Mourinho bosh og‘rig‘i: Real Madrid zaxirasi qiymati
Madridda g‘alaba ortidan odatda maydondagi o‘yinchilar haqida gapiriladi. Bu safar esa diqqat markazida zaxira skameykasi bo‘ldi.
Rayo Vallecano ustidan navbatdagi uchrashuvda g‘alaba qozonganidan keyin Jose Mourinho maydon chetida bir lahza atrofga nazar soldi. Uning ko‘z o‘ngida to‘liq zaxira safi: jarohat olganlar bundan mustasno, qolganlarning barchasi sog‘, raqobatga tayyor, eng muhimi – sifatli edi. Murabbiy keyinroq buni bir jumlada jamladi: skameykada faqat sifatu sinf bor edi.
Bu esa boshqa savolni tug‘diradi: kim o‘ynaydi, kim kutadi?
Diomande – birinchi start, Guler – savollar markazida
Rayo bilan o‘yinda Mourinho Diomande uchun ilk bor asosiy tarkib eshiklarini ochdi. Bu qaror avtomatik ravishda boshqa bir ismni chetga surdi: Arda Guler. Yaqinda atigi 23 daqiqa ichida o‘yin taqdiriga ta’sir o‘tkazgan turk iste’dodi bu safar zaxirada qoldi. Savollar shu yerda boshlandi.
Mourinho esa o‘z pozitsiyasini aniq ifoda etdi. Uning fikricha, Guler maydonga tushgan zahoti “ko‘p narsani o‘ynaydi”, ya’ni qisqa vaqtda ham o‘yin ritmini o‘zgartira oladi. Lekin murabbiy bir narsaga ishonch bilan urg‘u berdi: agar Diomande asosiy tarkibda boshlamaganida, birinchi savol aynan shu bo‘lardi – “Diomande qachon o‘ynaydi?”
Ya’ni, bu “Real Madrid”da hozirgi raqobat darajasi: kimni tanlasangiz, ikkinchisining nomi darhol tilga olinadi.
12 zaxira – 537 million yevro
Ispaniyaning AS nashri ma’lumotiga ko‘ra, Rayo Vallecano bilan o‘yinda Mourinho ixtiyorida o‘z navbatini kutayotgan 12 futbolchi bor edi. Transfermarkt bahosiga ko‘ra, bu zaxira guruhining umumiy bozor qiymati – 537 million yevro.
Bu faqat zaxira.
Bu raqamni his qilish uchun bir misol kifoya: Arda Gulerning o‘zi 90 million yevroga baholanadi. Bozor qiymati bo‘yicha u dunyodagi eng qimmat 25 futbolchi qatorida. Yana bir detal: Gulerning narxi butun Rayo Vallecano tarkibidan ham balandroq. Madridliklarning raqibi to‘liq jamoa sifatida 86,85 million yevroga teng.
Guler nafaqat Rayo, balki yana besh La Liga klubidan ham “qimmat”: Malaga, Alaves, Elche, Osasuna va Levante jamoalarining butun tarkibi turk futbolchisidan arzon.
Guler yonida skameykada yana qanday ism va raqamlar bor edi?
- Tchouameni – 70 million yevro.
- Huijsen, Arnold va jahon chempioni Cucurella – har biri 60 million yevro.
- Camavinga – 50 million.
- Endrick – 40 million.
- Brahim Diaz – 35 million.
- Carlos Espi, Thiago Pitarch va Raul Asencio – har biri 20 million.
- Andriy Lunin – 12 million yevro.
Bir o‘yin uchun shunchaki “kutib turgan” resurslar shular.
Dunyoda atigi 19 klub bunday raqamdan yuqori
537 million yevrolik zaxira – bu alohida klubdek qiymat. Transfermarkt ma’lumotiga ko‘ra, butun dunyoda atigi 19 ta klubning butun tarkibi “Real Madrid”ning shu 12 nafar zaxira futbolchisidan qimmatroq.
Ispaniyada esa vaziyat yanada keskin: La Liga doirasida bu ko‘rsatkichdan faqat ikki klub o‘tadi – Barcelona va Atletico Madrid. Barcelona tarkibi 1,2656 milliard yevroga baholangan, Atletico Madrid – 679,7 million yevro. Villarreal esa chempionatdagi to‘rtinchi eng qimmat jamoa sifatida 331,6 million yevro atrofida.
Demak, “Real Madrid”ning zaxira skameykasi La Liga’dagi aksariyat klubning butun tarkibidan qimmat.
Mourinho rotatsiyasi: 6 o‘yinda 17 asosiy futbolchi
Mourinho mavsum startidan buyon 19 nafar futbolchidan foydalanishga ulgirdi. Diomande ilk bor asosiy tarkibda maydonga tushgani bilan yana bir chiziq tortildi: endi olti tur ichida 17 nafar o‘yinchi “Real Madrid” uchun startda maydonga chiqqan.
Faqat ikkita futbolchi hali asosiy tarkibdan joy olgani yo‘q: jarohatdan chiqqach, hali to‘liq jismoniy holatini tiklayotgan Tchouameni va Carlos Espi. Ular hali o‘z navbatini kutmoqda.
Yana uch ism bor, ular umuman maydonga tushmagan: Lunin, Asencio va Endrick. Asencio va Endrick jarohat tufayli ortda qolgan, ularning qaytishi bilan raqobat yanada keskinlashadi. Bunga qo‘shimcha ravishda Militao, Mendy va Rodrygo ham hanuz tibbiyot bo‘limi qo‘l ostida.
Mourinho esa har turda bir xil muammoga duch keladi: kimni tanlash, kimni kutdirish? Bu shunchaki taktik savol emas, bu moliyaviy jihatdan ham og‘ir qaror. Chunki “Real Madrid”da bugun skameykaga o‘tirishning o‘zi ham butun bir La Liga klubiga teng narxga tushmoqda.
Savol endi bitta: bu ulkan resurslar mavsum oxirida qanday sovrinlar bilan o‘lchanadi?
