Nanningda gumanoyd robotlar futboli: yangi davr
Xitoyning janubidagi Nanning shahri payshanba kuni futbolning mutlaqo yangi sahnasiga aylandi. Bu safar stadionda na stadion shovqini, na murabbiylarning chinqirig‘i ustuvor edi – e’tibor markazida o‘rta maktab o‘quvchilari boshqarayotgan gumanoyd robotlar turdi.
Guangxi Zhuang avtonom rayoni poytaxtida o‘tkazilayotgan birinchi gumanoyd robot futbol karnavali ECNS ma’lumotiga ko‘ra 10 ta ta’lim muassasasidan kelgan 40 dan ortiq o‘quvchini bir maydonga jamladi. Yoshlar raqibni dribling bilan aldash yoki pressingni to‘g‘ri tashkil qilish o‘rniga, algoritm, sensor va harakat trayektoriyalarini hisoblayapti. Gollarni esa ularning dasturlagan temir “o‘yinchilari” urmoqda.
Uchga uch, to‘liq avtonomiya
Turnir markazida – uchga uch formatdagi uchrashuvlar. Maydonga faqat bitta turdagi futbolchilar chiqadi: Booster K1 gumanoyd robotlari. Har bir jamoa aynan shu model bilan o‘ynaydi, teng sharoit, teng texnika, farqni esa faqat o‘quvchilarning aql-zakovati va taktik yondashuvi qiladi.
Robotlar to‘liq avtonom rejimda ishlaydi. Sun’iy intellekt qaror qabul qiladi, vaziyatni o‘qiydi, sherik va raqiblarning joylashuvini baholaydi, zarba yoki pasni tanlaydi. Hech qanday masofaviy boshqaruv, hech qanday yashirin joystick yo‘q. Bir marta maydonga qo‘yilgan robot o‘yinni o‘zi “o‘qishi” kerak.
Bosim asta-sekin oshadi. Qayerdadir algoritm kechikadi, qayerdadir qaror mukammal chiqadi. Odatdagi o‘yinchi xatosidan keyin boshini changallaydi, bu yerda esa xatoni kod tahlil qiladi.
Guangxidagi eng yirik maktab robot-futbol sahnasi
Tashkilotchilar bu karnavalni Guangxida o‘rta maktab o‘quvchilari uchun o‘tkazilgan gumanoyd robot futbol musobaqalarining eng kattasi va eng yuqori darajalisiga aylanganini ta’kidlashmoqda. Bu shunchaki ko‘rgazmali shou emas, balki mintaqa uchun ramziy burilish nuqtasi.
Nanning endi faqat an’anaviy sport markazi emas, balki texnologik futbol laboratoriyasiga ham aylanmoqda. Tribunada ota-onalar, o‘qituvchilar, mutaxassislar – hammasi bir savolga javob izlayotgandek: ertaga bu bolalar va ularning robotlari qayergacha borishi mumkin?
China-ASEAN Expo fonida texnologik maydon
Karnaval tasodifan tanlangan sana emas. U Nanningda 17–21 sentabr kunlari o‘tayotgan 23-chi China-ASEAN Expo bilan yonma-yon tashkil etilgan. Futbol maydonidagi tajribalar ko‘rgazma pavilyonlarida bo‘layotgan texnologik muloqotning jonli davomidek ko‘rinadi.
Dastur faqat o‘yinlardan iborat emas. Ilmiy tadbirlar, interaktiv namoyishlar, China-ASEAN doirasidagi texnologik almashinuvlar, ota-ona va bolalar uchun maxsus faoliyatlar – bularning barchasi bir manzara, bitta savol atrofida birlashadi: sun’iy intellekt bizning kundalik hayotimizni qanchalik tez va chuqur o‘zgartiradi?
Bu yilgi ko‘rgazmaning uchta ko‘rgazma zonasidan biri aynan sun’iy intellekt va shu yo‘nalishdagi hamkorlikka bag‘ishlangan. “CAFTA 3.0 Opportunities, Better Life” shiori ostida AI texnologiyalari nafaqat iqtisodiy, balki ijtimoiy va madaniy imkoniyat sifatida taqdim etilmoqda.
Shu fon’da Nanningdagi kichikroq ko‘rinadigan uchga uch robot-futbol uchrashuvlari ham aslida bitta katta savolni o‘rtaga tashlaydi: kelajak futbolini kim belgilaydi – stadiondagi iste’dodmi yoki laboratoriyadagi kod?
