Rodri bo‘lmagan City: Maresca davrining birinchi katta sinovi
2024-yil sentabrida yorilgan tizzadagi “ACL” Rodri faoliyatini izdan chiqargan payt edi. Oradan bir oy o‘tib u Parijda “Ballon d'Or”ni ko‘tardi, lekin tanasi allaqachon signal berib bo‘lgandi. Keyingi mayda-mayda jarohatlar esa uning ritmini butunlay buzdi.
Shu paytgacha deyarli “temir odam” bo‘lib kelgan futbolchi – klub safida atigi yetti o‘yin o‘tkazib yuborgan edi – birdan-bir eng katta yo‘qotishga aylandi. “City” esa aynan o‘sha paytdan boshlab, 2023-24 mavsumidan beri liga chempionligini qaytarib ola olmayapti. Klub ichkarisida bunga sabab sifatida ko‘p narsadan oldin Rodri yo‘qligi ko‘rsatiladi.
Pep Guardiola esa buni oldindan ko‘rgandek gapirgan edi: “Jahon chempionatida eng yaxshi Rodri bo‘ladi, keyingi mavsumda ham eng yaxshi Rodri bo‘ladi”, degandi u o‘tgan yil oktabrida. Bu bashorat yozda to‘liq tasdiqlandi.
Jahon chempionati: Rodri yana sahnada
30 yoshli yarim himoyachi Shimoliy Amerikadagi Jahon chempionatida Ispaniya uchun hamma narsani belgilab berdi. Luis de la Fuente jamoasida u maydon markazida ritmni boshqardi, raqib hujumlarini birin-ketin sindirdi, o‘yin tezligini o‘zi xohlagan darajaga tushirib-ko‘tarib turdi.
Bu turnir yana bir bor bitta haqiqatni yalang‘och ko‘rsatdi: Rodri “City” uchun almashtirib bo‘lmaydigan figura. Bir kun kelib u ketadigan bo‘lsa, bu bo‘shliqni oddiy transfer bilan to‘ldirib bo‘lmaydi. Endi esa shu kun kutilmaganda tezlashishi mumkin – Guardiola davri yakuniga yetdi, Rodri shartnomasida esa atigi bir yil qoldi. Agar u o‘z vaqtini kelgan deb hisoblasa-chi?
Maresca keladi, lekin Rodri haqida o‘ylamaslikning iloji yo‘q
Guardiola o‘rnini egallagan Enzo Maresca – klubning sobiq birinchi jamoa murabbiyi va “Chelsea” bosh murabbiyi – Rodri atrofidagi qiziqishdan hayron emas. Lekin u bundan ko‘ra ko‘proq xavotirlanishi kerak bo‘lgan nuqta aynan shu: Rodri ketishi ehtimoli.
Maresca ilk matbuot anjumanida shunday dedi: yirik futbolchilar atrofida doim shov-shuv bo‘ladi, bunga o‘rganish kerak. Uningcha, bu tabiiy hol – Ispaniya Jahon chempioni bo‘ldi, Rodri esa dunyoning eng yaxshi futbolchilaridan biri.
Hozircha esa boshqa kun tartibi bor: Rodri dushanba kuni belidagi muammo tufayli operatsiya stoliga yotadi. So‘ng ta’til, dam, tiklanish. Shundan keyin u yana “City”ga qaytishi rejalashtirilgan.
Lekin Maresca bir narsani yoddan chiqarmasligi kerak: Rodri bu jamoa o‘yin falsafasining markazi bo‘lib kelgan va shunday bo‘lib qoladi. Uning Maresca odatdagi suyuq, rol almashuviga asoslangan tizimida turli zonalar orasida erkin suzishi, chuqurdan hujum boshlashi, ustiga-ustak Jahon chempioni sifatidagi yetakchilik fazilatlari – bularning barchasi almashtirish qiyin bo‘lgan paket.
O‘rindoshlar? Hozircha faqat savollar
Yangi kelgan Elliot Anderson uchun klub 116 million funt sarfladi. Lekin undan tashqari, yarim himoyada Rodri merosini ko‘tara oladigan futbolchilar deyarli ko‘rinmayapti. Agar ispan yulduz yozda vatanga qaytsa, bu Maresca uchun jiddiy ogohlantirish bo‘lishi kerak.
Rodri jarohati fonida aynan o‘rnini bosish uchun olinishi kerak bo‘lgan Nico Gonzalez klubning 2025-yil yanvaridagi sarf-xarajatlari orasida eng ko‘ngilsiz transferlardan biriga aylandi. U Guardiola ko‘ziga tushmadi, mavsumning ikkinchi yarmida ko‘proq zaxira o‘rindig‘ini isitdi. Endi uni sotish ehtimoli tilga olinmoqda.
Tijjani Reijnders ham o‘xshash yo‘lni bosib o‘tdi: “AC Milan”dan 46 million funt evaziga kelganidan keyin tezda porlagandek bo‘ldi, lekin mavsum burilish nuqtasidan keyin barqarorlikni yo‘qotdi va ikkinchi planga tushib qoldi. Klub ichida undan keyingi mavsum ingliz futbolining talablariga to‘liq moslashgan holda qadam tashlashi kutiladi.
Mateo Kovacic, Rico Lewis va Kalvin Phillips haqida esa allaqachon “Etihad”dagi kelajagi yo‘q futbolchilar sifatida gap ketmoqda. Endi tasavvur qiling: bu ro‘yxatdan Rodri ham chiqib ketsa, “City” yarim himoyani qayta qurish uchun transfer bozorida ulkan ish bajarishi kerak bo‘ladi.
Anderson uchun ochilgan eshik
Shu fon oldida Elliot Anderson vaziyatni boshqacha ko‘rayotgandir. Rodri bilan yonma-yon o‘ynash – albatta orzu. Lekin “Ballon d'Or” sohibi Madrid sari yo‘l olsa, bu 23 yoshli ingliz uchun “City”ning yangi 6-raqamiga aylanish imkoniyati.
“Nottingham Forest”dagi keskin ko‘tarilishi davomida Anderson Thomas Tuchel qo‘l ostidagi Angliya terma jamoasining asosiy bo‘g‘iniga aylandi. U jangovar, chuqurdan o‘yin qura oladigan pleymeyker sifatida ajralib turdi.
O‘tgan mavsum “Premier League”da u raqibdan to‘pni eng ko‘p tortib olgan futbolchiga aylandi – 306 marta. Eng ko‘p yakkakurash yutgan ham o‘sha – 297 duel. “Forest”da Morgan Gibbs-White borligiga qaramay, yaratuvchanlik bo‘yicha ham yetakchi bo‘ldi: jamoadoshlariga 54 ta imkoniyat yaratdi, shundan 9 tasi aniq “katta imkoniyat” sifatida qayd etildi. 2026-yilgi Jahon chempionatida esa u eng ko‘p to‘p tortib olgan futbolchilar ro‘yxatida Rodri bilan birga birinchi o‘rinni bo‘lishdi – 18 tadan.
Qisqasi, u hammasini qila oladi. Va u Rodri ketadigan bo‘lsa, “City” yarim himoyasining yangi tayanchiga aylanish mas’uliyatini ko‘tarishga tayyor ko‘rinadi.
Yangi qahramonlar: Bouaddi sahnaga erta chiqadimi?
Anderson yolg‘iz qolmasligi ham mumkin. Klub ichkarisida Marokash terma jamoasining Jahon chempionatidagi yorqin yulduzi Ayyoub Bouaddi transferini tezlashtirish ehtimoli haqida gap ketmoqda. Avvaliga 18 yoshli tayanch yarim himoyachini “Lille”ga darhol ijaraga qaytarish rejasi bor edi.
Endi esa hammasi Rodri taqdiriga bog‘lanib qolgan. Agar ispan yulduz Madrid sari yo‘l olsa, Bouaddi “Etihad”ga rejalashtirilganidan ancha erta kelishi mumkin.
Guardiola soyasi, bo‘shab qolgan kiyinish xonasi
Maresca qo‘liga tushgan klub – bu oddiy top-jamoa emas, o‘n yillik hukmronlikning, qat’iy tizimning, Pep Guardiola soyasining mahsuli. Uning ketishi allaqachon klub markazida bo‘shliq hosil qildi.
Bu bo‘shliqni yanada kattalashtirgan yana ikki nom bor: Bernardo Silva va John Stones. Ikkalasi ham shartnomasi tugagach ketdi – biri Madridga, biri “Inter”ga. Har ikki futbolchi ham g‘alabaga o‘rgangan, kiyinish xonasida ovozi baland bo‘lgan yetakchilar edi. Maresca esa bir zumda ikkita tayanch ustundan ayrildi.
Guardiola bilan xayrlashuv allaqachon “City” uchun seysmik zarba bo‘lgan bir paytda, Rodri ketishi ehtimoli vaziyatning qanchalik nozik ekanini yanada aniqroq ko‘rsatadi.
Klub rahbariyati bitta narsadan qo‘rqadi: “Manchester United” va “Arsenal” boshidan kechirgan beqarorlikni takrorlash. Sir Alex Ferguson va Arsene Wenger ketganidan keyingi yillar – doimiy qayta qurish, izlanish, xatolar. “City” aynan shunday yo‘lga tushishni istamaydi. Ayniqsa Maresca “Chelsea”dagi notekis davridan keyin hali ham katta savollar ostida turgan bir paytda.
Shu bois ham barqarorlikka chanqoqlik kuchli. Va bu zanjirda eng muhim halqalardan biri – Rodri.
Maresca: bosim ostida xotirjamlik
Shunga qaramay, italiyalik murabbiy hozircha o‘zini sokin tutmoqda. U bu lavozimni “imtiyoz” deb atadi. Uningcha, klubning aynan uni tanlagani – ishonch belgisi. U Pepni oxirgi 20-25 yilning eng yaxshi murabbiyi deb bilishini ochiq aytdi va bu merosni davom ettirishni “chaqiriq” sifatida qabul qilmoqda.
U tarixga ishora qildi: bir klubda uzoq yillar ishlagan murabbiylar ketganidan keyin ko‘pincha keyingi murabbiylar qiynaladi. Sir Alex, Arsene – bularning hammasi ogohlantiruvchi misol. Lekin Maresca uchun bu ham sinov, ham imkoniyat.
U yana bitta muhim nuqtani tilga oldi: vaqt. So‘zlariga ko‘ra, “City” ichki tuzilmasi, tashkiloti bilan ajralib turadi. So‘nggi 17 yilda atigi uchta murabbiy – bu futbol olamida kam uchraydigan barqarorlik. Klub sabr qilishni biladi, tizimga ishonadi.
Maresca shunga tayanmoqda. U Roberto Mancini davridan beri qurilgan ishni davom ettirishga ishonch bildiradi. Lekin bu ishning markazida kim bo‘ladi – Rodrimi yoki uning o‘rnini bosishga majbur bo‘ladigan yangi nomlarmi?
Kelasi mavsum “Etihad”da sokin bo‘lmaydi. O‘yin uslubi o‘zgaradi, kiyinish xonasidagi ierarxiya yangilanadi, raqiblar esa zaiflashgan chempionni tutib olishga shay. Maresca uchun eng katta savol esa bitta: bu bo‘ron ichida u yonida Rodrini ko‘radimi yoki yangi davrni eng muhim tayanchsiz boshlashga majbur bo‘ladimi?
