Zolani Tete: Janubiy Afrikada sobiq jahon chempioni o‘ldirildi

Janubiy Afrikaning bokschilik tarixida o‘z nomini katta harflar bilan yozdirgan Zolani Tete o‘z uyining oldida otib o‘ldirildi. U atigi 38 yoshda edi.

Mamlakat sport, san’at va madaniyat vaziri Gayton McKenzie ma’lum qilishicha, Tete mashinasida o‘tirgan paytda nishonga olingan. Avtomobilda bo‘lgan 27 yoshli ayol bir necha marta o‘q yeb, kasalxonaga yetkazilgan. Uning ahvoli og‘ir ekani aytilmoqda.

Fojia Eastern Cape viloyatidagi Mdantsane hududida sodir bo‘lgan. Politsiya ma’lumotiga ko‘ra, Tete uyiga kirib borayotgan, darvoza ochilishini kutayotgan paytda ikki nafar qurollangan shaxs balaklava kiygan holda unga hujum qilgan. O‘q yomg‘iri aynan shu paytda yog‘ilgan.

Zolani Tete ringda nafaqat mahalliy, balki xalqaro sahnada ham tan olingan chempion edi. U 2007–2008 yillarda WBF flyweight toifasida jahon chempionlik kamarbandidan ushlab turgan, 2017 va 2019 yillarda esa WBO bantamweight chempionlik unvonini qo‘lga kiritgan. Uning texnik boksi, sovuqqonligi va zarbalaridagi aniqlik uni o‘z avlodining eng xavfli raqiblaridan biriga aylantirgan edi.

Endi esa bu ism sport sahnasidan emas, jinoyat xabarlari satrlaridan o‘rin oldi. Politsiya ikki qurollangan gumonlanuvchini qidiryapti, tergov davom etmoqda.

Janubiy Afrikaning bokschilik jamoatchiligi uchun bu nafaqat katta yo‘qotish, balki yana bir og‘riqli savol: ringda qo‘rquv bilmagan chempionni o‘z uyining oldida kim va nega nishonga oldi?