Paddy Pimblett: Mag‘lubiyatda Yulduzga Aylanish
UFC sahnasiga besh yil avval qadam qo‘yganidan beri Paddy Pimblett promoushen uchun haqiqiy topilma bo‘lib kelmoqda. U oktagonga ilk bor kirgan paytda ham yangi bola emasdi: UFC tashqarisida 19 ta jang, chempionlik kamarini ko‘rgan, tribunalarni to‘ldiradigan ulkan auditoriya, o‘ziga xos xarizma. Qisqasi, “The Baddy” yirik sahnaga tayyor holda keldi.
Lekin Dana White nazarida Pimblettning eng katta qadri – uning xarakteri. Ayniqsa, Justin Gaethje bilan bo‘lgan jangdan keyin.
Mag‘lubiyat, lekin obro‘ oshgan kecha
Gaethjega qarshi o‘sha jang natijada Pimblett uchun mag‘lubiyat bilan yakunlandi. Ammo White fikricha, aynan o‘sha kecha ko‘p narsani o‘zgartirdi.
U shunday deydi: o‘sha mag‘lubiyatdan keyin Pimblett ijtimoiy tarmoqlarda o‘zining eng so‘nggi, juda ham yorqin g‘alabasidan ko‘ra ko‘proq muxlis orttirgan. Sababi oddiy: tomoshabinlar nihoyat uning asl qiyofasini ko‘rdi – “itdek” jang qiladigan, og‘riqqa chidamli, zarbani yutib, oldinga intiladigan yigitni. White aynan uning jag‘i va qat’iyatini alohida ta’kidlaydi.
Pimblett har doim jangni yakunlashga, raqibini tugatishga intiladigan tipdagi jangchi. Shuning uchun ham u UFC ro‘yxatini bezab turgan nomlardan biri bo‘lib qoldi. Lekin prezident nazarida bu yetarli emas – u bunday jangchilarni liganing yuragi deb biladi.
Arturo Gatti bilan qiyos
White bu mavzuda gapirar ekan, o‘zining eski tamoyiliga qaytadi. UFCni sotib olgan paytdan boshlab u bir narsani kuzatgan: Arturo Gatti.
Gatti HBO bilan shartnomalarni mag‘lubiyatlardan keyin ham qayta-qayta olardi. Nega? Chunki odamlar u bilan bo‘lgan jangga vaqt ajratishga tayyor edi. Natijadan qat’i nazar.
White buni juda sodda qilib tushuntiradi: shanba oqshomi – qimmat. Pul emas, vaqt nuqtai nazaridan. Odamlarning qiladigan ishlari ko‘p: juftiga vaqt ajratishi, bolalarini olib chiqishi, oila, do‘stlar, boshqa rejalari bor. Shunday paytda kimdir UFC kartasini yoqish uchun o‘tirsa, u aldanganini his qilmasligi kerak.
Arturo Gatti bilan kechgan shanba oqshomlari shunday edi: jang tugab, televizor o‘chirilganida hech kim hafsalasi pir bo‘lmagan. U doim jang qilardi, doim urushardi. Tomoshabinlar aynan shuni xohlaydi – haqiqiy urushni.
White nazarida Paddy Pimblett ham shunday toifadagi jangchi. U natijadan qat’i nazar, oktagonga kirsa, muxlis biladiki: bu kecha bekorga sarflanmaydi. UFC uchun esa aynan shunday ismlar liganing ertangi kunini belgilaydi.
