Sevilla – Barcelona o‘yini uchun bahsli hakam tayinlandi
La Liga yettinchi turidagi eng yirik sahna — “Sevilla” va “Barcelona” o‘rtasidagi jadval tepasidagi to‘qnashuv. Maydonga esa o‘yinchilardan ham ko‘proq gap-so‘z ortidan yuradigan ism chiqadi: hakam Juan Martínez Munuera.
Ispaniya futbol federatsiyasi hakamlar qo‘mitasi aynan uni “Ramón Sánchez Pizjuán”dagi shanba kechasiga bosh hakam etib tasdiqladi. VAR xonasida esa Raúl Martín González ishlaydi. Qog‘ozda bu oddiy tayinlovdek ko‘rinadi. Amalda esa bu qaror “Barcelona” tarixidagi eng bahsli arbitrni yana markazga olib chiqdi.
Bahslar bilan to‘la dosye
Kataloniyadagi “Sport” nashri eslatganidek, Munuera va “Barcelona” yo‘llari 2013 yildan beri tez-tez kesishib keladi. O‘nlab uchrashuvlar, final o‘yinlari, VAR qarorlari, bekor qilingan gollar, qizil bo‘lishi kerak bo‘lgan sariqlar… va har safar ortidan davom etadigan munozaralar.
Eng keskin burilishlardan biri o‘tgan mavsumdagi Copa del Rey yarim finali edi. Fevral oyida “Wanda Metropolitano”da “Atlético Madrid” – “Barcelona” ilk uchrashuvida Munuera boshqaruvni qo‘lga olgan, natijada esa katalon klubi hakamlikdan qattiq norozi bo‘lib maydonni tark etgan.
O‘yinning eng bahsli epizodlaridan biri: Giuliano Simeone tomonidan Alejandro Baldéga qilingan qo‘pol zarba. Tribunalardan ham, “Barcelona” texnik zonasidan ham qizil kartochka talab qilingan lahza. Munuera esa faqat sariq bilan cheklangan. VAR xonasida o‘tirgan Pablo González Fuertes ham aralashmadi. Hansi Flick jahli chiqqani yashirilmagan, klub esa rasmiy shikoyat berish g‘oyasini jiddiy ko‘rib chiqqan edi.
O‘sha kecha yana bir epizod butun Ispaniyani o‘ziga qaratdi: yosh himoyachi Pau Cubarsí tomonidan kiritilgan gol. Dastlab sevinc, so‘ngra VAR tekshiruvi, va nihoyat… etti daqiqaga cho‘zilgan tanaffus. Sabab — yarim avtomatlashtirilgan ofsayd tizimidagi nosozlik. Chiziqlarni tizim emas, hakamlar qo‘lda chizishga majbur bo‘ldi. Oxiri ofsayd qayd etildi, gol bekor qilindi. Keyinroq hakamlar qo‘mitasi texnik nosozlikni tan oldi, lekin natija o‘zgarmadi: “Barcelona” 0:4 hisobida mag‘lub bo‘ldi.
Qiziq tomoni shundaki, javob o‘yinda ham Munuera sahnada bo‘lgan, bu safar VAR xonasida. “Barcelona” 3:0 hisobida g‘alaba qozondi, ammo umumiy hisobda baribir mag‘lub bo‘lib, finalga chiqa olmadi. Hakam esa yana bahslar markazida qoldi.
“Alhamdulillah” – Klasikoni larzaga keltirgan jumla
Munuera va “Barcelona” tarixidagi eng mashhur sahna esa 2025 yil may oyidagi Klasiko bilan bog‘liq. O‘sha kuni u VAR xonasida o‘tirgan, maydonda esa Alejandro Hernández Hernández bosh hakamlik qilgan.
Uchrashuv so‘nggi daqiqalarga kirgan, Fermín López gol urgan, katalonlar deyarli g‘alabani nishonlay boshlagan payt. Keyin esa VAR devoridagi yozuv: tekshiruv. Qo‘l bilan o‘ynash ehtimoli.
Tekshiruv chog‘ida yozib o‘lingan audio keyinchalik matbuotga sizib chiqdi. Unda VAR xonasidan “Alhamdulillah” jumlasi eshitiladi. “Sport” nashri bu ovoz aynan Martínez Munueraga tegishli ekanini tasdiqladi: u qo‘l bilan o‘ynashni ko‘rganini Hernández Hernándezga bildirayotgan payt edi.
Natija: gol bekor qilindi. Federatsiya va hakamlar qo‘mitasi bu jumlani “gol berib yubormasdan oldin qoida buzilishini payqab ulgurganidan xursandlik” sifatida izohladi. Kataloniyada esa bu voqea butunlay boshqacha talqin qilindi. Shubha, ishonchsizlik, hakamlar tizimiga bo‘lgan ishonch yana bir bor larzaga keldi.
Finaldagi hakam, finaldagi tanqidlar
Shunga qaramay, Martínez Munuera “Barcelona” uchrashuvlaridan chetlatilmadi. Aksincha, eng muhim sahnalarga ham tez-tez chiqdi. U “Barcelona” ishtirokidagi ikki katta finalni boshqargan: 2021 yilgi Copa del Reyda katalonlar “Athletic Bilbao”ni 4:0 hisobida yanchib tashlashgan, 2024 yilgi Spanish Super Cupda esa “Real Madrid” 4:1 hisobida ustun kelgan.
Statistika qog‘ozda oddiy ko‘rinadi: 2013 yildan beri “Barcelona” bilan 30 dan ortiq uchrashuv, g‘alabalar ham, mag‘lubiyatlar ham, kuboklar ham bor. Ammo har bir raqam ortida bahslar, VAR yozuvlari, matbuot anjumanlaridagi keskin savollar turibdi.
2025–2026 yilgi mavsumning o‘ziyoq uchta uchrashuv bilan esda qolgan: “Athletic Bilbao” ustidan 3:0, Copa del Reyda “Atlético Madrid”dan 0:4, va 15 mart kuni “Sevilla” ustidan 5:2. Oxirgisi aynan shu hafta oxiri raqib bo‘ladigan jamoaga qarshi so‘nggi uchrashuvi bo‘ldi.
Yangi mavsum, eski savollar
Endi esa 2026–2027 yilgi mavsumda Hansi Flick boshchiligidagi “Barcelona” bilan uning ilk uchrashuvi yaqinlashmoqda. Sahna — “Ramón Sánchez Pizjuán”, raqib — uyda doimo tajovuzkor o‘ynaydigan “Sevilla”, stavka — jadval tepasidagi poygada muhim uch ochko.
“Barcelona” lagerida bu tayinlov e’tiborsiz qolmaydi. Katalon matbuoti allaqachon Munueraning har bir avvalgi qarorini eslatib, fonni qizdirib bo‘ldi. “Sevilla” esa bunday shovqindan faqat yutishi mumkin: bosim ko‘proq hakam va mehmonlar ustida bo‘ladi.
Bir narsa aniq: Martínez Munuera boshqaradigan o‘yin kamdan-kam hollarda izsiz o‘tadi. Shovqin, VAR kadrlaridagi muzlatilgan epizodlar, ijtimoiy tarmoqlarda soatlab davom etadigan bahslar — bularning bari allaqachon ssenariyga yozilgandek.
Endi savol bitta: “Sevilla” va “Barcelona” o‘rtasidagi bu katta sahnada e’tiborni o‘yinchilar tortadimi yoki yana hakamning ismi bosh sarlavhalarni egallaydimi?
