Wei Xiangxin AJ Auxerre futbolchisi bo‘ldi
Fransiyaning Ligue 1 sahnasida yangi ism paydo bo‘ldi. Xitoy futbolining navbatdagi umidi endi Fransiyaning tarixiy klubi tarkibida: 18 yoshli hujumchi Wei Xiangxin rasmiy ravishda AJ Auxerre futbolchisiga aylandi.
Beshlik yillik shartnoma. 49-raqam. Bu oddiy transfer emas, balki uzoq muddatli sarmoya.
Xitoydan Bourgogne sari uzun yo‘l
Auxerre o‘tgan mavsumni Ligue 1 jadvalida 18 ta jamoa ichida 15-o‘rinda yakunladi va zo‘rg‘a “surilish o‘yinlari”dan qutulib qoldi. Shunday fon ortida klubning strategiyasi aniq: yosh, och, o‘sishga tayyor futbolchilarni olib kelish.
Wei aynan shunday toifaga kiradi. Xitoy U-17 terma jamoasi safida 2024–2025 yillarda atigi 12 ta o‘yin – va 9 ta gol. Raqamlar uning jarima maydoni ichida yo‘l topishni bilishini ko‘rsatib turibdi. Endi esa bu instinktlar Fransiyada sinovdan o‘tadi.
Klub bayonotida shunday deyiladi: AJ Auxerre Xiangxin Wei kelganini katta faxr bilan e’lon qiladi. Xitoy futbolining katta umidi besh yillik shartnomaga imzo chekdi va 49-raqamni kiyadi. Qisqa, lekin aniq xabar. Klub bu transferga qanchalik jiddiy qarayotgani sezilib turibdi.
Reja allaqachon chizilgan edi
Bu kelishuv birdaniga paydo bo‘lgani yo‘q. O‘tgan yil noyabrida Auxerre Xitoyning Chinese Super League vakili Meizhou Hakka bilan kelishuvga erishganini ochiqlagan, Guangdong viloyatida tug‘ilgan Wei voyaga yetishi bilan ilk professional shartnomasini imzolashi aytilgandi. Va aynan shunday bo‘ldi.
O‘sha paytdagi bayonotda fransuz klubi Wei uchun uning xususiyatlari va ehtiyojlariga moslashtirilgan uzoq muddatli tayyorgarlik dasturi tuzilishini ma’lum qilgandi. Uch haftalik sinov davridan o‘tgan yosh hujumchidan katta maqsadlar kutilayotgani ochiq aytilgan. Endi esa bu rejalar qog‘ozdan maydonga ko‘chishi kerak.
Meizhoudagi og‘ir maktab
Wei Xiangxinning raqamlariga qarasangiz, hammasi ham silliq bo‘lmaganini ko‘rasiz. Meizhou Hakka safida ikki mavsumda turli darajalarda 28 ta o‘yin va atigi bitta gol. Jamoa esa o‘tgan noyabrda atigi 30 uchrashuvdan 5 tasida g‘alaba qozonib, China League One ligasiga tushib ketdi.
Bu fon yosh futbolchi uchun murakkab, lekin qimmatli tajriba bo‘ldi. Qiyin o‘yinlar, past natijalar, tushkun kayfiyat – bularning barchasi professional futbolning “yaxshi kunlar”dan iborat emasligini erta ko‘rsatdi. Shunga qaramay, Wei bu yil Chinese FA Cup doirasida ham Meizhou uchun bitta gol urishga ulgurdi.
Demak, u raqib darvozasini topa oladi. Savol boshqa: bu qobiliyatni yanada yuqori darajada, tezroq, kuchliroq, aqlli raqiblarga qarshi namoyish qila oladimi?
Auxerre uchun xavfmi yoki imkoniyatmi?
Auxerre uchun bu transfer iqtisodiy jihatdan nisbatan past tavakkal, lekin sport nuqtai nazaridan katta imkoniyat. Klub Ligue 1da o‘rtamiyona mavsum ortidan yana pastki zonaga yaqinlashishni istamaydi. Shunday paytda 18 yoshli hujumchiga besh yillik ishonch berish – bu sabr, tizimli ish va aniq reja talab qiladigan qaror.
Wei uchun esa bu butunlay boshqa olam. Yevropa futbolining ritmi, mashg‘ulot intensivligi, taktik talablar, bosim, stadionlar, muxlislar – hammasi yangi. U endi nafaqat Xitoy futbolining umidi, balki Fransiyada o‘z o‘rnini topishga urinayotgan legioner.
Auxerre esa va’da bergan: unga moslashtirilgan mashg‘ulotlar, individual rivojlanish rejasi va yuqori marralar sari yo‘l. Endi navbat Wei Xiangxinning o‘zida. U 49-raqamdagi libosda bu ishonchni gollarga aylantira oladimi?
