Roy Keane: Yaxshi yarim himoya, lekin chempionlikka yetmaydi
Manchester United yozgi qayta qurilish bilan yarim himoyani to‘ldirib, Kobbie Mainoo atrofida yangi blok qurishga urinmoqda. Ammo klub tarixidagi eng talabchan kapitnlardan biri bo‘lgan Roy Keane hali ham ishonganicha yo‘q.
U Stick to Football dasturida gapirar ekan, yangi kelayotganlar, jumladan Baleba nomi atrofidagi gap-so‘zlar fonida, Unitedning chempionlik uchun yetarli darajada kuchaygan-kuchaymagani borasida shubhasini yashirmadi.
Yaxshi yarim himoya – lekin chempionlik darajasida emas
Savol aniq bo‘ldi: Baleba kelishi bilan Unitedda “yaxshi yarim himoya” paydo bo‘ladimi?
Keane javobni cho‘zmay aytdi: “Bu to‘g‘ri ta’rif, yaxshi yarim himoya. Lekin agar sen liga yutish haqida gapirayotgan bo‘lsang, bu qisqa. Unitedning katta muammolari baribir himoyada bo‘ladi”.
Uningcha, Michael Carrick qo‘l ostida o‘tgan mavsum yakunida ko‘rinib qolgan hujumdagi xavf darajasi – jamoaning eng katta plussi. Mainoo markazda porladi, old chiziq gollar bilan javob qaytardi.
“Bu yarim himoya va oldingi chiziq, – dedi Keane, – Unitedda katta gol tahdidi bor. O‘tgan yil buni ko‘rsatishdi, ayniqsa Carrick kelgach, ular haqiqiy gol xavfiga aylandilar”.
Ammo Keane uchun chiziqlar orasidagi bu muvozanat yetarli emas. Yarim himoya “yaxshi” bo‘lishi mumkin, lekin “chempionlikka yaroqli” bo‘lish – boshqa masala.
Himoyadagi eski dardlar
Suhbat tobora bir nuqtaga qayta-qayta urildi: orqa chiziq.
“Muammo orqada, – deya davom etdi Keane. – Full-backlar va ikkita markaziy himoyachi hali ham katta masala”.
Unga ko‘ra, qog‘ozda yarim himoya tarkibi chiroyli ko‘rinadi, nomlar kuchli, profillar jozibali. Lekin sovrinlarni qog‘oz emas, maydondagi barqarorlik yutadi.
“Qog‘ozda ular juda yaxshi futbolchilar sifatida ko‘zga tashlanadi. Lekin bu yerda liga yutadigan yarim himoya bormi? Ehtimol yo‘q. Yo‘q, men buni ko‘rmayapman”, – deya qat’iy xulosa qildi u.
Keane fikricha, United chempionlik poygasiga qaytishni istasa, faqat markazni to‘ldirish bilan cheklanib qolmasligi kerak. Himoyadagi eski zaif nuqtalar hal etilmaguncha, orzu qilinayotgan sakrash sodir bo‘lmaydi.
Tielemans – xavfsiz, lekin chegaralangan variant
Yozgi transferlar orasida eng ko‘p muhokama qilinayotgan ismlardan biri – Youri Tielemans. 35 million funtlik kelishuv, avvalgi yillardagi Casemiro kabi yirik maoshli bitimlardan farqli ravishda, moliyaviy jihatdan ehtiyotkorona qadam sifatida ko‘rilmoqda.
Keane ham aynan shu jihatni e’tirof etdi.
“Tielemans – United uchun xavfsiz garov”, – dedi u. “So‘nggi yillarda, Casemiro bunga yaxshi misol, futbolchilar juda katta pulga, ulkan maoshlarga kelishdi”.
Belgiya terma jamoasi o‘yinchisi liga talablarini biladi, tempga moslasha oladi, Old Traffordga Aston Villa bilan kelib, o‘zini bu sahnada bemalol his qila olishini allaqachon ko‘rsatgan.
“Tielemans Premier League’ni biladi, yaxshi xalqaro futbolchi, Villa bilan Old Traffordga kelib muvaffaqiyatga erishgan, shuning uchun bu bosimga tayyor bo‘ladi”, – deya tan oldi Keane.
Ammo bu maqtovning chegarasi bor.
“Lekin u Unitedni eng yuqori pog‘onaga olib chiqadimi? Yo‘q”, – deb kesdi u.
Shu tariqa, Keane ko‘z o‘ngida Unitedning yangi ko‘rinishi shakllanmoqda: markazda chuqurlik, oldinda gol xavfi, lekin orqada hanuz titrab turgan poydevor. Savol esa ochiq qoladi – bu yarim himoya “yaxshi” degan ta’rifdan chiqib, chempionlik darajasiga ko‘tarila oladimi yoki yana bir mavsum ham orzu bilan yakunlanadimi?
