Myles Lewis-Skelly: Arsenaldagi shov-shuvlar va transfer imkoniyatlari
“Emirates Stadium” atrofida so‘nggi haftalarda bitta ism tinmay tilga olinmoqda. Myles Lewis-Skelly. 19 yoshli iste’dod atrofidagi shubhalar, katta klublarning qiziqishi va klub rahbariyatining ehtiyotkor bayonotlari bu mavzuni yanada keskinlashtirdi.
Gap shunchaki akademiya bitiruvchisi haqida emas. Gap bozor bahosi taxminan 45 million funtga baholanayotgan, chap qanot himoyasi va markaziy yarim himoyada birdek o‘ynay oladigan, bozor nuqtayi nazaridan juda noyob profilga ega futbolchi haqida ketmoqda.
Rooney uchun “no-brainer”, Arsenal uchun sinov
Myles Lewis-Skelly nomi bilan bog‘liq shov-shuvni bir zumda alanga oldirganlardan biri – Man Utd afsonasi Wayne Rooney bo‘ldi. U “Stick to United” podkastida fikrini hech qanday o‘rama gaplarsiz aytdi.
Rooneyning fikricha, Man United uchun bu transferga urinib ko‘rmaslik – xatolik bo‘ladi. U, ayniqsa, Luke Shaw atrofidagi savollar fonida, bunday ko‘p qirrali futbolchini qo‘lga kiritish imkoniyatini “mutlaq ravishda rad etib bo‘lmaydigan” variant sifatida ko‘rmoqda. Shawning butun mavsum davomida barqaror bo‘la olmasligi, Rooney nazarida, klubni aynan Lewis-Skelly tipidagi futbolchiga olib keladi.
Uning mantig‘i sodda: bozor bahosi yuqori bo‘lmagan, yosh, chap qanot himoyachisi ham, markaziy yarim himoyachi ham bo‘la oladigan futbolchi. Klubga mos tushsa, uzoq yillarga yechim. Aynan shuning uchun Rooney bu transferni bir necha bor “no-brainer” deb ta’rifladi.
Shu paytda vositachilar tomonidan Man United va Chelseaga futbolchini qo‘lga kiritish imkoniyati taklif qilingani haqida xabarlar paydo bo‘ldi. Ammo London tomoni ichkaridan turib boshqa ohangda gapirmoqda: Lewis-Skelly hozircha Arsenalni tark etishni o‘ylamayotgani ta’kidlanmoqda.
Garlickning ikki qatlamli bayonoti
Bu shov-shuvlar fonida klub boshqaruvining ovozi, albatta, e’tiborsiz qolmaydi. Arsenal bosh ijrochi direktori Richard Garlick avvaliga talkSPORT efirida muxlislarni tinchlantirgandek bo‘ldi.
U Myles Lewis-Skellyning o‘tgan mavsum oxiridagi va yangi mavsum boshidagi o‘yinini alohida maqtadi, klubning asosiy yo‘nalishi – eng yaxshi futbolchilarni saqlab qolish va ular atrofida qurish ekanini ta’kidladi. Gap qisqa: “Biz Mylesdan va uning klubdagi holatidan juda mamnunmiz”, degan mazmundagi fikr bilan u “sotiladi” degan gaplarni amalda bostirishga urindi.
Ammo hikoya shu yerda tugamadi.
Garlick BBC bilan suhbatda mavzuga qaytdi va bu safar ohang boshqacharoq bo‘ldi. U faqat Lewis-Skelly emas, yana bir akademiya yulduzi Ethan Nwaneri haqida ham gapirar ekan, eshikni to‘liq yopib qo‘ymadi.
Uning so‘zlariga ko‘ra, klub bu kabi “homegrown” futbolchilarni faol ravishda sotishga urinmayapti. Biroq agar “to‘g‘ri imkoniyat” paydo bo‘lsa – ya’ni ham futbolchi, ham klub uchun ma’qul bo‘lgan taklif tushsa – bu variant ko‘rib chiqilishi mumkin.
Bu – hozirgi moliyaviy futbol davrining aniq aksi. Bir tomonda – akademiya timsoli bo‘lgan, o‘sib kelayotgan iste’dodlar. Ikkinchi tomonda – sof foyda, balans, transfer strategiyasi. Lewis-Skelly kabi o‘yinchilarni sotish, hisob-kitob nuqtayi nazaridan, “toza foyda” sifatida qayd etiladi. Aynan shuning uchun Rooney ham “Arsenal so‘nggi yillarda juda ko‘p sarfladi, bunday transfer moliyaviy jihatdan mantiqiy ko‘rinadi”, degan fikrni ilgari surdi.
Arsenal uchun dilemmalar davri
Bir tomonda, maydonda portlashga tayyor bo‘lgan, ko‘p pozitsiyada o‘ynay oladigan, yosh, dinamik futbolchi. Boshqa tomonda, FFP bosimi, yuqori maqsadlar va tarkibni yanada kuchaytirish uchun resurs topish zarurati.
Lewis-Skelly masalasi aynan shu kesishmada turibdi.
Hozircha rasmiy pozitsiya aniq: Arsenal uni sotishga shoshilmayapti, futbolchining o‘zi ham ketishga urinmayapti. Lekin Garlickning “to‘g‘ri imkoniyat bo‘lsa, ko‘rib chiqamiz” degan jumlasi bozor tilida bitta narsani anglatadi – to‘g‘ri narx bo‘lsa, hammasi o‘zgarishi mumkin.
Man United chap qanot himoyasini mustahkamlashni ustuvor vazifa sifatida ko‘rayotgan bir paytda, Chelsea esa bozorni kuzatib turibdi. Shunday sharoitda 19 yoshli, ikki pozitsiyani birday egallay oladigan, bozorga nisbatan arzonroq deb ta’riflanayotgan ingliz iste’dodi – kam uchraydigan imkoniyat.
Savol endi bitta: Arsenal bu safar yuragini tinglaydimi yoki balans jadvalini?
