Silverstonega qaytgan Sprint: texnik yangilanishlar va raqobat

Britaniyaning qadimiy asfaltida bu hafta oxiri nafaqat navbatdagi bosqich, balki Sprint formati ham qaytadi. Tezlik, bosim, yangilanishlar. Paddokda esa bitta savol: kim texnik poygada ustun chiqadi?

Mercedes: sokinlik oldidagi bo‘ronmi?

Avstriyada bir hafta oldin ikki xil yangilanish sinagan Mercedes bu safar g‘alati darajada sokin. Silverstonega ular yangi detalsiz kelishdi. Demak, Brackley shtab-kvartirasi mavjud paketga ishonyapti yoki katta yangilanishni keyinga saqlayapti. Har ikkala holatda ham, raqiblar fonida bu qaror ko‘zga tashlanadi.

Ferrari: orqa qismga jarrohlik aniqligida teginish

Ferrari mashinaning orqa burchagini yangiladi. Kengaytirilgan sovitish kirish va chiqish kanallari, yangilangan pastki deflektor va qayta optimallashtirilgan kichik qanotchalar klasteri – barchasi bitta maqsadga xizmat qiladi: mahalliy yuklanishni oshirish va issiq Silverstone kunlarida sovitishni yanada ishonchli qilish.

Qizil mashinalar hali ham barqarorlik va tezlik o‘rtasidagi nozik chiziqni izlayapti. Bu orqa qismdagi tuzatishlar aynan shunga zarba berish uchun.

McLaren: yetakchidan agressiv javob

Oldingi uchlik ichida yangilanishlar bo‘yicha peshqadam – McLaren. Amaldagi chempionlar bu hafta oxiri yana tajovuzkor.

Mashinaning old burchagi va “floor furniture” qismida sezilarli o‘zgarishlar bor. Old tarafda yangi old tormoz kanali paydo bo‘ladi – jamoa bu yechimdan havo oqimini yanada silliq shakllantirish va aerodinamik yukni oshirishni kutyapti. Pol qismida esa qayta ishlangan “floor board” havo fizikasi va umumiy samaradorlikni yaxshilashga qaratilgan.

Katta raqiblar jim turgan paytda McLaren maydonga texnik zarba bilan chiqmoqda. Silverstone bu qarorning haqiqiy bahosini beradi.

Red Bull: Avstriyadagi katta paketdan keyingi nozik ishlov

Red Bull o‘z uy poygasi – Avstriyada katta yangilanish paketini tashlagan edi. Endi esa ro‘yxat ancha ixcham: faqat orqa burchak yangilanadi.

Orqa g‘ildirak atrofi qanotchalaridagi “cascade” elementlari qayta ko‘rib chiqildi. Maqsad – yuklanish xarakteristikalarini yanada toza qilish va mashinani barqarorroq holatga keltirish. Katta inqilob emas, lekin chempionlik kurashida aynan shunday millimetrlar hal qilishi mumkin.

Alpine: sukut

Alpine Silverstone uchun birorta yangilanish bildirmadi. Raqiblar texnik qurollanishni davom ettirayotgan pallada bu sukut juda baland eshitiladi.

Racing Bulls: pol va diffuzorga hujum

Racing Bulls esa aksincha, pastki qismga jiddiy e’tibor qaratdi. Yangilangan pol burchagi va diffuzor geometriyasi ko‘proq bosim va yuqori tezlikda yaxshiroq natija berishi kerak.

Orqa burchakda ham yangi oldingi deflektor geometriyasi paydo bo‘ladi. Maqsad aniq: mahalliy oqimni tozalash va polning ishlashini kuchaytirish. O‘rta peloton ichida har bir bunday qadam pozitsiya yutug‘iga teng bo‘lishi mumkin.

Haas: tanqiddan keyingi javob

Haas uchuvchisi Ollie Bearman yaqinda jamoa raqiblar fonida “rivojlanishda ortda qolganini” ochiq aytgandi. Endi navbat texnik bo‘limga.

Silverstonega ikki yangilanish keladi. Orqa qanot profillari tubdan qayta ko‘rib chiqilgan – maqsad mahalliy yuklanishni oshirish. Qanot uchlarida esa tashqi chiqintilar qo‘shilgan, ular oqimni yanada tartibli qilish uchun mo‘ljallangan.

Haas uchun bu faqat texnik yangilanish emas, obro‘ masalasi ham. Ular raqiblar bilan bir xil tempda rivojlanayotganini isbotlashi kerak.

Williams: uy poygasi, yangi old qanot

Williams o‘z uy poygasiga sovg‘a bilan chiqadi. Yangi old qanot geometriyasi – asosiy yangilik.

Yangilangan profillar va qanot uchlari mahalliy yuklanishni oshirish hamda pastdagi elementlar bilan havo oqimining o‘zaro ta’sirini yaxshilashga qaratilgan. Silverstone kabi tezkor, uzun burilishli trassada bu old qismdagi aniqlik juda katta ahamiyatga ega.

Audi: harakatlanuvchi nishon, lekin yangilanishsiz

Audi ro‘yxatda yangilanishsiz turganlardan yana biri. Qolganlar texnik kartalarini ochayotgan paytda bu qaror strategik xotirjamlikmi yoki imkoniyatni qo‘ldan boy berishmi – javobni faqat poyga beradi.

Aston Martin: katta paket oldidan tinch tayyorgarlik

Aston Martin allaqachon e’lon qilgan: katta yangilanish paketi keyingi – Vengriya bosqichida bo‘ladi. Shuning uchun mahalliy tomoshabinlar oldida bu hafta oxiri mashina deyarli o‘sha holicha qoladi.

Silverstone ular uchun ko‘proq ma’lumot yig‘ish, kelayotgan “upgrade” uchun tayyorgarlik sahnasi bo‘lib xizmat qiladi.

Cadillac: Avstriyadan keyingi pauza

Cadillac ham Red Bull singari Avstriyada katta ro‘yxatdagi yangilanishlarni ishga tushirdi. Endi esa pauza: Silverstonega yangi detal olib kelinmaydi. Jamoa avvalgi paketning haqiqiy samaradorligini turli tipdagi trassalarda sinab ko‘rishni ma’qul ko‘rdi.

Shunday qilib, Sprint qaytgan, ob-havo har doimgidek kutilmagan, texnik frontda esa aniq chiziq ko‘rinadi: kimdir xavf qilib yangilanishlar bilan oldinga otilyapti, boshqalar esa bor paketiga ishonyapti. Silverstone bu qarorlarning qaysi biri to‘g‘ri bo‘lganini juda tez ko‘rsatadi.