinalik kuyib ketdi, murabbiy esa kiyinish xonasidagi nazoratni qo‘ldan boy berdi.
Mourinho esa boshqa yo‘lni tanladi. Uning rejasi Diomandeni himoya qiladi, uni ertangi kun yulduziga aylantirish uchun bugungi bosimdan asraydi. Futbolchi asta-sekin daqiqalarini ko‘paytiradi, o‘yin ritmini ushlaydi, jamoa bilan uyg‘unlashadi. Hammasi reja bo‘yicha ketsa, oxir-oqibat asosiy tarkibga ham kiradi, lekin bu jarayon shoshilishsiz, tabiiy yo‘l bilan kechadi.
Asosiy sahna hozircha stadion emas, mashg‘ulot maydoni. Mourinho vaqtini aynan shu yerga sarflayapti: Diomandega jamoa mexanizmini, pressing vaqtini, orqaga qaytish yo‘nalishlarini, hujumga chiqish sxemalarini qayta-qayta tushuntiryapti. Bir qarashda oddiy ko‘rinadigan detallar kun kelib katta o‘yinlarda farqni belgilab beradi.
Eng muhimi, futbolchining o‘zi vaziyatni to‘g‘ri qabul qilgan. Diomande murabbiyga ishonadi, yuzidan tabassum ketmaydi, tana tilida ham shoshilish yo‘q. Bu tasodif emas – u allaqachon yuqori darajadagi futbolchi ekanini isbotlagan. O‘tgan mavsumda u Leipzig safida Bundesliga’da 34 o‘yindan 33 tasida maydonga tushdi, shularning 28 tasida asosiy tarkibda boshladi. 12 ta gol, 8 ta golli uzatma – bu raqamlar tasodifiy emas, tayyor hujumchining statistikasi.
Shu bois Mourinho uni yashirib qo‘yayotgani yo‘q, faqat to‘g‘ri paytni kutyapti. Diomande allaqachon kimligini biladi, murabbiy esa qachon va qanday qilib uni to‘liq ochish kerakligini. Savol bitta: bu sabr oxir-oqibat qanchalik katta sahnada o‘z mevasini beradi?
