PSG yangi qanot o'yinchisi Mika Godtsga qiziqmoqda
Paris Saint-Germain yozgi oynani keskin boshlab yubordi. Klub allaqachon 50 million yevroga norvegiyalik hujumchi Magnus Akliouche’ni olib kelgan bo‘lsa, endi e’tibor Amsterdamga, aniqrog‘i, Ajax qanotidagi portlayotgan iste’dod – Mika Godtsga qaratildi.
Italiyalik transfer insayderi Fabrizio Romano xabariga ko‘ra, Parij klubi rahbariyati Ajax bilan rasmiy aloqaga o‘tgan, 21 yoshli belgiyalik futbolchi bo‘yicha muzokaralar boshlangan. Buning ortida esa juda aniq reja yotibdi: hujumni yosh, gol va assist bera oladigan, tezlikka tayanadigan futbolchi bilan chuqurlashtirish.
Godts bunga to‘liq mos keladi. U o‘tgan mavsumda barcha musobaqalar hisobida 44 uchrashuvda maydonga tushib, 17 ta gol urdi va 15 ta golli uzatma berdi. Bunday statistika yosh qanot o‘yinchisi uchun Yevropa bozorida jiddiy vizit karta.
Camposning “loyiha”si va Godtsning javobi
Parijliklar bu safar klassik yo‘ldan biroz chetga chiqdi. Avval klubdan klubga emas, to‘g‘ridan-to‘g‘ri futbolchining o‘ziga bordi. PSG sport maslahatchisi Luis Campos Godts bilan shaxsan uchrashdi, bu muloqot ichki manbalarga ko‘ra “juda samarali” o‘tgan.
Belgiyalik qanot futbolchisi Campos chizib bergan loyihadan hayratda qolgani, Parijga ko‘chib o‘tish istagini yashirmagani aytilmoqda. Bu esa muzokara stolida PSGga katta ustunlik beradi: futbolchi tanlovini qilib bo‘lgan, endi Ajax faqat shartlar bo‘yicha maksimal foyda olishga urinishi mumkin, xolos.
Ajax bosim ostida
Ajax aslida Godtsni ushlab qolishni xohlagan edi. Klub uni kelgusi yillarda atrofida jamoa qurilishi mumkin bo‘lgan asosiy aktivlardan biri sifatida ko‘rardi.
Endi esa vaziyat o‘zgardi. Amsterdam klubi bir narsani aniq biladi: futbolchi Parijga o‘tishni xohlaydi. Shunday paytda “yo‘q” deyish tobora qiyinlashadi. Ayniqsa, bozor faol, narxlar baland, vaqtda raqiblar qo‘l qovushtirib turgani yo‘q.
Shu fon’da muzokaralar murakkablashishi, lekin tezlashishi ham mumkin. Agar tomonlar kelisha olsa, PSG qisqa muddat ichida hujum chizig‘iga yana bir jiddiy qurol qo‘shib oladi.
Barcola kelajagi savol ostida, Godts – ehtiyot rejasi emas, raqobat
Bu transferning qiymati PSG uchun yanada oshib boryapti, chunki fransiyalik qanot futbolchisi Bradley Barcola atrofida noaniqlik kuchaymoqda. Uni bir nechta Premier League grandlari diqqat bilan kuzatyapti, qiziqish esa rasmiy taklifga aylanishi hech gap emas.
Shu sharoitda Godts nafaqat kelajak uchun sarmoya, balki ehtimoliy yo‘qotishni yopib qo‘yadigan darhol ta’sir ko‘rsata oladigan variant sifatida ham ko‘rilmoqda. Yosh, och, raqib himoyachilarini tezlik bilan sindira oladigan futbolchi – Parij uchun ayni muddao.
Diomande qo‘ldan ketdi, endi navbat Godtsda
PSGning Godtsga bo‘lgan qiziqishi tasodif emas. Klub yaqinda yana bir qanot futbolchisi – ivuarlik Yan Diomande bo‘yicha kurashda mag‘lub bo‘ldi. Uning nomi bir necha kun davomida Parij bilan jiddiy bog‘landi, lekin yo‘nalish o‘zgardi: Diomande endi Real Madrid tomon yo‘l olayotgani kutilmoqda.
Yevropa chempioni bo‘lgan madridliklar ham qanot chizig‘ini kuchaytirishga majbur. Ular ham ichki chempionatda, ham qit’a miqyosida barcha sovrinlarga da’vogarlik qilish uchun tarkibni kengaytirishyapti.
Parij esa boshqa yo‘lni tanladi. Diomande qo‘ldan ketdi, lekin bozor yopilmagan. Endi spotlight Godtsda. Savol bitta: Ajax qanchalik uzoq qarshilik ko‘rsata oladi – va PSG bu yozda yana bir yosh yulduzni Parc des Princesga olib kela oladimi?
