Rashfordning Old Trafforddagi kelajagi: Qaytish yoki ketish?
2026-yil yozgi transfer oynasi yakuniga hali vaqt bor, lekin Marcus Rashford atrofidagi savollar allaqachon keskinlashib bo‘ldi. U o‘tgan mavsumni Barcelona safida samarali ijarada o‘tkazdi, Kataloniyada o‘zini qayta topgandek ko‘rindi va Camp Nou’da doimiy kelajakni tasavvur qila boshladi. Ammo bu reja ish bermadi.
Barcelona uni sotib olish opsiyasidan voz kechdi. Aston Villa ham avvalroq to‘liq transferga jur’at qilmadi. Natijada Rashford, Shimoliy Amerikadagi Jahon chempionati ortidan, yana Manchester sari yo‘l oldi. Tanlangan yo‘l emas, majburiy qaytish.
Masala har doim uning boshi va yuragida bo‘lgan
Manchester United atrofida bitta savol yangrayapti: klub Rashford bilan varaqni butunlay yangilashi kerakmi? Sobiq qanot futbolchisi, hozirda mutaxassis sifatida fikr bildirayotgan Lee Sharpe NetBet homiyligida GOAL bilan suhbatda shunday deya to‘xtaldi:
“Bu murakkab masala, to‘g‘rimi? Marcus Rashfordning vaziyati”, – deydi u. “U juda yaxshi futbolchi. Jahon chempionatida yana uning sifati chaqnagan ayrim lahzalarni ko‘rdik. Gap har doim uning qulog‘i orasida – boshida bo‘lgan. Rashford bilan masala shunda”.
Sharpe so‘zlariga ko‘ra, Rashford Manchesterni tark etishidan oldin allaqachon uzilgan ko‘rinardi: “U ketishidan sal oldin unchalik qiziqmayotgandek, biroz ‘asboblarini yig‘ishtirgandek’ tuyuldi. Bu maydondan tashqaridagi shaxsiy muammo bo‘ldimi, murabbiylar bilanmi, klub ichidagi vaziyatmi – bilmayman. Lekin u Barcelona’ga bordi, yaxshi mavsum o‘tkazdi, u yerda qolishni xohlagani aniq edi. Bu amalga oshmadi. Endi u qaytadimi?”
Savol keskin: Rashfordning ruhi hamon Old Traffordga tegishlimi yoki u allaqachon boshqa hayotga ko‘chib bo‘lganmi?
United uchun aktiv, Rashford uchun sinov yili
Futbol tomoni aniq: salomat, to‘g‘ri boshqarilgan Rashford – har qanday murabbiy uchun qurol. Sharpe ham aynan shuni ta’kidlaydi:
“Talanti va futbolchi sifatidagi darajasi bo‘yicha u United tarkibiga qaytib qo‘shish uchun juda qimmatli aktiv bo‘ladi. Masala shunda: Marcus bu loyihaning bir qismi bo‘lishni xohlaydimi, bu ishga qo‘shilishni, kurashishni istaydimi yoki uning boshi va yuragi boshqa joydami. Agar shunday bo‘lsa, qaytishi juda qiyinlashadi”.
Klub esa hozircha bozorni sindira olmadi. United Rashford uchun talab qilayotgan summa tushgan bo‘lsa-da, hali hech kim stolga kerakli miqdorni qo‘ymadi. Shunday ekan, Manchester klubi o‘z shahrida tug‘ilib o‘sgan futbolchiga yana bir imkon berishga tayyor.
Rashfordning hozirgi shartnomasi kuchli – haftasiga 325 ming funt atrofida maosh va yana ikki yil amal qilish muddati. Bu esa klubga manevr uchun vaqt beradi, lekin sabrni cheksiz qilmaydi.
Sharpe bu holatga pragmatik qaraydi: “Bu vaziyatga ijobiy tomondan ham qarash mumkin. Bir yil undan foydalanib ko‘rasiz, qanday darajada ekanini baholaysiz. Agar yaxshi mavsum o‘tkazsa, stolga shart qo‘yish mumkin: yangi kontrakt. Bir yili qolganida ham u hali anchagina qiymatga ega bo‘ladi, lekin agar o‘ynasa, yana uzoq muddatli bitim bilan bog‘lab olish imkoniyati paydo bo‘ladi”.
Carrickning qo‘li, Rashfordning qarori
United ichida hammasi murabbiy shtabiga bog‘liq bo‘ladi. Michael Carrick – Rashfordni yaxshi biladigan, klub ruhiyatini ichidan his qiladigan inson. Sharpe shunday deydi:
“Menimcha, Michael Carrick uni mamnuniyat bilan qabul qiladi, qo‘llab-quvvatlaydi, yelkasiga qo‘l qo‘yadi. Lekin baribir hal qiluvchi narsa bitta: Marcus klubda o‘ynashni xohlaydimi va kelajagini shu yerda tasavvur qiladimi?”
Agar javob “yo‘q” bo‘lsa, United uchun yo‘l aniq: “Agar u bu yerda bo‘lishni istamasa, klub uni maosh vedomostidan chiqarib, o‘rniga bu loyihaga chin dildan qo‘shiladigan futbolchilarni olib kelishni afzal ko‘radi”, – deya qo‘shimcha qiladi Sharpe. “Lekin aytganimdek, u aql bovar qilmas darajada iqtidorli va tarkib uchun haqiqiy qo‘shimcha bo‘la oladi”.
Shu bois 2026/27-yilgi mavsum Rashford uchun faqat navbatdagi kampaniya emas. Bu uning Manchesterdagi butun hikoyasini qayta yozish yoki 2027-yilda ketish eshigini keng ochib berish yili bo‘lishi mumkin.
Old Trafford uni yana qahramon sifatida qabul qilishga tayyor. Endi javob bitta odamning ichida: Marcus Rashford bu sahnaga qaytishni haqiqatan ham xohlaydimi?
