Tchouameni yoki Rodri? Manchester Unitedning transfer rejalari
Manchester United uzoq vaqtdan beri Aurelien Tchouameni’ni kuzatib keladi. Klublar almashinuvi bozorida esa birgina harakat butun rejalarning izdan chiqishiga yetarli bo‘lishi mumkin. Hozir aynan shunday holat yuzaga kelmoqda.
Barcelonaning Rodri uchun zarbasi
Kuchli markaziy yarim himoyachi izlayotgan United ko‘zi tushgan asosiy nomlardan biri emas, balki butun bozor dinamikasini o‘zgartirayotgan futbolchi — Rodri.
Barcelona juma kuni Manchester City yulduziga ilk rasmiy taklifini yubordi. Taklif — taxminan 45 million yevro atrofida, ustiga bonuslar. City esa o‘z o‘yinchisini bundan ancha qimmat baholayapti: klub ichida 60 million funtdan yuqori raqam tilga olinmoqda. Narxlar o‘rtasida jarlik katta, lekin bu faqat savdolashuvning boshlanishi.
Rodri avval ham Ispaniyaga qaytishga ochiq ekanini yashirmagan. Endi esa uning Camp Nou’ni Jose Mourinho boshqarayotgan jamoaga ustun qo‘yayotgani haqida signal paydo bo‘ldi. Manchester Evening News ma’lumotiga ko‘ra, City futbolchini ushlab qolish uchun zo‘rma-zo‘rakilik qilmaydi — faqatgina o‘z qiymatiga munosib tovon puli olinishiga ishonch hosil qilmoqchi.
Aynan mana shu poyga Real Madriddagi vaziyatni ham qimirlatmoqda.
Madriddagi Tchouameni jumboği
United Tchouameni bo‘yicha ishni ancha oldin boshlagan. Klub aprel oyidayoq 26 yoshli fransiyalik bo‘yicha fon tekshiruvlarini o‘tkazdi, uning xarakteri, maydondagi odatlari, jarohat tarixi — hammasi ko‘rib chiqildi. Agar imkon tug‘ilsa, Manchester bu imkoniyatni qo‘ldan boy bermaslikka tayyor edi.
Ammo Real Madrid boshqa reja tuzgan. Klub Tchouameni’ni sotishga hozircha mutlaqo moyil emas. U bilan “Santiago Bernabeu”da yangi, besh yillik shartnoma bo‘yicha kelishuvga erishilgan. Rasmiy e’lon hali berilmadi, aynan shu sukut bozorni qiziqtirib turibdi, xolos.
Rodri atrofidagi harakatlar esa bu jumboqni yanada murakkablashtirdi. Madrid allaqachon City yarim himoyachisini ko‘z ostiga olgan, Barcelonaning kutilmagan hujumi esa bu rejalarga tuzatish kiritishi mumkin. Agar Rodri nihoyat Camp Nou sari yo‘l olsa, Real Tchouameni’ni qo‘yib yuborish ehtimoli deyarli nolga tushadi. United uchun bu eshik yopilgani bilan barobar.
United uchun ketma-ket zarbalar
Barcelona bu yozda Manchester United’ga bitta emas, ikkita zarba berayotganga o‘xshaydi.
Birinchisi — Tchouameni atrofidagi vaziyatni bilvosita murakkablashtirayotgan Rodri poygasi. Ikkinchisi esa yanada bevosita: Marcus Rashford bo‘yicha qaror. Katalon klubi o‘tgan mavsumdagi muvaffaqiyatli ijaradan so‘ng 26 million funtlik sotib olish bandini ishga tushirmadi.
Bu qaror United uchun moliyaviy nuqtai nazardan og‘ir zarba bo‘ldi. Klub muhim mablag‘dan quruq qoldi, bozor manevrlarini kengaytirish imkoniyatini yo‘qotdi. Ayniqsa, uchinchi markaziy yarim himoyachi transferi haqida ichkarida bahslar avj olayotgan bir paytda.
Carrickning to‘rtlik boshog‘riği
Klub allaqachon o‘tgan oyda Andrey Santos va Youri Tielemans uchun 85 million funt sarfladi. Bu — o‘rtada jiddiy raqobat shakllanayotganini anglatadi. Mason Mount va Kobbie Mainoo bilan birga Michael Carrick qo‘l ostida hozircha ikki o‘rin uchun to‘rtta tayyor futbolchi bor.
Shunday fonda uchinchi transferga kirishish — nafaqat sport, balki moliyaviy qaror ham. Tchouameni varianti deyarli muzlab qolgan, Rodri esa Barcelonaga yaqinlashayotgan bir paytda United rahbariyati oldida savol yanada keskinlashadi: joriy tarkibga ishonch bildirishmi yoki bozorga qayta agressiv kirishmi?
Javob, ko‘rinib turibdiki, endi faqat Old Trafforddagi xohishga bog‘liq emas. Madrid, Barcelona va City o‘rtasidagi murakkab uchburchakda Manchester United yana bir bor tomoshabin bo‘lib qoladimi yoki nihoyat o‘zi ham taxtani silkitadimi?
