Rodri transferida Barcelona oldinda: Madrid muzokarasi muzlab qoldi
Manchester City markazidagi tayanch toshi bo‘lgan Rodri uchun yozgi bozor kutilmaganda Ispaniya ichki dueliga aylandi. Bir necha kun avvalgacha poygada oldinda ketayotgandek ko‘ringan Real Madrid hozir to‘xtab qolgandek, Barcelona esa keskin tezlikda oldinga o‘tib olgan.
Ramon Alvarez ma’lumotiga ko‘ra, katalonlar so‘nggi soatlar ichida jarayonni yangi bosqichga olib chiqdi: Rodri vakillari bilan ham, Manchester City rahbariyati bilan ham to‘g‘ridan-to‘g‘ri aloqaga o‘tilgan. Endi bu shunchaki qiziqish emas, real imkoniyat.
Madrid muzokarasi muzlab qoldi, Barcelona esa kirib keldi
Madridda bo‘layotgan voqealar bu burilishni tayyorlab berdi. Matteo Moretto xabariga ko‘ra, Real Madrid va Manchester City o‘rtasidagi muzokaralar aynan yakuniy narx borasida to‘xtab qolgan. City 75 million yevro atrofidagi talabidan chekinmayapti, Madrid esa kunlab shu summani pasaytirishga urinib, oxir-oqibat kelishuv nuqtasini topa olmadi.
Shu paytda Deco boshchiligidagi Barcelona sport bo‘limi vaziyatni aniq o‘qib oldi. Madrid tomoni hujjatlar va raqamlar ustida “osilib” qolgan bir paytda, katalonlar bo‘shliqni ko‘rib, tezda hujumga o‘tdi.
Fabrizio Romano ta’kidlaganidek, bugungi holatda ikkala ispan grandining Manchester Cityga taklif qilayotgan paketlari deyarli bir xil darajada. Ya’ni klubdan klubga yo‘l ochiq. Endi hammasi bitta odamning qaroriga borib taqaladi.
Qaror Rodri qo‘lida
Bu odam – albatta, Rodri. 30 yoshli ispaniyalik bir necha kun avval Real Madrid bilan shaxsiy shartnoma bo‘yicha og‘zaki kelishuvga erishib bo‘lgan edi. U uchun Madrid – uy shahri, qaytish istagi kuchli bo‘lgani aytilmoqda.
Lekin endi Barcelona stolga boshqa raqamlar qo‘ymoqda. Katalonlar moliyaviy jihatdan sezilarli majburiyatni bo‘yniga olishga tayyor, bu esa futbolchini o‘ylashga majbur qilmoqda. Faqat pul emas, rol ham o‘zgacha.
La Roja ichkarisidagi bosim: “Camp Nou”ga kel
Moretto ma’lumotiga ko‘ra, jarayonning eng qiziq tomoni – Ispaniya terma jamoasi ichidagi atmosfera. Barcelona safida to‘p surayotgan bir necha ispaniyalik jamoadoshlari Rodri bilan deyarli har kuni aloqada. Ular uni Santiago Bernabeu yo‘lidan qaytarishga urinmoqda.
Ular chizayotgan surat aniq: Hansi Flick qo‘l ostida o‘rta chiziqning mutlaq rahbari bo‘lish, maydon markazida barcha ritmni belgilovchi futbolchi sifatida jamoaning tayanchiga aylanish. Frenkie de Jongning uzoq muddatli jarohati fonida bu rol yanada muhimlashgan.
Madridda esa u yulduzlar galaktikasidagi navbatdagi markaziy bo‘g‘in bo‘ladi. Barcelonada – loyiha markazi.
Ikkita loyiha, bitta cho‘qqi
Hozircha vaziyat shunday: Manchester City ikkala klublardan ham deyarli bir xil darajadagi moliyaviy taklif kutyapti, Ispaniya grandlari bunga tayyor. Shartlar stol ustida. Endi Rodri ikkita sport loyihasini yonma-yon qo‘yib, keyingi yillarini qayerda o‘tkazishni tanlaydi.
Hozirgi manzarada Barcelona biroz oldinga chiqib olgandek. Lekin bunday transferlarda bitta qo‘ng‘iroq, bitta uchrashuv, bitta tuyg‘u hammasini ag‘darib yuborishi mumkin.
Rodri qaysi libosda “Camp Nou” yoki “Santiago Bernabeu” gazoniga birinchi bo‘lib chiqadi – yaqin haftalarda Yevropa futbolidagi eng katta savollardan biri shunga aylanadi.
